بتی تتی چلی گئی
دو مائیاں پِنڈورِیاں گلی وِچوں لنگھیاں
میں تہانوں اوہناں کولوں لے کے اندر آئی آں،
آ گئی بتی
پکھے دِتا دھرنا
''میں نہیں چلنا
ناں ایہناں دے بدلو جاں میرا ہور کرو''
آکھن پکھیاں گل سانوں ایہدے نال کرن دے ہِکوارِیں
کر لؤ
ہتھ میرے وِچوں ہسدیاں اوہدے ول ہوئیاں:
''سُن بھائی پکھیا
ایہہ ناں ایس بیبی نہیوں رکھیا
پکھ پَر ہے
پکھواں دی تینوں سار کِتھوں
تیرا اوہناں نال سانگا ای کوئی نہیں
چڑی تیرے نال کھیہہ جائے مار کے سٹ دینائیں،
پکُھو پکھی نیں
اس پکھیاں وِچ جمیاں پلیاں نام اوہناں دا پایا،
پر تیرے پر نہیں لوہے دے پَھر نیں
ساڈے ککھ پتر نیں
سانگا تیرا اُڈنیاں نال تے ہویا جہاز ہوائیاں نال
گھوڑے ہوا دے چڑھیا پیائیں،
سُن بھائی پکھیا
نک نہ وٹ سُن 'بھائی' لفظ اساڈے مُونہوں
'بھائی' اساڈی بولی وِچ بِھرا نہیوں
اوپرے جنے دی گین ای،
لوہا مِشینٹر توں شہراں دیاں کارخانیاں گھڑیا
اساں بھوئیں گرائیں اُگ پلیاں
بَوہڑ ہتھاں نوں رلیاں،
ڈِٹھے نیں اساں وڈیرے وی تیرے
حسب نسب دے عالی محالی
گھڑگیلیاں تیڑ پوا غرارے
چھتوں لمکائیاں اگلیاں
نتھ پا رسّی کندھوں باہر کھڑی
خس ٹٹیاں دے باہروں ہتھ کوئی کھروا
چِھک چِھک رسی پیا جھلاوے
دیہاں ملُوکی ٹھار سُلاوے،
اساں کمیرناں دا پگھر سکاونا
چُلھیاں چوں وِسمیا لمبُو جگاونا
تیرا اساڈا کیہ لاگا،
ناں ہے تیرا فین''
سُن ہویا اوہنوں چین
پکھا چل پیا،
ہسدیاں پرتیاں پکھیاں،
میں آکھیا اِکو کہانی میری تہاڈی
آؤ بہہ کرئیے
اساں سدیویں سکھیاں،
فَین میرے وی شامیں دفتروں پرت کے وگنائے