میں نِکی نُوں سکول چھڈن چلیاں، رِکشے تے- چُپ چُپ اے اج، سوچے پئی اے جیویں - رِکشے والا جوان اے ذرا زنانہ جیہا- اصل لہوریا، ر نُوں ڑ تے ڑ نُوں ر بولن والا- آہندائے مال اُتے تے پُلس ای پُلس اے- اسمبلی ہال کولوں بیڈن روڈ میکلوڈ توں کڈھ کے سکولے آیائے- میں پچُھیائے اج فیصلہ ہونائے بھٹو دا تاں کر کے؟ آہندائے ''کیہ فیصلہ کڑنائے؟'' میں آہناں، ''موت، عمر قید یا خبرے''- آہندائے ''قیامت دِیاں نشانیاں نیں''- سکول دے بُوہے سڑک پار کرن لئی ہتھ نِکی دا میں پھڑیائے- آہندی اے- ''اوہ شازیہ- میں چلی جانی آں''- شازیہ دی اوس اُنگل پھڑی اے- شازیہ دی ماں نے میرے ول اِنج تکیائے جیویں آہندی اے: ''اپنی ذمے واری کیوں میرے تے پیا پاونائے''- نِکی سمجھ گئی اے- شازیہ دا ہتھ چھڈ اوس میرا پھڑیائے- سڑک پار ہوئی اوہ اندر چلی گئی- میں بس ویکھناں دفتر جان لئی- بھری ہوئی اے- میں بھرے ہوئے فُٹ بورڈ تے پیر اڑا کے ڈنڈا پھڑیائے- بس چلی اے- لگائے ڈِگ پینائے- میں اندر دھسن دی کیتی اے- اندروں ہتھ اِک مینوں تھمدائے- ہولی ہولی بِھیڑ گھٹی اے- بہن دی کُجھ تھاں نکلی اے، میں بیٹھاں اڑ پھس کے- نالدا اُٹھ گیائے اگلے سٹاپ تے- میں کُھلا ہویاں اک ادھکڑ نال بیٹھن لئی اُڑیائے- دِل کیتائے ایہنوں تھاں نہ دیواں - اوس ہتھ میرے موڈھے دھریا- اوہا ہتھ اے جِس مینوں تھمیا- میں شرمندہ، بھیڑا پے کے اوہنوں تھاں دِتی اے- دِل وچ ٹھنڈ جیہی پئی اے- لگائے ہُن ہر کِسے لئی تھاں ہے میرے کول-
واپس گھر پہنچیاں دفتروں - نِکی کول آئی اے- دسو کِنواں نمبر آیائے میرا- میں آکھیائے دسواں - ہسی اے- اٹھواں - میں پیار کیتائے- سویر ہار مُڑ چُپ جیہی ہو گئی اے- ''کیہ گل اے''- آہندی اے: ''جَولی فیل ہو گئی اے- کوئی اوہدے نال کھیڈدی نہیں ہُن- مینوں وی اِک نے آکھیائے رہن دے ایہنوں نالائق نُوں - جَولی آہندی اے مینوں سکول ایہہ چھڈنا پینائے-''