تُوں آکھیں
پھُل سروور ہے
ویکھو دوہری کھیڑ ایہدی
لہر اندر ول لہر باہر ول
باہر پسارا پتیاں دا ہے
رنگ سگندھل اندر اُتارا
باہر چنبہ الف ہو جاوے1
اندر بُوٹی مُشک مچاوے
گُھنگھٹ دے پٹ کُھلن سجن دا اندر لہن ہے
میں آکھاں
آکھن تینڈا مینڈا سُنن ہے
1- سلطان باہُو
الف اللہ چنبے دی بُوٹی مُرشد من وِچ لائی ہو
نفی اثبات دا پانی مِلیوس ہر رگے ہر جائی ہو
اندر بُوٹی مُشک مچایا جاں پھُلاں پر آئی ہو
چِر جُگ جیوے مُرشد باہو جیں بُوٹی من لائی ہو