پچُھیا تُساں جو شونکی چونکی خِلجی کلیجی بُرجُو
’بُلبل دیسی دا تے پتہ اے سانوں
ایہہ بُلبل شُلبل کوئی نہیں
تُساں دسو نا بھاء شپیا
اصلا ایہدا کیہ اے‘،
میئیں گنڈوئے دی زیارت بن گئی میرے لئی،
جا پایا میں ایہا سوال
بیٹھے برانڈے وِچ مسالہ کوئی بنیندے سن پئے مِیئیں ہوریں
جڑھاں پتر بی جوڑ،
بس اِک واری
چھئیں مہینیں اِکو واری
ساج مسالہ ونڈ دیندے نیں لوڑ ونداں نوں،
میری گل سُن کم چھڈ بیٹھے نیں
پندراں مِنٹ لا واج ماری نیں مُونہہ بھُوا
’آ برساتو ویکھ باہر کون آیا ای
پچُھدا پیا ای تیری سکھی دا اصلا،
سُکّا چھپڑ نال لیایا ای
ورھ جھٹ تر کر نا‘
سِر کڈھ باہر تکیو سو ماسی برساتی
پندراں مِنٹ لا تُرت میرے نال لگ کھلی اے
’سُن لئی اے میں تیری شپچُو
اوہ کندھ تے ویکھ نا کون بیٹھی او‘،
میں ویکھناں دیسی بُلبل
کندھ بنیرے بیٹھی اے جَوکی کیپ چڑھائی،
’رکھی ہوئی اے تُساں ایہہ ماسی؟‘
’میری سہیلی اے
دس نا، ایہدے کولوں تُوں کِنیاں غزلاں سُنیاں نیں اقبال دِیاں
بِھیم پلاسی راگ وِچ،
جان میری، ایہہ بُلبلا کوئی نہیں‘
لؤ جی، لک نال بنھ دوپٹہ ماسی پائی اے پھیر دھمال کوئی
کیہ دساں،
پنج مِنٹ لا پیر اِک چایائے
پنج مِنٹ لا ہتھ گھمایائے،
’وے اڑیا میں کال چِڑی
اُڈن کھٹولا نہیوں میں
وِچ بہا شہزادِیاں دو اسمانیں سَیل کراواں،
میں آں اُڈن پہاڑ
پڑھو پہاڑا میرا،
کِنیاں رِزماں نال جُڑے نیں کھمب میرے
کِنیاں ہلناں گھڑیا اے جُسہ ایہہ میرا
کِنے سمندر نھا ایہہ سُچا ہویا اے،
کالی سِری اے پُوچھ وی کالی
گُجھ نابری لال لُکائی بیٹھی آں
صدیاں دی سُجھ سُجھائی اے، میرے جاون انگ تے لائی اے،
میں آں اُڈن پہاڑ وے اڑیا
نَر ہوون دا ہاں اِنکار
میریاں تھناں چوں دھن پگھرے
ڈھل تھیوے دریا،
سٹ چِڑیاں 1 دے آہلنے
کر دینے نی ساڑ سواہ
قلعے فصیلاں گنبد محل منارے ایہناں دے
کھمب چُھہا
میں ہوا کر دینے نی‘
کن ماسی برساتی ول نیں میرے شونکی
اکھیں نیں کندھ بنیرے تے،
اونویں بیٹھی اے اوہ ساہمنے
خبرے کھیڈیندی اے چُپ حال پئی،
ادھا گھنٹہ لا دھمال مُکائی اے ماسی برساتی،
جَھٹ اِک پُوچھل چاء
کال چوں لال وِکھاء
اوہ اُڈ گئی اے
1- چِڑیاں = چِڑے-