]شہر وچ کمیٹی دا ہائی سکول اے- پنجویں توں دسویں تیکر پڑھائی اُتھائیں تھیندی اے- پہلیاں چار جماتاں پڑھاون لئی وکھ وکھ محلیاں وچ برانچاں نیں - شہر دی فصیل دوالے پِھردی گول سڑک اُتے وی ہے اِک جیہڑی مین برانچ اکھویندی اے- گول سڑک توں اگے پِنڈ نیں - بُہتے چھوہر ایتھے پِنڈاں توں ای آؤندے نیں کچے پاہے لنگھ کے- تِن کمرے نیں تے وچکار ویڑھا- کِسے چھوٹے سرکاری افسر دی پُرانی کوٹھی اے ایہہ- کمیٹی نے کرائے تے لئی ہوئی اے- کچی پکّی پِچھلے برانڈے وچ نیں - دُوجی دا فرش کچا اے تیجی چوتھی دے پکے- مُنڈے بوریاں نال لیاوندے نیں اپنے بہن لئی- دُوجی دا ماسٹر دِین اے- پُورا ناں خبرے کیہ سُو، ماسٹر دِین ای اوہنوں آکھدے نیں سبھ- وڈے سکول وچ بَینڈ ماسٹر اے- اجکل بَینڈ کِسے وجہ توں بند اے تے ماسٹر دِین ایتھے آ گیا اے- ویہہ چھوہر نیں کچے فرش تے- پتلا کالا ماسٹر دِین، پتلون کوٹ وچ- سِر تے پگ خاکی اُچے طُرّے والی-[
ماسٹر دِین: کیوں وائی جوانو کیہ صلاح اے اج- پہاڑا نہ پڑھ ویکھیے دُونی دا، ہیں؟ (مُنڈیاں سِریاں ہلائیاں نیں)
لؤ جی، برکت دُونی دُونی دو دُونی چار
(دوئے بانہاں چا کے ناچ رُوپ وچ ہل کے گنویا اے دِین- سَینتر نال مُنڈیاں نوں وی اُٹھایا اے- سارے ہل نچ کے گاون وچ رل گئے نیں)-
چھوہر: برکت دُونی دُونی دو دُونی چار
دِین: بھڑتھا بتاؤں دا میں کھانا جے
نہیں دھرنا میں روٹی تے اچار
چھوہر: (ہس ہس نچدے) نہیں دھرنا میں روٹی تے اچار
برکت دُونی دُونی دو دُونی چار
دِین: تِن دُونی چھی اے چار دُونی اٹھ
چھوہر: تِن دُونی چھی اے چار دُونی اٹھ
دِین: نہیں بھڑتھا جیہنے کھانا کھوانا اوہ گھر جاوے نٹھ
چھوہر: اوہ گھر جاوے نٹھ
تن دُونی چھی اے چار دُونی اٹھ
دِین: پنجو دُونی دس چھیو دُونی باراں
بھڑتھا کھاؤ تے پڑھو اخباراں
چھوہر: پڑھو اخباراں پڑھو اخباراں
پنجو دُونی دس چھیؤ دُونی باراں
دِین: ستو دُونی چوداں اٹھو دُونی سولاں
بھڑتھا لگے جیبھ میری نوں اگلے بھیت میں کھولاں
چھوہر: اگلے بھیت میں کھولاں
ستو دُونی چوداں اٹھو دُونی سولاں
دِین: نوں دُونی اٹھاراں دس دُونا وِیہہ اے
رل پچُھیئے ہُن اِک دُوج نوں بھڑتھا ہوندا کیہ اے
چھوہر: بھڑتھا ہوندا کیہ اے دسّو بھڑتھا ہوندا کیہ اے
نَوں دُونی اٹھاراں دس دُونا وِیہہ اے
دِین: بھڑتھا دوہاں رل کھانا اے
تاں تِن دا پہاڑا آونا اے
چھوہر: بھڑتھا دوہاں رل کھانا اے آہو بھڑتھا دوہاں رل کھانا اے
تاں تِن دا پہاڑا آنا اے
دِین: برکت دُونی دُونی دو دُونی چار
چھوہر: برکت دُونی دُونی دو دُونی چار
دِین: بہہ جائیے ہُن- (چھوہر آپو اپنی تھاں تے بہہ گئے نیں)
سارے بتُونے رلی بیٹھے آں - پتہ نہیں آوندا وی ہے کِسے نوں بھڑتھا بتاؤں دا بناونا-
(اِک چھوہر اٹھاں دساں دا، نِکی جیہی پگ تے ہتھ نِکا جیہا کڑا- اُٹھ کے اگیرے ہویا اے)
چھوہر: جی آوندائے
دِین: بلّے- ناں تے دسو-
چھوہر: جی بِیر سِنگھ
دِین: دسو بِیر جی کیویں بنائیے
بِیر چھوہر: ٹویا کڈھنے آں پہلوں
دِین: کِتھے
بِیر: (تھاں ویکھ کے) ایتھے
دِین: پھیر؟
بِیر: پھیر ایتھے اگ بال لینے آں - بتاؤں ٹوئے وچ دھرنے آں بھُبھل وچ ولھیٹ کے- بتاؤں پک جانائے، اسیں کڈھ کے پھیہہ لینائے، پھیہہ کے وچ لُون مسالہ رلا لینائے
دِین: واری اوئے بِیریا- چلو ویکھنے آں بتاؤں کدھروں آؤندائے
بِیر: میرے نال ای آونائے جی اوہنے دو دُونی چار ہو کے
(ہور چھوہر نور اگیرے ہویائے)
نور: میں آں جی نُور- اسیں کٹھے آونائے، اِکو پِنڈ اے- لُون مسالہ میں لیاونائے-
(لچھمن نِکلیائے)
لچھمن: رنبی وی آ جاسی ٹوئے کیتے
دِین: اوسے پِنڈوں؟
لچھمن: نہیں جی ساڈا پِنڈ ہور پاسے- پر راہ مِل جاندے نیں اگوں -
بِیر: ایہہ لچھمن اے جی-
دِین: لؤ جی نور بِیر تے لچھمن راج- ہو گیا ساڈا کاج- تِیلی ہے میرے کول-
سو بھڑتھا کل تیار- ہیں جی؟
چھوہر: بھڑتھا کل تیار آہو جی بھڑتھا کل تیار- برکت دُونی دُونی دو دُونی چار
(اوہلا)
]بِیر سِنگھ دا گھر- کچا کوٹھا- کچا ویڑھا- پنجِیاں ترِیہاں دی ماں پرِیتو چُلھے اگے بیٹھی اے- بِیر سِنگھ آیائے- بستا دھریوس-[
بِیر: (نچ کے) برکت دُونی دو دُونی چار
(پریتو ہسدی اُٹھ آ کول کھلوتی اے)
بِیر: بھڑتھا بتاؤں دا میں کھانا جے
نہیں دھرنا میں روٹی تے اچار
برکت دُونی دُونی دو دُونی چار
پریتو: (ہسدی اے نچ کے) برکت دُونی دُونی دو دُونی چار
بِیر: اج ایہہ پہاڑا پڑھیا ای پِیتو ماں اسیں سکُولے
پریتو: نچ نچ کے؟
بِیر: آہو
پریتو: ماسٹر کِتھے سی
بِیر: اوسے تے پڑھایا اے- گنویا نچیا اے نال-
پریتو: چنگا ماسٹر اے- کیہ ناں سُو-
بِیر: دِین
پریتو: تانہیوں
بِیر: کون ہوندے نیں پِیتو ماں ایہہ دِین
پریتو: ککھوں ہَولے، اصلوں غریب
بِیر: ماسٹر دِین تے چنگا سُکھالا جاپدا اے- کوٹ پتلون اُتے پگ، لمّا طُرلا-
پریتو: اندروں دِین ای بِیرُو
سُنے تے ہوئے نیں بول توں کبیر جی دے گرو گرنتھ صاحب کولوں
بِیر: کیہڑے؟
پریتو: اوہا (گا کے) سُورا سُور پہچانیئے جو لڑے دِین کے ہیت
پُرجا پُرجا کَٹ مرے کبہو نہ چھاڈے کھیت
بِیر: پر ماسٹر دِین تے مسلمان لگدا اے
پریتو: بابے دو تے کیتے کوئی نہیں ہندو مسلمان- پہلی گل ای ایہو آکھی ہئی:
نہ ہم ہندو نہ مسلمان
بِیر: ٹھیک اے ہم تے سِکھ ہوئے کہ
پریتو: آہو- سِکھ، سِکھیار
بِیر: سِکھ سِکھ دا یار
پریتو: سِکھیار سِکھن ہار
بِیر: گل ہوئی نہ- سِکھنی ہار جائے سِکھ نہیں ہاردا
پریتو: ہارنا میں وی نہیوں - سِکھنہار، سِکھن والا- تُسیں سارے جماتی سِکھ ای او کہ- ہندو ہوو یا مسلمان سِکھن لئی سکُولے جو پئے او-
بِیر: (سوچیں پیا اے) پِیتو ماں ایہہ بھوئیں وچ کیوں گڈنے پیندے نیں ٹویا کڈھ کے بتاؤں بھڑتھے لئی-
پریتو: اُگ کے اوتھوں جو آئے نیں - بھوئیں کول نِگھ ہوندا ای- سیوندی او بتاؤاں نوں - جیویں کُکڑی نہیں ساڈی آنڈے سیوندی چُوچے بناون لئی-
بِیر: پہاڑے تے پڑھدی ہوئی ایہہ بھوئیں ایس کم لئی- خبرے نچدی کیہڑے ویلے اے-
پریتو: ہر ویلے (بِیر دے ہتھ پھڑ کِکلی پاوندی اے) برکت دُونی دُونی دو دُونی چار-
بِیر: ماسٹر دِین وی اصلوں تیرے ہار اے- پگ ہووے نا سر تے تے سمجھو تُوں ای پڑھاؤنی پئی ایں ساڈی جمات نوں -
]بِیر دا پیو بِشن سِنگھ آیائے- پنجھیاں تریہاں دا اے اوہ وی[
بِشن: کیہنوں پڑھاون ٹورنی او ماں
بِیر: نہیں باوا میں تے ماسٹر دِین دی پیا دسدا ساں ایہنوں
بِشن: کیہ پڑھ کے آیائیں اوہدے کولوں اج-
بِیر: پہاڑا دُونی دا-
بِشن: سُنا
(بِیر چُپ کھلوتا اے)
پریتو: سُنانا بِیرو جیویں مینوں سُنایا ای-
بِیر: میں کُٹ نہیں کھانی-
پریتو: چل تیرے وارے دی میں کھا لؤں - سُنا تُوں
بِیر: نہ- تُوں کیوں کھاویں
بِشن: سُنا سُنا بِیر سِنگھا، سکُولے سِکھیا ای پہاڑا، ٹھیک اے تے کُٹ کاہدی-
بِیر: ٹھیک نہیں نا باوا جی- سکُولے ہور ماسٹر اِنج تے نہیں نہ پڑھاوندے پہاڑا-
بِشن: ہلا وئی- پھیر تے اساں سُن کے چھڈنا ای بِیریا-
بِیر: (نچیائے) برکت دُونی دُونی دو دُونی چار
بھڑتھا بتاؤں دا میں کھانا جے
نہیں دھرنا میں روٹی تے اچار
برکت دُونی دُونی دو دُونی چار
بِشن: (ہاسا گُھٹدائے) لؤ جی- گھر ماں مراسن تے سکُولے ماسٹر مراسی- پُت میریا تُوں تے ہل واہنا اے- اَٹھ پڑھ کے فوج وچ جانا اے- وردی پاونی اے، رفل چلانی اے- جنگاں لڑ کے افسر ہونا اے- رقبے لے کے گھر آونا اے- ماسٹر تیرے نوں تے بھڑتھو پیا ہویا اے بھڑتھے دا- پڑھاؤنا کیہ اے تینوں اوہنے-
بِیر: باوا جی اگے وی ہے پہاڑا
بِشن: سُن لینے آں اوہ وی- چھنّا لسی دا پھڑا مینوں –
پریتو: میں دینی آں لسی- توں سُن بِیرُو دی- (بِیر نوں سینت)
بِیر: پڑھاں باوا جی؟
بِشن: چل مُکا یار-
بِیر: (نچیا اے) پنجو دُونی دس چھیؤ دُونی باراں
بھڑتھا کھاؤ تے پڑھو اخباراں
پریتو: (چھنّا دے کے) لسّی پِیو تے لؤ بہاراں
بِیر: لؤ بہاراں لؤ بہاراں،
پنجو دُونی دس چھیؤ دُونی باراں
بِشن: (چھنّا رکھ دیندا اے ہسدا) واہ واہ بریک سُرت جاپدی اے وائی ماسٹر تیرے دی- بھولا بھُکھا نہیں، بھڑتھے وچ کُجھ ہور کھواؤ اے- پریتو بھڑتھا بنا ای گھل سویرے بِیرے ہتھ-
بِیر: ماسٹر جی نے تے جماعت وچ بھڑتھا بنوانا اے ساتھوں -
بِشن: جماعت وچ؟ ٹویا کڈھواؤ اے تہاتھوں اوتھے- ہوں - مراسی نہیوں پریتو ایہہ تے کوئی جٹ ای بھیتلا-
پریتو: بھیتی جاپدائے تیرے بھانگڑے دا
بِشن: ساڈا بھانگڑا تے میلیاں جوگا ای اے-
پریتو: جے میلا ای ہوے ہر ویلے تاں؟
بِشن: ہر ویلے- ہاہ- اوہ ویلا-
پریتو: آ وی سکدائے، بِشنُو-
بِشن: کِتھوں
پریتو: اِتھاؤں ای- جے پُتر پڑھا تُساں جنگاں لڑن تے نہ لائی جاؤ-
بِشن: کیہڑے پاسے پئی ٹورنی ایں
پریتو: کیہڑے
بِشن: جگ دا اُلٹاء ای اوس پاسے- نواں اُسار وساون جیویں دس گئے نیں اگلے نچ گاوندے
پریتو: تاں ٹورو نا پُتر اوس پاسے
بِشن: کیہ کرئیے- بھُکھ دی ڈَین کھلوتی اے راہ وچ- کئیں پئے اوس پندھ- وِرلا ای پرتیا ای سگواں - تے جگ اوتھے دا اوتھے سگوں ودھیرے چوَڑ-
پریتو: جیوندا تے اوہا ای اے جیہڑا اوس راہے پیا- ساہ تے اُتھاں ای آوندا اے سُچا-
بِشن: آہنی تے سچ ایں پئی- ویہنے آں پئے اُتوں بھرتی دے بورے پئے بھریندے نیں، ہیٹھو ہیٹھ ایہہ غدری بابے گھر گھر بوہڑ پئے ٹوہندے نیں نویاں جِیاں نوں - ڈھیر ولائے نیں میرے جیہیاں - پھڑے ٹنگے وی گئے نیں، نہیں پر ٹلدے
پریتو: سچ ٹل جاوے تے نہ آد نہ جُگاد
بِشن: تیرا تے مُونہہ رہیا ای اوس پاسے- میرا نہیں ہویا کدے- پر عجیب گل اے- جِنا تُوں اُلرنی ایں اودھر- اونا ای میرے دِل تے ہتھ ودھیرے پیندا ای تیرا- خبرے کیوں - (بِیر ول ہویائے)
کِنے بتاؤں آکھے نیں ماسٹرہوراں بِیرُو-
بِیر: چار
بِشن: کِنے جی او جماعت وچ تُسیں
بِیر: وِیہہ
بِشن: اٹھ لے جائیں
بِیر: ماسٹر جی وی آکھیا سی سمان نال لیاویں چار دُونی اَٹھ کر کے
بِشن: (بھانگڑے دے رنگ وچ)
آہا- پور نویلا بی- جی او جٹا جی، آہا، جی او جٹا جی-
پریتو: نِرا جٹ؟ کیویں گاوندائے پُتر تیرا جے اندر نہیں مردانہ ایہدے
بِشن: تے پھیر کون ہوئے اسیں
پریتو: جو سارے نیں
بِشن: اِکو کُجھ تے نہیں نہ سارے
پریتو: ہوون اِکو کُجھ تاں پتہ لگے نا کون آں اسیں
بِشن: اوسے پاسے پریتو، تُوں اوسے پاسے
(اوہلا)
]سکول- دُوجی جمات- ماسٹر دِین آیائے- چھوہراں نوں ویکھیاسُ-[
دِین: واہ اج تے سارے حاضر جمات آں - آوے پہاڑا؟ نہ سچ- اج تے تہاڈی واری اے مینوں پڑھاونا اے تُسیں کہ-
سارے: (نچ پئے نیں) برکت دُونی دُونی دو دُونی چار-
بِیر: ساریاں بھڑتھا بتاؤں دا کھانا اے
کِسے نہیں دھرنا روٹی اچار
دِین: (نچدیاں) جیؤ اوئے بِیرو کِتھے بتاؤں نی ساڈے یار
بِیر: چار دُونی اوہ اٹھ ہوئے نیں
اساں جو ہوئے دس دُونا وِیہہ
وِیہہ اِک اِکیہ اسیں تُسیں
(نچ کے) پہاڑا مُڑ پڑھیئے
کڈھیئے ٹوئے دو، بتاؤں چار چار کر دھرئیے
دِین: آہا- رلو اوئے نوریا، لچھمنیا، سدو رنبیاں
نور تے لچھمن: آ گئیاں جی آ گئیاں
]دوئے ٹوئے کڈھیندے نیں - اِک ہور جی اُٹھ کے مٹی سلھدا اے- اِک ہور پَتر تِیلے دھریندا اے- دِین تیلی لائی اے-[
دِین: (پتر تِیلے دھرن والے نوں) پھڑ توں جِیتیا ایہہ دھیلی- آنے دِیاں دو نیں خمیریاں - پنجو دُونی دس لوا بابے شِیپھے دے تندُوروں - میرا دسیں تے یارھویں لوا لیاویں -
]جِیتے دھیلی پھڑی اے ٹُر گیا اے[
دِین: پڑھاؤ نا وئی مینوں -
سارے: برکت دُونی دُونی دو دُونی چار-
دِین: برکت دُونی دُونی دو دُونی چار-
اِک جی: ساریاں رل کے بھڑتھا بنایائے، کیوں دھرے کوئی روٹی اچار
دِین: ہاں جی کیوں دھرے کوئی روٹی اچار
سارے: تِن دُونی چھی اے چار دُونی اَٹھ
بِیر: اگ بھُجا کے بھُبھل کرئیے
اٹھے بتاؤں ولھیٹ کے دھرئیے
دِین: آہو یارو بھُبھل دھرئیے
بِیر: گرما گرم لوا خمیری جیتیا آویں نٹھ
دِین: بھلا او جیتیا آویں نٹھ
تِن دُونی چھی اے چار دُونی اَٹھ
]جیتا- روٹیاں چائی آیائے- بابا شِیپھا وی نال اے- ستراں دے گیڑ وچ- چِٹا تے لال- چِھیٹکا، مُونہہ مُسکان- کالی فتوہی، لال لکدی، سِر تے نیلا پٹکا- ہتھ وچ مِٹی دی ہانڈی، وچ ڈھیر ساری بھُبھل- دِین ہانڈی پھڑی اے، بابے شیپھے دے گوڈے ہتھ لایا سُ- تے بھُبھل دوہاں ٹویاں وچ کیر دِتی سو-[
بابا شِیپھا: روٹیاں گِن لؤ ماسٹر جی یاراں - ایہہ لؤ رکھو اٹھیانی- ]فتوہی چوں کڈھ کے[
دِین: (پھڑ کے) نہیں بھا شِیپھیا اساں تے مُفت دی نہیوں کھانی- رکھ اٹھیانی- ڈھائی آنے سانوں موڑ دے-
بابا شِیپھا: نہیں او چنّا- چھوہر تیرے جیویں پہاڑا پڑھیائے تندُور تے جی بہوں راضی ہویا ای- پچُھیا اے میں ایہہ گاون نچن کِتھوں سِکھ رلایو ای وچ- اکھے میں کلا تے نہیں بابا- ماسٹر جی ایویں ای پڑھایا اے- رل پڑھیائے اساں ساریاں - پھیر آہندائے تُوں وی تے نال ایں بابا ساڈے، نچ کے روٹی لاونائیں، وچ تندُور دے ڈھول وجاونائیں - بس مُل مِل گیائے میری لائی دا
سچ نچو تے رل کھاؤ سارے
]پھُمنی پاوندا بابا شِیپھا نِکل گیا اے- ہانڈی پھڑ کے جِیتا وی نچدا مگر گیا اے[
سارے: پنجو دُونی دس چھیؤ دُونی باراں
لچھمن: کڈھ سچیاں اساں پڑھنیاں نیں اخباراں
سارے: پڑھنیاں نیں سچیاں - کڈھنیاں نیں اخباراں
]ٹپدا نچدا جِیتا وی آ رلیا اے[
سارے: ستو دُونی چوداں اَٹھو دُونی سولاں
بِیر: رل بنایا بھڑتھا آکھے بھیت میں سارے کھولاں - اگا پِچھا پھولاں
سارے: بھیت میں سارے کھولاں
نَوں دُونی اٹھاراں دس دُونا وِیہہ اے
جِیتا: بھیت تے سانوں لبھ گیا اے، اگوں کرنا کیہ اے
سارے: اگوں کرنا کیہ اے آہو، اگوں کرنا کیہ اے
(اوہلا)
-----