اَدھ بھادرا گھنیئر وسیائے
نِکو آہندی اے ترے دیہہ ہوئے نیں سورج پَھسیائے
کل تائیں وَٹ ہا اج تے ٹھنڈ پئی لگدی اے
کمپنی باگ دِیاں ست بتکاں
کالے چوندے تنبو تھلے
چِٹیاں پراں وِچ سِریاں دے کے
چِھجیا چِھجیا ہار جیہا بن پئیاں نیں
بتکاں دی ٹھنڈ ساڈی ٹھنڈ تے ہونی نہیں پر، نِکو آہندی اے
خبرے اج بُکلاں وِچ جُھردیاں ہوون
''اساں رکھن والیاں دیاں رکھیلاں ہوئیاں کیوں''
پر جُھرن ایہناں دا ساڈا جُھرن تے ہونا نہیں
خبرے اُگھ سُگھ تھی گئی ہووے
ڈگن ہاریاں چھتاں دے ہیٹھاں سُتیاں دی
پر بتکاں کوئی دُکھ ساڈے وانگ تے رونا نہیں، نکو آہندی اے
ایہہ مِٹی پانی واء ترونہہ وِچ رہیاں نیں
مٹی نال تے ٹُریاں رَمکے
واء پانی نال رَلیاں اُڈ تَر گئیاں نیں
اَج اَدھ بھادریں مِٹی پانی واء کیہ گل رَل کرن پئے
نِکو آہندی اے اوہ متے بتکاں سُندیاں ہوون