مائی بھینا
سرور سو جو اپروں ورھیا تھلیوں سریا
آکھے خضر ورُن1 کوئی آکھے
کہن پرہائیں پانی
آئیاں مائیاں
چاٹی دھرت اگاس دی ڈاہی
واء نیترا بھا مدھانی
ناؤں جاگ دھن رِڑکن والیاں مکھن خلق دا آیا
سروَر2 امرت لسی کر بھوئیں ہیٹھوں ہیٹھ وگایا
پتر مائیاں دے ہوئے سیانے
وت اوہ ویلا آیا
مٹ میں دے کاڑھ چڑھائے اوہناں
بھوئیں بھانڈا وکھرایا
سَنجھ مائیاں نوں ڈاہیا منجے سرگھی مانجن لایا
اپر سمندر ہیٹھ جلندھر
بھوئیں نَیِئیں دے سائیں تھی گئے دَینت سدائے
اپر والے ہیٹھ والے نوں سد وگایا
میں سمندر پیو توں پُتر جلندھر وارث مینڈا
پٹ ہیٹھ میں مونہدی ڈھائی گنگا تینڈڑی مائی
کہے جلندھر ابا آپنے اندر رہ
مت پیر توں پربت پایا
ویکھ میں گبھرو تھی گیاں ہُن
لما پواں تاں سیس شوالک پیر مینڈے ملتانے
وت اوہ ویلا آیا
لاکھیاں دَینتاں نوں
پاروں بگے دیوتے ٹکرے
مائیاں اوہناں نپ وِیاہیاں
حق ولیمہ کر کے دَینت کرائے بھرتی
وردِیاں ہور پوائیاں
روہ مائیاں دا بھا تھیا وت، پانی وِچ سمایا
مینڈی مائی بھینا
جائیاں تُساں دیاں
سرور سخی دی پُھمنی کِھڈاون اج نہالا آیا
سرور رنگ رنگیا
چِھٹ چَھٹا اساں وی منگیا
سرور من تن توں
جیویں ساڈے بول نیں ہوا
جیویں ساڈے کپڑے نیں رُوں
جِئیاں اندر جِند ہوویں توں
تیں وِچ میں نہ توں
نِت کجیا نِت ننگیا سرور رنگ رنگیا
چِھٹ چَھٹا اساں وی منگیا
وَگیاں
سنگ تینڈے رَل پئیاں
نکل جلندھر اُدھل دھرونکل سودھ نگاہے گئیاں
سنگ سنگ رِسنائی ہڑھ ہو چڑھائیں
چڑھیاں توں لہنائیں لتھیاں نوں بھرنائیں
ہک کر ٹوئے ٹِبڑے
دُھپے لِبیڑیں دھوویں لِبڑے
چَنگ مَندیا مَند چنگیا سرور رنگ رنگیا
چِھٹ چَھٹا اساں وی منگیا
مُوت اچُھوت ہو گنگ جَل تھیویں
ودھے سو تینڈڑی ویل
سُپن سراب وی جاگ تریل وی
آپ نکھیڑا میل
آپنیاں کنیاں کانگ بناویں
آپ کِھڈاویں آپ بِھڑاویں
جوڑ نہ توڑ توں سَنگیا
سرور رنگ رنگیا
چِھٹ چَھٹا اساں وی منگیا
1- ورُن: پانی دیوتا- 2- سروَر: دیسی لفظ دا مطلب ہے پانی، پرانی شاعری وِچ عام آیا ہے ''سرور پنکھی ہیکڑو پھاہی وال پچاس'' (بابا فرید) ''ڈھنڈ پرانی کُتیاں لکی سرور مانہہ دُھتیاسے'' (مادھو لال حسین) سخی سرور دا کہان جاپدا اے مُڈھوں پانی دا کہان ہا جیہڑا قدیمی پانی پُوجا توں ٹُریا- (پُوجا طلب ہے، آس ہے) سخی سرور دے سنگ جلندھروں ٹُر کے نگاہے ویندے آہن تے راہ وچ پانی والیاں تھاواں تے ٹھہردے آہن- ویلے دی دُھوڑ وِچ جاپدا اے پُران کہان دا رنگ وٹ گیا- نہالا انھویں صدی دا پرھائیں اے- اوہنوں اصل پرانی گل چیتے اے سو اوویں سنیند اے- جلندھر دا وی اِک پُران کہان ہے جیہڑا جلندھر گینرٹیئر وِچ دِتا ہویا اے- جلندھر اِک دینت دا ناں ہے جیہڑا سمندر دا پُتر ہے مائی گنگا وِچوں - سمندر پہلوں شوالک دِیاں پہاڑیاں تیکر ہا- جلندھر وڈا ہویا تے سمندر نے بہت ساری زمین اوہدے لئی ویہلی کر دِتی تے آپ پچھانہہ ہٹ گیا- ایہہ کہان وی قدیمی پانی پوجا دا انگ جاپدا اے-