صاحبی کیویں بُھلے
نکی جیہی نوں مینوں اوس سنبھالیا ہئی
مُڑ بال میرے اوس پالے
ساد مرادی بے زبان
آپنی اوس سنائی کدے نہ نہ میں پُچھی
میری تے اوہ جاندی ہئی یا مُڑ پاپا
میں پاپا دی دھی نہیں ساں سردار تیج سنگھ اشک ہوراں دی
اصفہان میں جمی
پیو میرا ایرانی،
ماں مصری رنگ نین نقش افریقی
میں پیو تے ہاں
ویکھن وِچ تے چِھٹ نہیں ماں دی
پنجویں ورھے وِچ ساں اوہ ٹُر گئی
میرا پیو بہائی مشنری، ہندوستان وی آوندا ہئی
پاپا پہلوں برہمو سماجی ہوئے
میرے پیو نوں ملے بہائی ہو گئے
آہدے ہَن ایہہ جستجوئے حق سی بیٹا
عمر پکیری
دو ویاہ اوہناں کیتے پر اولاد نہ ہوئی، چھڈے
میرے پیو آکھیا
ایہہ دھی سردار میں تینوں دِتی
وڈی کر لے مشن دا کم کرے پنجاب دے اندر
مینوں پچھیوس لہور توں رہسیں
پیو دا مونہہ میں ڈٹھا وت سردار دا، آ گئی
کوئی ہُسیڑ نہ کوئی چنتا
پاپا باہر رہن گھر صاحبی ہووے
ماں، سہیلڑی
میری بال فارسی اوہدی جھنگوچی رَل گئی
پاپا مینوں پڑھایا
کونونٹ کنیئرڈ گورنمنٹ کالج
پیار پیار وِچ درس بہائی دیون
نالو نال پر آکھن بیٹا آپ سوچ سمجھ کے منو
میں وی سوچ سمجھ کے منیاں
جو پڑھنا جو سننا رات سنا دینا میں صاحبی نوں
وڈی ہوئی وی اوہدے نال میں سونا
رات ساون دی آہی پِچھلے پہر اوہ اُٹھ کھلوتی
مونہہ پیلا اکھیں ہور ہوئیاں
''صاحبی کیہ ہویائے''
''صاحبی کون ہے
اِدھر توپ ہے صاحباں کی کمز گن بولو
لاٹ صاحب کے دفتروں تھرو بُت ملکاں
جادو گھر گرداوری کھوج کھسرے
چلو برما بصرے میانی کالے پانی
اگے آیا جیہڑا میں بَھرت کرساں
وِک ٹوری آں گھروں تاج ساج بُرخہ
گولے جمساں پلو پل حشر تائیں
گُوٹھے ویکھ مہندی جِتھاں لگن لوا باؤ
تم سردار بھنگی ہم افغان باشے
ترکمان باشے مسلمان باشے
اخبار آود اِدھر دین اسلام پرچار آود
پہلوں بُڈ چنانہہ وِچ مہینوالا وت بَوہڑساں میں
جھنگ چھوڑیا رنگپور چھوڑیا میں
دانا باد وڑ سَنڈھڑی جنج لے کے
سبھ لال ہوسی
پِچھے کال ووہٹی بہسی تیل کھارے
شُما نانکی برہم اسپاہاں اُلّی
سبھ کھادڑا پِیتڑا لاہ لاہا
پاڑ جُلی ڈھا کُلی تے ساڑ گُلی
سَدّے دِلیوں نظام وزیر ہمکو ویہلا پیا ہے تخت اورنگ زیبی
جلسے بیٹھ موچی تقریر بشنو
گُھٹ گُھٹ قرآن تفسیر بشنو
نال اُمت کی نظم دلگیر بشنو
اُٹھ تڑف مسالہ کفگیر نعرے
چُڈھو چَٹ مِرکھائی سہرے بنھ آئیائیں صاحبا گھر والا
گھر مصلن دا عرش مُصلڑے ای
نوٹ پُوجدا پَوڑیاں جا چڑھدا
پُتر جم نظام وزیرئیے نوں
میں عاشق ماں لوہار قصورئیے دی
میڈا جیٹھ آہدائے تینڈا یار آکھے اوہنوں لوک سارا
کنجر چھوہر مُسلا پُلس چاڑِھئیم، مویائے سَردلے مار مَتّھا
میہنا لتھا گُرو کے خالصے دا
واہے واہے بولو
پھوہڑی پاؤ
اُٹھ صاحبی مُصلن جماعت کرا
ووضو بھن ایہناں پیرزادیاں دے
گہنے پون رقبے بیعت بھرتیاں دی
لوئی صُوف لتھے
ننگے تھین گُنبد وہی کھاتیاں دے
مُوہندے مار ڈُھوئے
راتب گھت خطاب رکابیاں وِچ
ٹُم مُحمڈنی میم قصور والی
مِس پھرولاں اینی
جنگی لاٹ سٹیل کی سالی
مینا راجے رسالو کے توتڑے کی
اوہنوں تار پاؤ
ہم نے گُت لمکا کے واڑ لئے نیں قلعے وِچ ہوڈی
غزلیں تول پیا پنج پُھول رانی
سلیمان سلوان دا پتر چِھندا
لُونی دیگ وِچوں پورن چَول چَول
پرا ہونا
دھی کھیڈ سرکپ جوارئیے دا
بولی بُجھنائیں گھوڑیاں چُوہیاں دی
بولی کوکلاں دی سُن لُجھدا نہیں؟
چڑھن چُورمے
لمی راٹھ کوڈی
کمی پَھدن وِینی
بَھتے کھان کراڑ بہہ ویہنیاں تے
تیری سام خدائی دُرگ شاہ مائی
کھبے کھول کھنڈا
اِک نی دَینتڑے دیو تے چِک سارے
آپ تول کنڈا''
بولدی گئی اوہ لفظ داغدی چِت چیتے وِچ میرے
کالج گئی میں، گھر آئی تے اگے صاحبی،
رات جیویں وِچ آئی نہ ہووے
روز وانگ مینوں پُچھے اج کیہ پڑھیائے
''پاڑ جُلی ڈھا کُلی ساڑ گُلی''
''کِس پڑھایائے''
''نویں آئی اے اِک سمندر پاروں''
''ویکھو کمی'' روز وانگ پئی بھولے بھا اوہ ہسّے
اِک دِن پاپا آکھن لگے
''رزلٹ تہاڈا بیٹا جی ہن آون والائے
تسیں مِشن دا کم پلَین کرو''
''جیہناں نال میری رہن سہن دی دُکھ بُھکھ دی سانجھ کوئی نہیں پاپا
اوہ میرا مِشن کیوں منن کیویں منن''
''ایہہ تے کمیونسٹاں دی سوچ اے
تہاڈے کالج وِچ وی ایجنٹ ہین اوہناں دے''
''میں تے سوچ سمجھ کے منی اے
جیویں تساں دسیا ہئی''
''پھیر سوچ لؤ''
''بہوں سوچیائے پاپا ہُن تے کرن دا ویلا اے''
''تسیں اوہناں دا کرنائے ساڈا نہیں''
''میں آپنا کرنائے پاپا''
اوہ مُڑ نہیں میرے نال بولے
فرسٹ کلاس آئی
جتھے کراں ایپلائی اگوں نہ ای آوے
نرسنگ سِکھ لئی
پارٹی ملتان ٹوریا
مشن ہستپال وِچ تھاں لبھ گئی
صاحبی آپنے ساک ڈھونڈ لئے اوتھے
اوہناں نال ای کم صفائی دے لگ گئی
دو مہینے سانوں ہوئے
شِو میرا جماتی کالج دا ملتان آوے
''مِشن نوں خبراں پہنچ گئیاں نیں
آپنا کم پئے کردے نی پاپا''
مینوں فادر فرئیر سدیا
''اُتوں اینی فیئر تے وِچوں اینی ریڈ
آپ استعفا دے دے
اسیں کڈھیے تیرے لئی چنگا نہیں''
مُڑ لہور پارٹی دفتر میں تے صاحبی سوئیے
دنیں بھواں میں
نرساں ٹیچر سٹوڈنٹ ساتھی نویں بناواں
میں تُرٹے جوڑاں مینوں جوڑن تُرٹے
دفتر صاحبی دھو ہونجھ گُنھ رِنھ سِکھاوے مرداں نوں
سن سنتالی
شاہ عالمی اگ لگ گئی
شِو آکھے میرے نال دِلی چل
''نہ ہندو نہ سِکھ میں کیوں جاواں''
''مسلمان وی نہیں توں
پاپا سِکھ نہیں تیرے بہائی نیں
ٹُر گئے نیں کل اوہ وی''
اگلے دن شامیں
کامریڈ درشن نوں کسے نے مار چھڈیا
آہدے رہے اوہ پاکستان دے حق وِچ لکھیائے بولیائے میں
پتلون لاہی چُھری پھیر دِتی
اسیں نکلے صاحبی نال ٹری
شِو آکھے تینوں ایتھے کسے کیہ کہنائے اوتھے خطرہ ای
''میڈی کیہڑی پتلون اے میں اوتھے مذہبن آں''
شِو ہوراں دی مال تے بزنس ہئی سو دِلی مل گئی
مینوں آکھیوس جو توں کردی آئی ایں اوہو کردی رہو
کدیں روکاں پُچھاں چھڈ دئیں مینوں
بچے صاحبی پالے
شِو آکھے جو توں کرنی ایں میں نہیں کر سکدا
ڈروُ بنداں
تیرے کیتے نال پر آپنا آپ رلا کے سوکھا ہو رہناں
توں نہ ہوویں تے خبرے کیہ گند کھاواں
ورھے لنگھدے گئے
کم ودھدے گئے
اوہ ٹرک پھیر ٹینک بناون لگا
چُپ چُپ رہیا کرے
اِک دِن پُچھاں میں تے بول پیا
''جتھے جاناں تیرا ناں کندھ بن جاندائے
میرا خیال نہ کر
سوچ بچیاں دا
بزنس سنسِٹوَ دشمن ہر تھاں
تِلک پیا پھیر اُٹھ نہیں سکنا
ہن کوئی راہ نہیں رہ گیا میرے پرتن دا
سوچ، رحم کر''
دو راتاں جاگدی رہی
تریجی رات میں صاحبی دے اندر گئی اوہدے نال پے گئی
پچھلے پہر اوہ اُٹھی اوہا مونہہ پیلا
اوہا اکھیں ہور
میں کنبدی نوں باہیں گُھٹ گاوے
''پاڑ جُلی ڈھا کُلی تے ساڑ گُلی
ویکھ سرہوں پُھلی اُپر ماڑیاں دے''
سویرے اِک ساتھن دے نال اسیں ونج رہ پئیاں
اگلے سال شِو ٹُر گیا
دل دا دورہ
بچے مینوں نہیں مِلدے
مَرڈرر اَن گریٹفل بِچ 1
سن بیاسی رات وساکھی دی
صاحبی سُتی دنیں نہیں اُٹھی
اَسیاں دی ہئی متاں کہ لکھ چُراسیاں دی
آوا گون دے گیڑے ساڈی ورتن دے
اوہ اندروں مُکت ہئی مُڈھوں کہ اوہدی کرنی ہئی
کروڑاں ورھیاں دی
دل سی آپنے لہور میں آواں
اوہدے جھنگ ونج گل سناواں اوہدی
- قاتل ناشُکری کُتی