مری آیاں سانوں دُوجا دن سی
جان چ ترے دن رہندے سن
اوہ مینوں مال تے مِلیا
''تساں واپسی کس دن جاسو لھور''
''ترونہہ دِناں تائیں''
''اسباب تساڑا میں ای کھڑساں
میں ای چاڑھساں آپوں بس تے
کسے ہوری کی نہ آکھنا''
اوہدے مونہہ متھے تے کالیاں پیلیاں جُھرڑیاں دا جال سی
جیویں نقشے وچ پہاڑ وکھائے جاندے نیں
اُتے بگّے وال سن وِرلے
اوہ میرے نال ہوٹل آیا کمرہ ویکھ گیا
سویرے میں اجے اندرے ای ساں
اوہ پیراں پرنے باہر برانڈے رسی موڈھے رکھی بیٹھا ہویا سی
''اجے چَوتھ اسیں جانائے''
''مِیکی پتہ اے جی مِیں ایویں لنگھنا آ گیاں
تساں پچھیا ای نہ میں کِنج سنجاتائے تساں کی
لھور میں تکیائے دو واریں
اک واریں انگریز نے ٹَیم تے اِک واریں پاکستان نے ٹَیم
میکی لھور نے لوکیں نی چنگی سنجان اے
پنڈی وال کراچی وال پشورئیے سارے بُجھ لَیناں
بَڈے شہر نیں
پر سارے رَل کے وی اِکی لھور جِڈے نہیں بننے
بَڈا شہر اے دو واریں تکیائے میں
ٹیشن لنڈا اکبری میوہ منڈی
بَڈا شہر اے''
میں بیرے نوں کول بُلا کے آکھیا ایہنوں چاء دی پیالی دے دے
آپ میں اُٹھ کے ہیٹھ مال تے آ گیا
اگلے دن سویرے
اُنجے ای موڈھے رسی دھری
پیراں پرنے اوہ برانڈے بیٹھا سی
میں اندروں چاء دی پیالی گھلی
اوس موڑ دِتی
میں باہر آیا تے آکھن لگا
''کیہ آکھسو تساں وی بُڈھڑا روز آ وڑنائے
جانا تساں تے پرسوں اے
میں ایویں لنگھنا آ گیاں
بُڈا شہر اے لھور
دو واریں تکیائے
تساں پُچھیا ای نہ میں لھور گیاں تے کیوں گیاں
ایس بھار سِیں نس کے باتشہو ہور کے
ایہہ دشمن مھاڑا مقدر
شامت گُناہے نی' پچھلے جَرمے نا لیکھا-
دو واریں ایس کَنڈے اُکّا نہ کر چھوڑی
اک واریں انگریز نے ٹَیم تے اک واریں پاکستان نے ٹَیم
میں پتے لکھائی چھوڑناں لھوروں جیہڑا وی آونائے سَیہب کوئی سجن
لکھی چھوڑو تساں وی''
پاٹے کوٹ دے کِھیسے وچوں
ہتھ دی سِیتی نِکّی میلی کاپی کڈھ کے مینوں دِتیوس
دوجے کھیسیوں پوٹا پنسل کڈھ پھڑایوس
خواجے کَھنے سیّد بیدی میئیں بَھلّے شیخ چودھری
دِلّی اکبری میو ایمپرس
شاہ عالمی ڈیوس لارنس
سُوہا کسیرا ماڈل ٹاؤن گلبرگ کینٹ
مساں اک نُکرے میں اپنا پتہ اَڑایا
اوس میرے کولوں دو واریں پڑھوا کے
آپ دوہرایا
''دو واریں جد کَنڈی اُکّا نہ کر چھوڑی اے
تاں میں گیاں
اک واریں انگریز نے ٹَیم
اک واری پاکستان نے ٹَیم
بَڈے بَڈے لوک نیں سبھ نے پتے نیں مھاڑے کنّے
بَڈے دِلے نال ملے نیں مِیکی
بیبیاں آکھنیاں
ساڑے کولے ای رہو تاں بابا
پر ایہہ بھار
ایہہ روگ مھاڑی جندے نا
کوئی پِچھلے کَسر قصور نا دینا
جیہڑا کم کسے دِتائے کیتائے
پر ایہو رسّی گل وچ پئی اے اوڑک
مُڑ میں نسیاں اِتھے آیاں
جے بھار ای مھاڑے متھے لکھیائے
تاں گرمی وچ تے نہ چائی مراں
قَبر تے وطنے بنے نہ ٹھنڈی جائی
کَنڈی دی میں سننا نہ ہا
پر گوڈے ہُن نہیں مننے
کوئی فکر نہیں' تساں کی کوئی تکلیف نہ ہوسی
دو نگ ہوسن تساں نے
تَرے ہوسن' تساں کوئی خیال نہ کریو
بندوبست میں کر گِھنساں
مھاڑا بھنیئا وی اِتھے ای اے مھاڑی سَکّی مسیر نا پُتر
تکڑا جوان اے''
اگلے دن سویرے بدل آ گئے واچھڑ لہہ پئی
میں باہر جان دا خیال بُھلا برانڈے کرسی ڈاہ کے بیٹھا ای ساں
اوہ بِھجدا بِھجدا آ گیا' بوری نچّڑدی
سِر توں لاہ کے باہر ای مینہہ وچ دھر دتیوس
''بابا مینہہ وچ تسیں کیوں آ گئے''
''نہیں مِیں اِتھے آہ کے نال ای
مینہہ مھاڑے جمنے مرنے نال اے میکی کے آکھنائے
ہُن برف وجود نہیں جَرنا سیالا اوکھا لنگھنائے
مُڑے تے پِنڈی جُلی گشنے نیں
مِیں ہُن گش نہ سکناں
بڈا بھار مِیں ڈھویائے پنڈی ٹیشن تے
انگریز نے ٹَیم
پنڈی شہر بے فیض اے
واقف کوئی نہیں بننا
پانی نہیں پُچھنا
مھاڑے اپنے بھرا نیں اُتھے
اک کرنیل اے اک انجینئر
اک سِول نا کم کرنائے سپلائیے نا
بَڈے سوکھے نیں
پڑدادا اک آہ اساں نا
اکی دادے نی اوہ اولاد نیں اکی نی میں آں
مِیں وی کلّا مھاڑا پیو وی کلّا
مِیں کدے اوہناں نیاں بنگلیاں نہ لنگھیا تکیا نہیں کدے
مرنے پرنے اپر گراں وی اشنے نیں
بڈے سوکھے نیں
اِکی پیو نی اولاد آں سَکی آپو آپنا لیکھائے
پڑدادا مھاڑا
ایس پورے پہاڑ نا مالک آسا
جنگل سارا
چِترے پِھرنے
پڑدادے مھاڑے نی مالکی آسی بُن گراں سِیں اَپّر گرجے توڑیں
جنگل سنگھنا
دِنیں بلائیں نچنیاں ٹَپنیاں
پڑدادے مھاڑے اِتھے جناور چارنے
لکڑ گِھننی
انگریز فوج جد چڑھی اے پہاڑے
پڑدادے مھاڑے ڈَکی اے
اتھیار نہ آسے کم نے
چھوی کُہاڑی اودھر توپاں
انگریز آکھیا راجہ لڑ نہ
اساں باتشاہی ہن مار لئی پنجابے نی
اتھے اساں چھاؤنی پانی اے
امبیرے لوکے لئی
ارمان نی جائی بنائی اے
توں ایس پہاڑ نا پٹہ لکھالے نبّے سال نا
جیہڑا پَٹے سِیں پیسہ جُڑسی
اوس نے بنگلے پا کے کرائے چاڑِھیں
ست پیہڑیاں تیریاں پئیاں شکرانہ کرسن
سبھ جنگل کالا
بگھیاڑاں نے اِجّڑ کھیڈنے
پڑدادے مھاڑے آکھیا مِیں گراں نہ چھوڑناں
تساں نے متھے نہ مِیں لگناں سُوراں نے
دادا مھاڑا وی سدھا شودھا
پیو نے نال ای ٹِکیا رہیا
دُوا پُتر ٹُر گیا انگریز کول اپّر
بکری نی سپلائی نا' ککڑی نی سپلائی نا کم گِھنیاس
اُسے نی اُولاد اے ساری
بَڈے سوکھے نیں
فوجے سِولے کوئی کدھرے کوئی کدھرے
اگوں ساک وی سنگے رَجے جُڑے نیں نڈّھیاں نڈِھیاں کی
اِک جرنیل اے' اِک سول آفیسر لگائے بَڈّا
میں نہ جانا کدے کسے ول رب نے کم نیں
بَدّل کَھل گیائے
کل آساں میں
گوڈے دغا پئے کرنے نیں
تساں کی کوئی تکلیف نہ ہوسی کوئی خیال نہ کرنا
بندوبست میں کر گِھنساں کہ سارا''
اوہ اک موڈھے تے رسّی اک تے بوری رکھی ٹُر گیا
سائرہ آکھن لگی تیرے نال ایہنے یاری پرانی کڈھ لئی اے
ہُن ایہنے ایویں مگروں تے نہیں لہنا
بیرا ہسّیا: ''آہ جی ایہناں نا ایہو طریقہ ہونائے
شریف جیہی کوئی سامی تاڑ لئی
کہانیاں پیاں سنائیاں
شریف آدمی لحاظے چ ٹھگیا جانائے''
اگلے دن اوہ پھیر سویرے آ گیا
بیرا آکھن لگا: ''چاچا ساب تے کھانا کھا کے جُلسن
نہ نہ جیڑیلے مرضی نیں جُلن
میں تے نَگ ای تکن آیاں کتنے نیں
نالے بنھنا شنھنا ہوسی نیں کجھ
سائرہ آکھن لگی: نہیں نہیں بنھنا شنھنا کجھ نہیں بابا
بس توں پورے تِن وجے آ جائیں' ہور کوئی کم شم کر آ
میں تھوڑے چِر نوں باہر نکلیا
اوہ ہوٹل دی کندھ نال ڈھو لائی بیٹھا سی
مینوں ویکھ مُسکیا:
''میں آکھیا اِتھے ای بہہ اُڈیکناں
مھاڑا بھنیئا اے سَکّی مسیر نا پُتر اِتھے ای اشنائے
دونہہ بندیاں نابھار ہوسی تے اوہ ونڈ لیسی
نہ ہوسی تے مِیں کلا ای چاساں کوئی فکر نہیں
تکڑا جوان اے رات اساں کٹھے ای رہنے آں اَڈے تے
ٹھیکیدار اے اَڈے نا مالک' اور وی مھاڑے گرائیں نائے
پنجھی تریہہ اساں راتیں اُتھے ٹک رہنے آں
دو رُپیے رات اوہ گِھننائے بندے نا
کدے چاء شا وی دئی چھوڑنائے
مہنگ سماں اے باتشہو
کیہ کرے اوہ ٹَیم پاس تے اوس وی کرنائے شودھے
میں روز گراں ہُن گش نہ سکنا
گوڈے دغا پئے کرنے نیں
راتیں پِچھے جُلاں دیہاڑی گُھسنی اے
پَیلی آہی مھاڑی
پُترے کی دے چھوڑی اے
مَرچاں مُرچاں گڈنائے' گذر ای ہونی اے اُس نی مر کے''
ترے وجے اسیں ہوٹلوں نِکلے
بابا میرے نال نال سی اوہدا بھنیواں ذرا اگیرے
بھنیواں راہ چ اک سکارف بلیزر سوٹی والے گنجے کول کھلو گیا
بابا بھار دے ہیٹھاں اُڑیا نیویں پائی ٹردا آیا
جُلی گشو تُس' آ جُلسی' کوئی فکر نہیں''
اسیں اڈے تے پُجے بھنیواں آ رلیا
''ماما سلام آکھنا ای لالہ سبھناں پچھنا ای''
''سلام ای سلام اے خوشی رہوے
ایہہ کرنیل اے بھراؤ اے مھاڑا دادیوں
آپو آپنا رزق اے' بندہ شودھا کیہ کر سکنائے
بھلا مانس اے بَڈا آفیسر اے
میں کدے متھے لگّا نہیں
جس کی ملنائے' مھاڑا پُچھنائے''
''اُرانہہ کر سمان اوئے' بس پئی جُلنی آ
اِتھے کھل کے کہانیاں جوڑن لگ پینے او راولاں ہار
شریفاں لوکاں کی ٹھگنے لئی''-
اڈے دا سرکاری قُلی
بابے کولوں سمان کھچ کے ہیٹھ دھراون لگا
بابا آہندائے: ''توں چھوڑ مِیں آپوں دھرساں بس تے''
''توں کیہڑے سھاب چ دھرسیں اوئے
ایہہ تیرے پیو اساں کی بنھیائے گانا''؟
سرکاری قلی نے بانہہ تے بدھی لال پٹی تے ہتھ ماریا
سمان کھوہ سرکاری قلی مینوں آکھن لگا:
''ایہہ تساں کُدھروں نپڑ آندائے پَشُو
اِس کی دیو مزوری جُلے ٹَیم برباد پیا کرنائے''
بابے دِیاں جُھرڑیاں وچ اکدم لالی پھر گئی
چور اکھیں اوس میرے ول تکیا
اکھ میرے نال مِلدیاں سار اوہدا جھرڑیاں دا جال
مڑ کے پیلا کالا ہو گیا
ہتھ لمّا کر کے آکھن لگا: ''باؤ جی دے مزوری جُلئے
دس رپیّے بننے نیں دونہاں مزوراں نے
چھے نگ آسے چار بھارے دو ہولے سدھا سھاب اے''