اِک بجُھارت اڑی بیٹھی سی
چِت میرے وِچ بھاء شپیا
نِکیاں ہوندیاں دی،
آر ٹانگاں پار ٹانگاں
وِچ ٹلّم ٹلّیاں
آون کُونجاں دیون بچّے
ندی نھاون چلّیاں،
تُساں تے سُنی ای ہوسی بھاء،
ماسی سرگھی ول کل جا میں پچُھیا اے:
'ایہدی بجُھ تاں ہوئی کُھوہ دِیاں ٹِنڈاں ماسی
پر ایہہ بجُھ تے آپ بجُھارت ہوئی
کِتھے کُھوہ تے کِتھے کُونجاں
کیہ جوڑ اے دوہاں دا،
کُھوہ اندروں تے ڈر جھاتدائے کال پتال دا
ٹِنڈاں تے اگے ہانڈیاں ہوندیاں آہیاں
پکائیاں مِٹی دِیاں،
مالھ ہوندی آہی رسّہ سن دا
گِچیؤں بنھ کے ہانڈیاں کُھوہ دے وِچ لمکیندے آہے اگلے،
ہُن لوہے دا رسّا گِچیاں دوالے کِتلے نظر نہیں آوندا
مالھاں ٹِنڈاں اِک تھی کے سالھاں ہوئیاں نیں کُھوہاں دِیاں،
کُونجاں دا کیہ لاگ ایہناں نال
ڈار اُدھار اُڈیندیاں دا،
ایہہ مثال کیہ ہوئی'،
ماسی سرگھی آہندی اے شَونکی
سد لیاویں نا نُوری نُوں
کٹھے پڑھاؤندے او یونیورسٹی دوئے
'اج تے چُھٹی اے ماسی
گھروں لیاوناں تہاڈا آکھ کے'،
آئی اے نُوری
ماسی سرگھی پیارکے اوہنوں گل تہاڈی کردی اے بھاء:
'پتہ ای نا کیوں شپڑُو میرا گنڈھ دی پُوری تینوں آکھدائے
اِک گنڈھ تے دھوتی پلّے نوں وجدی سی وِچ پیسے دھر کے
اوسے نوں گنڈھ کپ نپدے سن
اوہ کِھیسا ہو اوڑک جیب ہوئی تاں اوہنوں جیب تراش مِلے
دُوجی دھاگہ ترُٹ جاوے تاں اوہنوں مارنی پوندی اے،
پر اِک گنڈھ اوہ وی اے
ترُٹے ٹوٹے دھاگے دے جیہڑی آپوں جُڑ کے مریندے نیں،
تنداں ترُٹیاں
اِکدوجی نوں سیان مُڑ اِک تھی ویندیاں نیں
ایہہ گنڈھ ای جس دی توں ہیں پُوری،
نُور ورھا کے تُدھ فتُور جگاونا اے ایس جہانے
دِھیئے کال دِئیے،
مُڑ گل لا چُم سُنائی اے ماسی سرگھی میری بجُھارت پائی،
'دس نُوری
چِھی مہینے رہ کے آئی ایں
کُھوہ دی جائی میری بھین سجان پورو نال'،
آہندی اے نُوری،
'ایہہ بجُھارت مینوں آپے کھول سُنائی اے ماسی سُجان پور:
'کُونجاں نُورئیے
برفاں جائیاں
ڈار چھوڑ آ بھوئیں تے آنڈے دے اُڈار تھی ویندیاں نیں،
اوہ آنڈے
عام سام نیں دھرت تے واء دی
سیوندیاں نیں رل دوئے
وت آنڈڑ بُوہے کھول
نیئیں ونج دھاوندیاں نیں،
ایہہ کھمبیاں پکھی واسناں وی
ریتڑ تے جم بالڑیاں
ٹوبھیاں اندر ٹُبھی مارن جاوندیاں نیں،
برفاں پربتی
تھلاں دے ٹوبھے،
پانی تے پانی ہویا
کِتے جمیا کِتے پگھریا،
پکھی واسنی ورتن نے کُھوہ ان گالیا جگت سِیر دا کیتائے مینوں
تھل وِچوں ٹُر جس پِنڈاں شہراں وِچ
ٹِنڈاں کھول ورتاونیاں نیں،
تے ہر کوئی ایہناں پکھی واسناں وِچوں
میرے لئی ہے انّھے کُھوہ دا نانگ
جیہنے میں بالڑی وِچ ڈھے پئی نوں سانبھ پالیا
ریتڑ کھوبے وِچوں نتار کے پانی بھیت پیالڑیا
نانگ اوہ میری ٹانگ1 جگت سروور دی
جیہدے وچھوڑے چھڈ لہور نُوں تھل مارُو میں نِکلی
بِھت کھول اپنے اندر وساون اوہنوں سِکدی،
ہُن میں بِین ہو گاونِیاں
ایہناں تھلوچڑ کُونجاں سِکھائے راگ،
تھل دیاں ٹانگاں ول ویندیاں
ڈاچیاں دے گل ٹلّم ٹلیاں
سنگت میری کریندیاں نیں
سُن نُوری دی مَتھے کِھڑی مُسکاروں بولی اے ماسی سرگھی
'کیوں شونکی نُوریا
لنگھ ہُن سُوئی دے نکیوں 2
میریا گنڈھ دیا پُوریا'
1- ٹانگ= 1) دریا دے پتن تے لایا اوہ نشان جیہنوں ساہمنے رکھ کے بیڑی وان تے ترنہار کنڈے ول آوندے نیں، 2) پتن، ساحل، گھاٹ-
2-راہ عشق دا سُوئی نکّہ
دھاگہ ہوویں تاں جاویں
(کافی، مادھو لال حسین)