صاحبو
کال تہاڈے ساڈے بھانے ویلا اے، نر اتھرا
رج پجُیاں کولوں قحط کماوندا
مہنگیاں جنگاں لاوندا،
باریں وسیندے ڈھولے جوڑن ہاراں
جیہڑے ناراں وانگ رو جوڑیا اپنا گاوندے نیں
اندر ایہدے ہاٹھی نار سیاتی
دُھروں جیہدے نال ہویا دھرو
جِیون جاوندی
رِزق اُگاوندی
نراں ادِھین کر تھلّے لائی
تدوں دی اگنی اندر نار سمائی
ساڑ سواہ میں کرنا اے
کُل پسار اُسارا نر پردھاناں دا
ولیا ایہناں دا ایہناں دے ہتھوں ڈُھوانا اے
مروانا اے ایہناں نوں اِکدوجے کولوں،
نراں سوچیا کیہ کرئیے
کھچرا رِشی اک بھال کال دا کھسم کرایا:
یئیں یئیں کردا نال رہیں
متے تاڑ ایہدے سانوں اگُونہا سُونہا کریں،
نر مؤرخاں کال نوں اتھرا نر حاکم کر وِچ تاریخ اُتاریا
نارد نوں اوہدی رنّ مِیسنی
سولاں سِنگارِیں رُجھی،
سو صاحبو
کرو فیصلہ
کیہڑی تاریخ ہُن پڑھنی پڑھاونی کرنی کراونی جے