فرید بھنڈار

''کیوں وئی شَونکی بُرجُو

خِلجی کلیجی مھانا بُھکانا میرُو بھمبیرُو

پنج پَینچ تُسیں کیہ اُگراہ لیائے او

پیشی کرا کے یار اساڈے جسّے شیخ دی''

''چِراں پِچھوں کل کٹھے ہوئے آں بھاء شپیا

بنی صلاح ایہہ سہج سبھا ای

چل بہوئیے جسّے شیخ ہوراں نال دو گھڑیاں 

نویں کیتی کوئی سُنیئے پُرانی،

گئے آں 

مِلے نیں شیخ جی گُھٹ کلاوے پنجاں نُوں،

یارو سرھیوں ساگ تے روٹی مَکّی دی

اج بہہ کھاوئیے تاہیوں خبر کوئی بننی جے،

کھا کھوا سانوں جوڑ بہا گل کیتی نیں:

کل سائیں رکّھے پھیرا پایائے

یار پُرانا میرا

اکھے نِکل باہر اُٹھ جسڑُو

بھر گُھٹ بھڑتُھو1

بُڈھے وارے چکھ نشہ جوانی،

نِکلے آں دوئے

ہتھ پھڑ میرا لئی سُو بُھوانٹی:

'وصل وچھوڑا، وصل وچھوڑا

بِرہوں حضور

بِرہوں حضور

کیوں کیویں 

دس جسڑُو شیخا کیوں کیویں'،

بھڑتُھو باگھی1

باگھی سمّی2

سمّی ہو جُھمر3 کِکلی4 گئی،

انگ انگ رنگ ہے رکّھا سائیں تے،

کھڑکیاں گوڈیاں نال

میں وی ٹُھمکدیاں 

واج وگائی جیویں تیویں:

کیوں کیویں ہاں کیوں کیویں 

اج عشق دا کھول خلاصہ رکھڑی،

اکھے وصل وچھوڑا بِرہوں حضور

کیوں کیویں ایہہ جُڑی کہانی،

وگیاں وائیں ورھیا پانی

گِڑدا گیڑ رُتاں دا آیا

ٹُردی کہانی رچ رس کلا ہوئی

رنگ رنگ ہوند ان ہوئی ویتر تناں مناں نوں گئی پہنیندی،

کیوں کیویں 

اوہ جسڑُو ایویں:

کرن ہار تے سانبھن ہار جاں دو تھیئے

بھج بھنڈارا رِزق دا

ونڈ سواہری ہونوں آتر جاں ہویا

دُوئی ویہار ہوئی

وسیبا آہر ہوئی

تاں تھئی اِکائی بِرہوں دُوہائی

کر پنج وقتا ووضو مسِیتوں وِچ درگاہے حال قوالی آئی،

ٹل بھجنو ہو ثابت ثبُوتا

بھوگ بھجن وڑ مندریں پجُیا

چڑھ چڑھ ہوئی ہنیری گُماں

ہویا اوڑ نِت ورھ ورھ پانی……

بسّ رکھڑی؟ مُکی کہانی؟

کِتھے اوئے جسڑُو یبڑُو

ایتھے تے آ مُڈھ بنھیا سُو

سُن نا

کلجُگ گاوندا ای ست جُگ بانی:

گاہ1 دے راہ جاں پئی خُدائی

تاں رِزق اُداسی سچ دیدار دا در نہ رہی

ورتن2 ہی سچ تھئی

ساہ گراہ وِچ حاضر حضور

ہر جی اِک مِک ہست الستی

تَن قدرت مَن قدرت مستی''

''واہ شیخا

نوِیں کیتی آ خبر پُرانی

کیوں شونکی چونکی دُھر بُرجُو

خِلجی کلیجی مھنّے بُھکانے میرُو بھمبیرُو

ہُن کیہ جے وچار؟''

''ویکھو بھاء، جو سرے آہر''

1- بھڑتُھو= اِک لوک ناچ-

1- باگھی -2- سمّی -3- جُھمر 4- کِکلی= چارے لوک رِیتل ناچ نیں -

1. گاہ= ہیٹھلی اُپر کرنا-2- ورتن= معِیشت، اِکانومی-