بتھیری دُڑک لائی دی اے
کنڈ کر جاندائے پھاٹک
جان پئے
چرکھڑیوں جیہڑے گَھسا جَھسا کر کے جان دی کردے نیں
سِر سَیکل تے لک چرکھڑی
سنگوں کھچ پچھاڑی دَھک
چرکھڑی وڑیا جیہا کچہری چڑھیا
میں اک واری وڑیاں
گَڈی سہج سہج پئی آوے جنج دی گھوڑی
لَین مساں میں ٹپی اے تے سُتے لوک نوں دھاڑ نہیں آ پئی
اوہ دن لاء ساڈی توبہ بھائیا
ٹَیم تے پُج کے کیہڑے خزانے پٹ لینے نیں آپاں
ڈاک افسر اے
ہٹ جاؤ آئی تے ہٹ جاؤ ٹر گئی
وچ بھگتاونی ہوئی ایہناں مال ہماتڑ
ایتھے کھلو گئی اوتھے بہہ گئی
ڈھائی ڈبے رہ گئے تے انجنوں لہہ گئی
مال قصائیاں دا
وچ چونک دے پھس کھلوتائے ہڈ کھڑکاوندا
چلو آپاں کیہڑی فلم دی تاکی مَلنی اے ٹَیم تے پُج کے
دو پَولیاں رکھی دیاں نیں
مائی چُنھی تے بابا بسکٹ‘ دونوں پرانے پھاٹکئے نیں
باقی مافی
ہیٹھ لین دے ٹِھیائے ردی بوتل دا
جھولے بھر بھر اوتھے بھا مکاوندیاں نیں کولے آلیاں
بال اوہناں دے ایتھے واری لا لیندے نیں
باؤ نَیت فقیراں کولوں چالو اے
اکھے گڈی تھلے آ جانا منظور اے ایتھے نہیں کھلونا
آہندائے بھائی والی اے کانٹے آلیاں نال ایہناں دی
باؤ جِنے نیں سبھ فقیراں کولوں خورے کیوں چالو نیں
سچی پچھو اگے نہیں ساں
ہن میں وی چالو ہو ای جانا ادھ پچدھا
ٹھیک ای آہندائے باؤ نَیت اکھے کر کے کیوں نہیں کھاندے
آہو
آپاں جیہڑے میوے بہشتی کھانے آں پئے کر کے
ایہہ وی چکھن
وڈے لوک نہیں ایڈے چالو
ایہہ بیگم شاھنی
وَلا مار کے گڈی آن پھساوندی اے ایتھے
حاجی لاٹ نہیں؟
پنج سو ست سو پُوج نہ بیٹھے جھاڑے بہن نہیں ہوندا
ایہہ نیلا کوٹ کوئی نواں آ گیائے
ہڈ کاٹھ تے کَوڈی آلیاں ورگے سو
پر جیٹھ ہاڑ وچ کوٹ ریلوائی‘
اک واریں پے گیا ہونائے پھیر نہیں لتھا
پینٹ نہیں ریلوائی
پھیر بروپیائے
کیہڑا بروپیا پیر ساڑدائے اللہ واسطے
کسب کسب ای ہوندائے بھائیا
سکوٹر وڈیاں لوکاں آلی مُسکنی نال ایہنوں بھلا کیہ سمجھاوندائے
''اِنج نہیں آکھی دا''
''انھا دوزکی تے بولا بہشتی ہور کیہ آکھیائے''
''اِنج نہیں آکھی دا نہ''
''حق توں حق نہ لاہواں''
''اوہو- غلط گل ایہہ ہو جاندی اے''
''کیہ پر کُوڑ اے
انھا دوزکی کہ بولا بہشتی؟''
''نہیں کریدیاں ایہو جیہیاں''
''حق چڑھیا رہوے بھاویں حق تے''
سکوٹر ہتھ ماردائے‘ بھن کَٹ کڈھدائے واسکٹ چوں
نیلا کوٹ نہیں پھڑدا- اوہو! انھا اے آپ ای خورے
''حد ہو گئی بھئی ویکھو میں کیہ آکھیائے
انھا دوزکی تے بولا بہشتی
ہور آکھن والی کیہڑی گل اے''
''سمجھو- غلط گل جے- سمجھو''
سکوٹر کِک مار گیائے مائی چُنھی دے بھن کٹ جھپدیاں
ایہہ اینویں پاسا جیہا ای مار ولا گیائے‘ ڈُھڈ پھاٹک دا
پکی گل اے ریل دی کَوڈی
نہیں - پھاٹک روز اگراہوندائے بھیتی ہو گیا ہونائے
پر دِسیا اج ای اے ایتھے
کسے ہور پھاٹک دا ہونائے