(تال ہیر وارث)
1
''لائن ہے لمی
واری آجاسی
مھاڑے پچھے وی تکیں نا کتنے نیں
''ایڈا اسپتال اے کون پچھنائے کسے کی
ڈر لگنائے''
''پانی آن دیاں ای
سپڈنٹ آکھنا آ گائنی وارڈ وچ جُلیں تے ناں گِھنیں
اکھے سبھ مرید نیں
میکی جھاکا ای رہنا
دفتر وچ وی جھاکا ای رہنا میکی
سپڈنٹ آکھنا اے تیری نتھ کھلانی ای پیسی باؤ
آپیں نپڑاں تے اس کی وی دیاں نا
تھوڑیاں رہ گئیاں نیں واری آجاسی
کُجھ ارام ای؟
کھیہڑے پیا رہنا:
تُساں کی شرم کیہی
کیہڑا رب رسول کی مَننے او
کہ منن لگ پئے او جدوں دا ڈھے گیا اے
خانہ کعبہ او تساں نا
اُتھے سگٹے نے کشے تے وِکنیاں نی ماواں ماسیاں تساں نیاں‘
کِنوں کر میں چِھلاں
اکھے ڈاکٹر لوکاں نے کپڑے لاہنے نیں پئے
ٹیکس حرام اے ایہناں اُتے
ٹیکس دین تاں ایہناں نے ای کم آونائے
اساں کی کیہ لبھنائے
اَس تے اپنا حصہ وی نہیں گِھننے
پَچھ لاؤ ایہناں کی
سراسر جائز اے بلکہ فرض سمجھو
اپریشن کرنے نیں ایہہ
جو کاں لاؤ نیں دیسی علاج کرو‘
واری آجاسی
پچھے لائن کتنی لمی ہو گشی اے
پارٹی وِچ وی ملک روز آکھنا آ
’سسٹم کی اسیں تے مننے ای نہ
سسٹم بھننائے اَس
مَکھے سسٹم نا گند وی سسٹم ای نہیں؟
بندہ جو کھانا سوئی ہو جُلنا
اکھے تُدھ صوفی ایں مار کسی نہیں
تساں جیہاں ای کھچ کری چھوڑیا اے‘
2
میں تے سیاتا ای نہ اس ڈاکٹر کی
دفتر تکیا ہس میکی
اکھے باہر کیہ کھلے او لائن لگ کے
مکھے تھینک یو
واری سِر آساں
چنگا زور لائیس‘ میں نہ کری چھوڑی
واری آجاسی
لائن ناہن تے خیال کرسی
ایتنا فائدہ ای سہی شودھی نوکری نا
اسپتال ہن اوپرا لگنا نہیں
عجیب گل اے
ہے عجیب کہ نہ''
''آء- کوئی نہ
توں کیوں اوپرا جیہا پیا لگنا ایں''