ہیٹھ سٹیشن اپر گنبذ
سُنیائے میل بس ہزہائی نس لئی رُکنی
جدوں شاہی سواری ڈُھکنی بومبے دِلّی
اگوں پچھوں پہرہ رہنا
انگلش وردی رومی ٹوپی
چِڑی نہ وٹھنی
ہن پہرہ کوئی نہیں‘ سُن مسان کیہی
گنبذ اپر نہیں کبوتر
کمریاں ڈھاریاں اندر پکھے چلدے نیں
بلب پئے بلدے نیں
باؤ قلی نہ ٹکٹ کلکٹر
نہ پلیٹ فارم تے ریڑھی چھابہ
تھمی نال اک ہنڈیا بڈھڑا گم سم بیٹھائے
کانٹے والا ہونائے
''لیٹ تے نہیں جی؟''
ہوں ہاں کوئی نہیں' جواب تے دیوے بندہ' ویکھو!
ہونائے صفائی والا
ترونہہ دناں دا ایس شہر میں دورے آیاں
دفتر‘ میٹنگ‘ افسر‘ خاطر
ترلے نال اج عملہ مگروں لاہیائے
''گنہ گار نہ کرو سر
ٹرین آون تائیں حاضر سانوں رہن دیو''
''نہیں نہیں ایہہ وی اوڈر سمجھو''
پلیٹ فارم تے سکھنی دھپ جَڑی اے شیشے ورگی
جاپے کسے نوں ملنا ہا
کوئی ناں پتہ نہیں چیتے
''لیٹ تے نہیں جی؟''
تھمی اے‘ اوہ بڈھڑا ہن نہیں
پرلے سِرے تے ٹین دا چھپر
سکھنا مسافر خانہ
ستویں وار میں سگنل توں لاء پلیٹ فارم نوں کچھ مسافر خانے آیاں
سجرے موتر دی خشبوئی
ہلجل جیہی کوئی جاپے‘ آپنا آیائے کوئی
اندر تے اونویں سکھنائے
پر باہر پلیٹ فارم توں دُھپ تِڑکی اے شیشے ورگی
ٹَپ کے لائناں کِکراں دے پرچھاویں اپر چڑھ گئے نیں