کئیں ورھے پرانی گل اے
ایہہ بولی گیا
اوہ سُندے گئے
مارکسزم تے اگزسٹانشل ازم‘
(فیمی نزم اجے آہیا کوئی نہ)
بولدیاں اکدو واریں تکیوس اوہنوں
جیہنوں سناوندا آہی
گواچی جیہی مسکار نال ایہنوں ویہندی گئی اوہ
نہ گل چائی ٹُکی ودھائی
نہ ہوں ہاں کائی کیتی
گھر ول آوندیاں راہ وچ ایہنوں
رَڑکی تریڑ چپیتی:
متے ہوراں کڑیاں ہار ای وچوں نکلی گھرہستن پول سِری
ہوون والے جنے دی نوکر اگدوں
نکلیا آرٹ سیاست جھاکا ای-
گل کئیں ورھے پرانی آہی
یاد رہی کُجھ بھل گئی جیویں ہوندائے
اج دفتر بگُو ملیائے ایہنوں‘
روز ای ملدائے
پرانی یاری ہوئی
بگُو بیٹھا شاعری اُتے پیڈی بحث چلائی آیا
سندیاں کردیاں کیہ ہویا
ایہدی نیجھ تِھڑی تے تِھڑدی گئی‘
نکے نکے ننگ مننگے بال گلی وچ رولا پاوندے
نسی جاندے جاپے:
کالیاں اٹاں کالے روڑ
مینہہ وساوے زورو زور
بگُو جاپے اجو ای ملیائے ورھیاں دے پندھ پردیس مکا کے
کُولی جیہی کوئی چھاں نہ ہو گئی ہر پاسے
کئیں ورھیاں دی گواچی جیہی مسکار اچیتی ہو نیڑے پئی بولے
ورھیاں بدھیں سنی گل کوئی
''بھاویں توں جان نہ جان'' جیہی
بھیت آپنا جیوں پہلی وار پئی کھولے
بگُو خبرے کس ویلے ٹر گیا
بوہا کھلیائے
علامہ آ کے بہہ گیائے
علامے نال ایہدی اینویں دفتر مِلنی اے
پر بہندیاں سار علامہ بال جیہا نہ جاپے
چائیں چائیں کھیڈن آیا
عجب جیہی اوس چھاویں -
اچیتیں سمجھ رَلی
پچھلے شاعر سہج سبھا کیوں کُڑی چِڑی بن ویندے سن
کافی اندر چُپ جیہے ہو
ویکھن کیہ لگ پیندے سن