میں اوہو آں
جیہڑا روز ایسلے ادھ جگیا
کتوں بھانڈے بدھے دوہیں ہتھیں چاء کے
پِھڈے سلیپر ماڑی ماڑی دُھوڑ جگیندا
دفتر دیاں کواٹراں اگے آ ویندا اے
کُڑی اِک پتلی جیہی
جِتھوں بھاں بھاں بِلییاں کردی آ کے
بھانڈے بدھے پھڑدی اندر کھڑدی اے
پنجاں مِنٹاں پِچھوں اونویں بھانڈے بدھے جیہنوں پھڑا کے
بھاں بھاں بِلیاں کردی مُڑ اندر وڑدی اے
میں اوہو کُڑی آں جیہنوں بُڈھی اِک ادھکھڑ جیہی
دفتر دے بمبے تے ٹلے مَلدی
گند بولدی نال پلُوتے دیندی اے
اوہا کُڑی جیہڑی جھٹ سارا لِیڑے سُکنے پا کے
بمبے اگے گِلی نوان تے بوری رِڑھدی
وِچوں جاگدی اُپروں سوندی جاندی اے
میں اوہو ادھکھڑ بُڈھی آں
اوسلے جیہڑی موڈھیاں اُتے گِلے وال کھلاری آ کے
پاٹیاں اکھیاں نال کُڑی دے سُتے سِر چوں لِیکھاں لبھدی
اوہدے نال کہ آپنے نال کوئی ہولی ہولی گل چلائی آوندی اے
اوہا جیہڑی وال سواری
رات ویلے دربار تے آئیاں کاراں دے وِچ جھات جھاتدی آہندی اے
بیوہ ہاں، اِک کُڑی اے نِکی، کر سکدے او جو وی کر دیو
اوہو ورھے پِچھوں جیہڑی
جِتھے بہندی اے کُتے نال ای بہندے نیں
بولے بولن لگ پیندے نیں
چپ رہوے چپ رہندے نیں