تذکرہ ابتذالِ ایام
عُرف قصہ بنچ
برسبیل استفادہ عوام کالانعام
بزبان خوش الحان ملک عرفان الحق اکرام
جی ڈی او ٹُو افسر بکار خاص حکومت پنجاب
ایہہ بنچ ایہناں دے پیو دے نیں سرکاری
گھر نیندر نہیں نیں آوندی
بھئی سیر والیاں لئی رکھائے گئے نیں
ساہ لین گھڑی
یاں گھڑی نظارا لین بیٹھ کے قدرت دا
ایہناں دے پلنگھ نواری ماں دے
جیہڑا بنچ وی ویکھو دُوروں
کول جاؤ تے مُردہ پیا ہووے گا-
پتہ نہیں لگدا
کپڑے وی ایہہ بنچ رنگ دے پاوندے جے
سردی ہووے تے دُھپ والا نہیں چھڈدے
گرمی ہووے تے چھاں والا نہیں چھڈدے
بندہ کِتھے جاوے دسو لِکھن پڑھن والا
سوچن والا
پاسے پرنے ہون دی کھیچل وی نہیں کردے
الف پئے نیں سِدھے
کولوں بال وی لنگھدے ہوئے، کُڑیاں پڑھیاں لِکھیاں
کوئی دین دُنی دی ایہناں نوں نہیں؟
میں جھانے نوں پُچھناں -
نال کلب وِچ ہوندائے جھانا-
کئیں واریں ریٹائر ہو کے پِنڈ جان دی کر بیٹھائے
جان نہیں دیندے اگلے
دسدا ہوندائے پنجاں ورھیاں دا ایتھے گولی پھڑاون لگاں
تدوں انگریز گورنر کھیڈن آوندا سی پٹیالہ آؤندا سی
وکٹ گُرو اے جھانا
کِنا پانی کِس ویلے دینائے، رولر کِنا کِتھے پِھرنائے
گھا کِنا کِتھے رکھنائے کِتھے نہیں رکھنا-
ایہہ وی سنیائے رات کواٹر نہیں کدے سُتا
کوئی کہندے سن خفیہ وِچ اے
کوئی کہندے سن ٹِبی جاندائے
کدے کوئی بندہ نہ ہووے تاں ٹویلوتھ مین وی بن جاندا سی جھانا
کِٹ ہر ویلے حاضر رکھدا سی
میں پُچھناں جھانیا پُچھن دسن والا کوئی نہیں ایہناں نشئیاں نوں
اکھے پُچھن والے بڑے نیں دسن والا کوئی نہیں
ہے ای نشئی نیں جھانیا دسے کیہ کوئی
ہے نہیں اکھے ہو جان گے
پر کم کار نہیں ایہناں نوں کوئی؟
اکھے نائٹ شفٹ جو لائی
گھر پین دی تھاں نہ ہوئی ایتھے آ گئے
نواں آیائے کوئی شہر چ ٹھاہر نہ ہوئی ایتھے آ گئے
میں پُچھناں جھانیا تُہاڈے ویلے وی ایویں ای سی
اکھے دِنے سون والے تے تدوں وی کِدھرے سوندے ای سن کہ
ایتھوں لنگھدا ای اوہو سی جیہدا پِچھا ہووے، اگا تے انگریز دا ای سی
پھیر تُہاڈا ای ویلا چنگا ہویا نہ جھانیا
باغ باعزت بندیاں لئی سی
اکھے جیہڑا حاجر ہووے ویلا تے اوہدا ہوندائے
آہو نوکری تیرے جیہی کِس کرنی اے
نوکری نہیں جیہڑا آپنا گَیر حاجر نہ ہووے ویلا اوہدا ہوندائے
جیہنوں وِچ پرایا قبجہ اے باہر وی قبجہ اے
ایہہ جھانا ہے کوئی پُٹھا ای
میں ہور پیا کرناں ایہہ کوئی ہور سناوندائے اگوں
یاں ستریا بہتریا گیائے
تاں ٹُر جائے آیائے جِتھوں