عید کارڈ اں تے اُٹھ کھجور دا جوڑ ضروری ہون توں پہلوں دی گل
(جدوں ایہہ گل سناوے لالہ گام تے آہندا ہوندائے
''ایہہ عیدکارڈاں تے اُٹھ کھجور دا جوڑ ضروری ہون توں پہلوں دی اے''
سو میں سوچیا، ایہو ای سرناواں ٹھیک اے-)
لالہ دسدائے سن سنتالی توں پہلاں لہور کھجوراں چوکھیاں آہیاں
باہروں آؤ تے لگدا سی مُلتان آئے آں
اکھے داتا صاحب وی لکھیا ہانیں
لہور اِک وستی اے ملتان شہر دی
ویلے نال وی شہر وتھیتے ہوندے گئے نیں
کدیں پہاڑ سمندر اک سن
ہُن سنیائے ملتان وی کھجیاں گھٹ گئیاں نیں شمس دے ڈیرے تے وی
اکھے شہر وی آہیاں کئیں
تکئیاں وِچ وی ویڑھیاں وِچ وی، اندر شہر اجے ساریاں تھاواں پکیاں ناہیاں
(چڑیا گھر وِچ اجے وی اکدو ہے نیں)
جُھنڈ ای جُھنڈ سن راوی پار تے
باراں دری وِچ دِسدی ای نہیں سی
اکھے اوتھے ای اکواریں
اُٹھاں والیاں نال میں اوہنوں ڈِٹھا
اکھاں وِچ عجیب جیہی کوئی لوء آہی
اُٹھ تے بڈھڑیاں مائیاں سن دو
اُٹھ دی پھڑی مہار اوہ نال پئی جاندی اے
اکھے تدوں بال ساں
جاندیاں اوہنے ایویں تکیائے
جیٹھ ہاڑ دے دِن سن
سہجے ای چھاں جیہی ہوئی اے ساری دُنیا تے،
''رات آ گئی اے''
میں نالدے وڈکے نوں آہناں -
''لوڈا ویلائے''
وڈکا ہسیا
''چلو گھر چلئیے
نِیندر آئی اے تینوں''
میں پُچھیا لا لہ پھیر کدے نہ ٹکری
لالہ آہندائے اوسے رنگیاں اجکل جمعے بزار وی کافی ہوندیاں نیں
چِھلیا لسن لاء کے بیٹھیاں
باقی ہفتہ مال روڈ اخروٹ تے سوغی لاء کے-
تکدیاں نیں
پر دِن وِچ رات نہیں آوندی