کتاب بے بدل موسوم بہ احوالِ شجرِ سمبل المعروف قصہ ڈھک مکوڑا
مِن تصنیف شریف مِس اینی روزا مَل سابق نرسنگ سِسٹر ڈسٹرکٹ ہسپتالاں مفصل حال وارد لاہور
میں اجکل لارنس گھٹ ای جانی آں
نویں پارک ہُن کئیں نیں
جانن والے اوتھے ای مِلدے نیں
تھوڑے ای رہ گئے نیں جانن والے بُہتے باہر ٹُر گئے
کل کئیاں چِراں پِچھوں گئی تے سمبل اُتے چڑھدا بندا ویکھ کے گم سُم ہو گئی
شہت دے چھتے لاہون وی کوئی چڑھدے ای ہوسن
پر آپنی اکھیں پہلی وار میں ویکھاں پئی تے جاپے
شہت وی اجکل کوئی نہیں ایہہ کیوں پیا چڑھدا اے
وڈے ٹاہن ٹپیندا اُتلیاں پتلیاں ٹہنیاں اُپر باندر چال اوہ چڑھدا جاوے
ہیٹھوں دو کھلوتے آہندے نیں بس کر ریمبو لہہ آ ہُن
پنج سو کڈھ وکھاؤ تے لہناں
اِک نے اگوں زِپ کھولی لے ویکھ لے پنج سو
میں ڈھا کے پچھوں کڈھ لینے نیں تیریوں، ہیٹھاں آون دے مینوں
باندر چال اوہ پتلی جیہی اِک ٹہنی اتوں نال دے سوہل سفیدے اُپر سرک گیا
تے کوُلی گول گُلی نال تلکدا تھلے آیا
اوہ تریوے شرط جھگڑدے ٹر گئے
ایہہ چڑھیا کیویں سدھی گُلی کُولی کَھل سِمبل دی
پر کولوں ویکھیا کوُلی کھل تے نکیاں نکیاں کُھنگیاں ابھریاں ہوئیاں نیں
سِمبل بڑا عجیب درخت اے-
میں پہلی واریں باگ چ ڈِٹھے دو تے سمجھی
باہروں آیا ہونائے سمبل ناں انگریزی لگدائے
ناں دا کیہ اے، خبرے کیہڑا کتھوں آیائے-
سچ بابے نانک سمبل دی گل کیتی اے
''سِمبل رُکھ سریر میں
میں جَن ویکھ بُھلن
سَے پھل کم نہ آونیں
تے گن میں تن ہن''
سارا جگ اداسی پھریا
خبرے کیہڑے دیسوں ویکھ کے آیا ہوسی بابا
پر دور دراڈیاں گلاں وچوں کتھے مثالاں کڈھدے سن اجے شاعر اوسلے
ناں دا کیہ اے
اوس ویلے وی باہروں آئے ناں دھرا کے لوکی راضی ہوندے ای سن کہ-
باگے سڑک دے آر پار نیں آہمو ساہمنے
ہک اودے جِدے کلب اے چھوٹا
ذرا ہولیاں سامیاں والا
دوجا جِدے لان انگریزی اُپر شالا مار وچھایا نیں
باگ چ ایہدے فائدے تے میں ویکھے نیں
ہِک تے شہت دے چھتے مشکاں ایہدے اُتے لگدے نیں
بدھیاں تھاواں اُتے میلے نہیں جیویں لگدے
دوجا منڈے ایہدے اُتے کُڑی دے ناں نال آپنا ناں رلا کے لِکھ لیندے نیں سوکھا
وِچ دل پان دے پتے ورگا
نالے تیر اشارے ورگا
پتہ نہیں ایہدا رنگ گورائے
یاں کھل کولی اے سوکھی کُھرچی جاندی اے
پورا گورا نہیں سمبل
اوہ تے سفیدا وی نہیں ہوندا
پورے گورے تے گورے مشکل ہوندے نیں
انج رُکھ ملوک اے بتکاں ورگا
ناں بھاویں مرداواں اے، ناں دا کیہ اے،
ٹاہلی کُڑی دا ناں نہیں لگدا؟
سِمبل اُتے اُکریاں ناواں بارے وی میرا اِک خیال تے غلط ہو گیائے پِچھے جیہے
میرا خیال سی ایہہ سکول دے منڈیاں دا کم اے
بڑی حد اے کالج دیاں دا
فسٹ ایر دے سیکنڈ ایر دے منڈے
کڑیاں نال اجے گل نہیں جیہڑے کر سکدے
پر دِل وِچ پک نیں
باگ چوں لنگھدی سمبل ول اوہ جاوے ای جاوے
روضیاں تے وی ایہو کردے نیں
جہانگیر دا ہووے غازی علم دین دا ہووے
یاں اوہ منڈے آپنا ناں جہان تے چھڈنا چاہوندے نیں
آپوں اوہلے رہ کے
شاعر وی ایہو جیہے ای منڈے ہوندے نیں
پر پچھے جیہے عجیب ہویا
اک چنگا بھلا سیانا بندہ، داڑھی دھولے
لما سارا چاکو لے کے جُٹیا ہویائے
کوئی کڑی دا ناں نہیں سُو لِکھیا
بس معظم اِک اِک چھیانوے
ایہہ معظم شاعر نہیں بن سکیا ہونا
پر چاکو جیویں خفا خون اوہنے سمبل اُتے واہیائے
جاپے کوہندائے کِسے نوں
کوہن والے وی وِچوں خبرے شاعر ای ہوندے ہوون
ناں چھڈن لئی آپنا کُولی کھل تے اوہلے رہ کے
قتل وی غزل سناون وانگ ای ہووے بھاویں
پر مکھیاں دا لما نہیں منصوبہ ہوندا
سیال سمان خُراک دا اندر دھرنا ہوندائے
اوہ وی ایہدی کھل ای خبرے ویکھدیاں نیں
ہاں پتر اِکدم آ جاندے نیں سمبل نوں
جیویں کڑیاں نوں کپڑے آ جاندے نیں
پر گوریاں رُکھاں تے پتر اکثر وِرلے ای ہوندے نیں
مساں ای اوہلے ہوندی ای چھلی
پر جِسلے چھلی بھر جاندی اے
سہجے ای پتر کِر جاندے نیں ننگی چھڈ کے
ٹھیکیدار نوں چڑھن تے چھلی وڈھن وِچ سہولت ہو جاندی اے
شہت بارے ہُن عام تے ایہو ای اے کہ شیرا رلیا ہوندائے
سو باگ دے افسر ہوون
یاں کوئی اثر رسوخے
اوہ تے لہاوندے نیں اُتے کھلو کے
ساہمنے چوا کے لیندے نیں
کئیں کروڑ پتی نہیں گوشت آپ کرا کے لیندے نیں
ددھ گوشت دا شہت ہار ای ہُن وساہ نہیں کھانا چاہیدا
مکھیاں انج تے پاڈِیاں سُنی دِیاں نیں
ایہناں بارے کورس دیاں کتاباں وِچ وی بڑا بڑا کُجھ آیائے
ٹی وی تے وی آیائے
پر سمبل ایہناں نال سال دے سال جو کردائے
اوہ کیوں خبرے سمجھ نہیں نیں آوندی
پنجاہ ورھے تے مینوں ویہندیاں ہو گئے نیں
تے سمبلاں نال ایہناں دا واہ تے بابے نانک توں وی اگدوں ہونائے
ہزاراں ورھیاں دا-
پتر جیہڑے ویلے کِردے نیں
پُھل آ ویندے نیں
لال سوہے تے بھارے بھارے
پُھل وی جھٹ ای ڈِگ پوندے نیں
بوٹی بوٹی جیویں کوئی صدقہ سٹدائے
روں وی ایویں ای اُڈ رُل جاندائے سمبل دا
سوکھے لوک سراہنے ایہدے بھریندے آہے اگے
ہُن تے ہماتڑ فوم تے سوندے نیں
خبرے سوکھ سراہنے بھرن لئی سمبل لگدا ہونائے بابے ویلے
تاہیوں پُن گیائے ایہنوں
سوکھ سراہنے بابیاں نوں خبرے کیوں چُبھدے سن
نہ سونا نہ سون دینا
ہور تے پُھل کِسے کم نہیں آوندے ویکھے میں
اک لال رنگ دا کیڑا کھاندا ڈٹھائے اوہ وی ہُن جیہے
ایس واریں جدوں پُھل آئے نیں
میں ویکھیا
چیچ ووہٹیاں ورگی فوج دی فوج نہ لتھی ہووے
ہِک ہِک پُھل نوں دَہ دَہ چڑھے ہوئے نیں لالڑ
کائی لوے نیں سُوہے ترکھے
کائی وڈیرے ٹُھلے کھروے پھِکڑے رنگ دے
موٹے بُرک کتردے ہولی ہولی ہلدے
لال فوج ایہہ اُتھاں لتھی ہوئی اے
کیڑیاں دے جِتھ بھون نہیں سمبل تھلے؟
پُھل ولا کے لنگھن کیڑیاں
لام ڈوری وِچ لگیاں
لام ڈوری دے آسے پاسے مٹی دیاں مہین گولیاں
نکیاں نکیاں ڈھیریاں کر کر دھریاں
بھون چوں مٹی کڈھن وی کوئی کھیڈ اے خبرے
پریوں ولیتی لان تے ڈاہے شالا ماروں
گھاہ تے چٹی چدر پائی باؤ پارٹی چکن کڑاہی
اگوں بھورے ریڑھ کے بھون لیایاں نیں
لام ڈوری وِچ ترکھی آوا جاوی اے
پر مُونہہ میلن نہیں کوئی گُھسیندی
اوسے دیہاڑے ڈھک مکوڑا پہلی وار تیار ہوندا میں ڈِٹھائے
عام کاڈھیوں ذرا وڈیرا ہونائے جیہڑے ویلے آیائے
لا م ڈوری کنوں لانبھے لانبھے
تِھڑیاں بُھلیاں گُھٹن لگ پیائے
کتلیاں نال اَڑُمبے کیڑی سالم مُونہہ وِچ تُنے
میرے ویہندیاں عام کاڈھے توں جُسہ چَونا تھی گیائے
سِر موٹیرا وات چُریڑا
ڈِھڈ لمیرا ہوئی جاوے جیوں جیوں کھاوے
جاپے مگر کوئی لگا ہویائے
گھیرا پیا ہویائے کائی ایہنوں
کھاندا کھاندا نشہ جیہا جیویں تھی گیائے
ڈولدا لام ڈوری وِچ نہیں جا وجا؟
لام ڈوری تھرتھلی
دو چاوے تے ہک نگھارے
کئیں کتلیاں وِچ جکڑیج گئیاں
کئیں مونہہ وِچ اڑ پھس گئیاں نیں
کجھ لتاں نوں پئیاں نیں
ٹپدا ڈھیندا لام ڈوریوں باہر اُلٹیائے
لام ڈوری وت ٹُر پئی
ہک پاسے تھی چمبڑیاں لاہیاں پھسیاں اندر لنگھائیاں سُو
مُڑ ڈولدا ٹُٹ پیائے کلیاں دو کلیاں چُٹن گُھٹن
میں آہنی آں
سمبل دے پُھل جھڑدے ویکھن جے توں ٹھہر نہ جاویں ہا
عام کاڈھے دا ڈھک مکوڑ بندا ویکھ نہ سکیں ہا
وت آکھاں
بھون تے کیڑیاں بھردیاں ہوسن
پر کتنے کاڈھے ڈھک مکوڑے کردیاں ہوسن سیال چڑھے تائیں
مُڑدی سوچنی آں
کاڈھا مکوڑا ہِکو گل نہیں
ڈھک کیہ ہویائے
اُچا ٹِبہ ڈھک اکھویندائے خبرے
یاں رج کجیا ڈھک اکھویندائے
بار والے تے ڈھک آہدے نیں قیدی نوں
ڈھک مکوڑے نوں مگر مکوڑا کیوں نہ آکھاں
پر کیڑیاں خبرے ڈھک مکوڑے نوں کیہ آہدیاں ہوسن
ناں اصلی کیہڑے ہوندے نیں
ناں ویکھن والے دھردے نیں کہ ورتن والے
جیہڑے بناون
اوہ بنیندیاں نہیں دھردے تے کیہ کردے نیں
مچھیاں کولوں مگر مچھ دا پُچھنا چاہیدائے