سی حرفی مصور عرف قصہ ب بُرش و لام لکیر
تصنیفِ لطیف چودھری محمد شریف پی ٹی او رٹائرڈ
نیو ہجویری سنٹر ہا کہ نالدا
شیشے دے دروازے اُتے دو واریں اوس بُرش چُھہایائے سُوہا
چورس نُقطہ جَڑیا گیائے-
لنگھدا مگر کھلو گیاں -
دو واریں اوس بُرش چُھہایائے 'ز' بن گئی اے
سِر موڑ کے پِچھے تکیوس موٹی عینک اُتوں
متاں میرے مگر کھلوون نال ای بھار جیہا کوئی ہویائے ایہنوں
چِٹے کُڑتے اُتے تھاں تھاں رنگو رنگ نشان بُرش دے
اِکو جیڈے
رنگ پرکھیا ہونائے خبرے
''کیہ کردے او؟''
اوہ 'ز' دے اگے 'ر' بناؤندائے
''کُجھ نہیں''
''کریا کرو کُش''
''میں رِٹائر آں''
''اوہ کِسے لیکھے وِچ تے رہو نہ بھائیا
لیکھا ای ریکھا اے
میں وی رِٹائر آں ڈاکخانیوں
ہاں میرا شوق سی''
'ر' دے اگے 'ک' آ گیائے
''ایتھے لگیاں نوں دھکے پَیندے نیں پئے
اکھے میں رِٹائر آں
اُتوں سئیاں ساویں آلو وِک گئے نیں
دو مُنڈے نیں میرے دونویں امریکہ
لکھ لکھ دونویں کماوندے ہون گے
کوئی پُچھے توں کون ایں
پیو جی دونہہ مُنڈیاں دا
وَڑ کاف کمیٹی
ٹِل لایا جے دونہاں چھڈ دے
ایویں چھڈ دیاں
ساہ اخیری ہوجانائے پر حرف اخیری رہنائے''
زَرَک سِلک……
''سِکھیائے تُساں رِٹائر ہو کے؟''
''جدوں دی ہوش اے سِکھن ٹُریاں
دَسدا کون اے ساری عمر دا کُتی لارائے
ہِندو سی نہ پہلاں
بُرش کہ بِجلی، کم تھیٹر دا نال دسہرے
مینوں ایہو سی بھیت شکل دا پاواں
رن اوہدی ہُن ویکھو
بال سواں آویں نہ
گھڑا چڑھا آویں نہ ہیٹھوں کوٹھے تے
اَک تھک کے سِکھ دے گیاں لوہاری
جادوگر سی
آہو کسباں اندر جادو گر تے ہوندے ای نیں
دِل اوہناں دے سَجے ہون گے
پَیر ہون گے پُٹھے
لِیک جو چھوہنی
شکل کھلونی بُوہے''
زَرَک سِلک ہاؤس……
''گورواں دِیاں وی اوسے واہیاں نیں
بڑیاں لِلّاں لئیاں نیں میں
دئی گیائے اوہ لام لفافے
جادوگر سی سُور سواری
لے گیا مہاراجہ اوہنوں
مہاراجے دا آپنا کم سی
چے چَونک وِچ تخت ڈاہون دا
پہلوں ننگی وہاؤنی
پھیر بہاونی
روز نویں
جادوگر دا آپنا کم سی
ننگی واہ کے چاڑھ دینی اسمانے
مہاراج نے کڈھدیاں رہنا لام لکیراں منجے''
زرک سِلک ہاؤس- ہر قِسم....
''کِسے مُسلمان کول جاندے تُسیں''
''بُرش پھڑنا سی سُنتیں بہنا سی میں
پایا سی اُستاد ہوراں کول پیو میرے نیں
راج برادری ساڈی وِچوں ای سی نا گھروں اوہناں دے
کُل ہندستان چِ دُھماں
رنگ روشن سی
نہیں بُرخہ کِھسکایا
پھے پھُپھی پُھپھڑ کر کر لِیڑے دھوتے نیں میں ٹبر دے
کون کِسے نوں دسدائے
کیہ ہندو کیہ مسلمان سبھ یے یہودی سمجھو
بے بُرش برؤد جھپیٹی
سچے نیں پر، کون شریک اُتارے ہتھیں
رب دا ای جِگرائے''
ہر قِسم جاپانی……
اخیر میں نس گیاں بمبے
اوتھے اشارت ہوئی اے
سِکھ سی اوہ وی
ہور وی مُنڈے سن ایہدھر دے
گھر کُھلا ای رہنا آ گئے ٹُر گئے
آپنا ٹبر ٹیر پتہ نہیں پِچھے سی
کہ نہیں سی
نہ کِسے پُچھیا نہ اوہنے دسیا
جو آونا رل کے چُگ لینا
وڈے بورڈ دا کم سی
اوتھے چھت چوئی اے
پُوری سمجھ تے پوریاں ہویاں آوندی اے
پِیر پیغمبر پورے نہ ہوئے،
……ہر قِسم جاپانی سُوٹنگ اعلٰے……
''بابا کیسے لِکھتے ہو یہ''
''آؤ میرا بیٹا آؤ وکھائیے-
نیڑے شکل ہوئی اے اوتھے
آہندا سی اوئے نہ جا کاف کملیا
ایتھے آئے تے ٹبرداری ہو گئی
نوکر ڈاک دے ہو گئے
شکل اُداسی ہو گئی
حرف وی شکلاں ای ہوندے نیں کہ خبرے-
ایہہ آپنا ای کم جے سارا مارکیٹ تے
ٹھیکے رہے نیں آپنے
دس مُنڈے سن اگے
اِک پوڑیوں ڈِگائے جد دا
میں کہیا بھائیا کلا ای وَتر
ڈِگیں چڑھیں سو تیرا''
……اعلٰے پرنٹس کٹ پِیسز……
''پِچھے ماربل آ لائے اوتھے بہناں آیو''
''چاء اُستاد جی''
''دو پیالی پُتر اوئے
نہیں؟
تُسیں آونا جو کوئی نہیں''