فرید بھنڈار

دو ای راہ نیں

مَل ویہار دے ساہویں ہوو تاں

اِک اِنکار

اِک قول قرار

قول قرار وی ترے رنگ دا ہے

اِک تے ہے ہتھ وِچ ہتھ دے ٹُرنا پرت نہ تکنا

دُوجا اوہدا پلّہ پکڑ کے آکھی آونا

‘‘ویکھی آؤ

مال بنا کے ایہدے کولوں

کیویں اوسے نال ای ڈھاوناں ایہنوں میں

ویکھی آؤ چُپ کر کے’’

جدوں مَل ویہار کُجھ ڈولن لگے پنج ست ورھیں

(جیویں لِکھی ہے اوہدی)

پلّہ چھوڑ آکھنا، آ نہیں گئے؟

ویکھو کیہ کرنے آں نال ایہدے ہُن’’

جیویں کُجھ سنبھلن لگے

پلّے پلم مُڑ آکھی آونا

‘‘ویکھو

کیویں لُٹ ایہنوں

لُٹ میں ایہدی مُکاوناں’’

تریجا رنگ ہے مذہب مسلک شرع طریقت مطلب جیہدا ہے راہ

پُور1 سوائے2 عالم صوفی

یا حضرت

یا مولانا-

ترے رنگ قول قرار دے اِک نیں

اِک رنگ ہے انکار

کر ویکھو

سَت رنگا

1 - پُور: 1) پورے، 2) بیڑی وِچ اکٹھ، 3) پُور کے، اُتوں تک بھر کے-

2 - سوائے: 1) سوا، چوتھائی ودھ، 2) علاوہ، 3) سُواں دِتے، سُلا دِتے-