ست ورھے ہوئے تُدھ شاگرد ہوئیوں
میرے گِرد ہوئیوں
رَجّ پُوت تُساں لجّ پُوت جودھے
اج مَسّیا رَین
تینوں بھیت درباری دا دَسنا ہے
ساڈی جات نہ کائی
منگ کھاوندے ساں
تُھک چَٹ کے پنڈتاں پاندھیاں دا
گا باہر کھلو کے چَوکھٹاں دے
ٹُکر سَٹیا سلّھ بُھکھ ٹال کے دینہہ لنگھاوندے ساں
پاندھا اِک بدنام نلج شنکر
کنجر کوٹھیاں وِچ پھیری رکھدا ہا
میرا واج سُن لے گیا نال مینوں
رَتو بائی دی چاکری گھتیوسُو
مہربان رتو
مینوں گاوندی نال بہال لینا
‘‘واج لاء’’ سینتر کدیں مُسک کرنی
ساودان رتو
بھیت راگاں دے دس مینوں پالیوسُو
کلّی ہونا تے نال سوال لینا
رات راج محل مینوں نال کھڑے
مہاراج سُنے، نوکر رکھ لیتا
نائیک گائک دربار میتھوں خار کھاون
ساکا چاری آہی اکبر بادشاہ دی
مہاراج مینوں آگرے ٹور دِتا
مہابلی مینوں رتن کر لائیو
ست ورھے ہوئے تینوں سِکھدے نوں میتھوں راج کنور
میرا کاہنڑا تینوں سُکھایا نہ
ایہدا ناں درباری میں کر گنویاں
گُونج تینوں ایواناں دی آون لگی
داب اکبری
تاب شہنشاہی جل جلالہٗ
چڑھے رِکھّبوں تینوں پسماون لگی
سُر کاہنڑے دے
بھیتی
جاندے نیں کون ٹوردائے ٹور ستاریاں دی
کیہڑے ست دربار کوجھ کُوڑ سجدائے
بُھکھ دُکھ دے ویہن کیویں پالدے نیں
ہاڑی ساونی بُرج مناریاں دی
میرا کاہنڑا جھال ای
ساگر جُگاں دے ڈَھلے نی وِچ ایہدے
دھأ ہیٹھ کھلو
صدیاں بَدّھی وِجوگ جے جوگ کرنائے
دُوئی دھو اِکائی دا بھوگ کرنائے
تج تخت چبوترے خاک ہو جا
مر رُوڑیاں وِچ جِیون جاگ ہو جا