فرید بھنڈار

مُکیا نہیں سنتالی کہ خبرے چڑھ گیائے اَٹھتالی

ایہہ ہُن یاد نہیں

اینا یاد اے اسیں سکولوں نکلے آں 

راجی ضمیمہ پھڑیائے راہ چوں 

‘‘سَجُویونیورسٹی گراونڈ وچ اج تقریر اے قائد اعظم دی’’

بھنگیاں دی توپ دے کول اسیں جد آئے آں 

چِکڑ چولا مِٹّی جھاٹا

دَو جَنے اوہنوں کھِچ دَھک پُچھدے پئے نیں کُجھ

اِک ہتھ گلما اِک ہتھ جُتی

چِٹی داڑھی چِٹی دھوتی کھُونڈ پھڑی اِک مگروں آیائے

کھُونڈ دے سنبے نال اوہنے چولا چایائے

جھات کے سِر تے کھُونڈ چلایائے

ڈھے گیائے چولے والا

بابے کھُونڈ دا سُنبا اوہدے ڈھڈ وچ کھوب کے کڈھیائے کڈھ کے کھوبیائے

اوہ کھونڈ نوں ہیٹھوں نَپ کُرلایائے

‘‘ہال ووئے، او ہال ووئے’’

بابے نلاں تے پیر رکھ کے کھِچ کے کھُونڈ چھُڈایائے پھیر دھسایائے

پُٹھا سِدھا ہویائے چولا ہلنا بند ہو گیائے

بابے اُتوں کُٹیائے اکدو واریں

جیویں بھرائی کر کے پینجا لیف تلائی کُٹدائے

‘‘ایہہ پچھے کمپوں نکلیا پھڑیا گیائی’’

راجی مینوں مُونہہ کر کول سُنایائے

پگ دے لَڑ نال بابے کھونڈ دا سُنبا پُونجھیائے

وَگ تَگ ٹُرپیائے

میریاں لتاں کنبدیاں نیں پیئاں

میں ضمیمہ اوہنوں وکھاوناں 

‘‘بہار میں پھر مسلمانوں کا قتلِ عام’’

اوہدا ترلا کرن لئی بھئی اسَیں وی تیرے ولدے آں توں ٹھیک تے کیتائے

موٹیاں سُوہیاں اکھاں اوہدیاں آکھن پئیاں

‘‘توں کون ایں مینوں پڑھاون والا اوئے’’

ہتھ وی کنبن لگے نیں میرے

اپنے آپ نوں میں سمجھاوناں 

خبرے ایہنوں پڑھنا ای نہ آوندا ہووے۔

یونیورسٹی گراونڈ بھری ہوئی اے

رَولا ای رَولا

نال اوہ ساڈے اندر وڑیائے

تکدا رہیاں میں اوہنوں 

پر دھوتیاں پگاں بُہت نیں وچ کِتے رَل گیائے خبرے

لاؤڈ سپیکر تے اک اچکن والا گھڑی گھڑی آہندائے

‘‘حضرات خاموش ہوجایئے بیٹھ جایئے قائداعظم تشریف لا رہے ہیں’’

اِک پینٹ کوٹ والا اُٹھ کے گاوندائے:

‘‘متاعِ بے بہا ہے درد و سوزِ آرزو مندی

مقام بندگی دے کر نہ لُوں شانِ خُداوندی’’

اِک دَم سٹیج کھلو گئی اے اُٹھ کے ساری

‘‘آ گئے قائداعظم’’ راجی آہندائے

لوکیں بہہ گئے نیں

سٹیجوں نعرے وجدے نیں

‘‘بدامی سُوٹ بدامی جناح کیپ، اوہ وِچلی کُرسی’’

مدھرا جیہا اِک باؤ بھارا گورا بال نوں اُچا کرکے وکھاؤندائے

اچکن والے گرم جیہی تقریر نِکی جیہی کیتی اے

قائداعظم اُٹھ کے آئے نیں

پہلوں فقرے اُردو اک دو بولے نیں

پھیر آکھیائے ‘‘اُردو ابھی کُچھ ٹھیک نہیں ہے میرا

مجھے معلوم ہے آپ سب کو اس کا تکلیف ہے

مجھے خود بھی تکلیف ہے

میں اس لئے اب انگریزی میں تقریر کروں گا’’

پھیر کڑک چمک آواز دی چھا گئی ہر پاسے

سمجھ تے کوئی نہیں آئی بہتی

اینا یاد اے لتاں کنبنا چھڈ گئیاں نیں

یا دھیان ای میرا اودھر پھیر نہیں ہویا

نکلے آں تے راجی آہندائے

‘‘سجّو تُسیں سُجان پوروں جے چھڈ چھڈا کے لہور نہ آوندے 

ایہہ موقع مِلنا سی؟’’

میں سِر ماریائے اینایاد اے۔