اج کرکٹ گراونڈ وچ پانی چھڈیا ہویائے
جُنڈ لتھے نیں اِلاّں دے
کھَمب وتریندیاں
چُنجاں پنجے ٹھاردیاں،
جُنڈ آکھن نوں میں آکھ تاں دتائے
ہے تے کلیاں کلیاں نیں
بدھی وتھ اکدوجی کولوں ساردیاں
ایہہ متے قانون ہووئے کوئی اِل راج دا،
وتھ گھَٹن لگے تے کُجھ اُڈ ماردیاں نیں اُپر چکر
وارِیاں بدِھیاں ہوسن سَرپَر،
اِکدوجی نال کوئی اواز کلام نہیں
نہیں کھمَب چُھہائی چُنج گھسائی کوئی،
پانی وچ مریندیاں پیر کوَلّے
خبرے ٹُرن زِویں تے ہووے نیں اوکھا،
اساں تے اِلاں ای آہنے آں
وچ بھاویں اِلّڑ ہون گھنیرے
کُکڑ کُکڑی والا کوئی اُلار پسار نہیں پر اصلوں،
چھڈو ایہہ گل پڑدے رہن دیو
متاں میل اتانہہ اسماناں وچ ای ہوندا ہووئے ایہناں دا
بھوئیں تے حکم نہ ہووے
کہیا نہیں کُجھ جا سکدا،
اِل عام بدامی سُنیندی اے
اج کولوں ویکھیاں رنگ عجب گھسمیلا لگائے
جیویں فوج محاذوں پرتی ہووے
کھمباں اندر لُکی ہوئی چِٹیائی وی اج ای نظریں پئی اے
ست اسمانیں سیل کریندیاں ایہناں دی
متاں نیڑ دور کُجھ ہور ای ہووے
کوئی وکھرے رنگ دی ہووے خبرے گل سینتر،
اِل جَنور شکاری سُنیائے
کیہ شکار کریندائے واء وچ کیویں
عام نظر تے آوندا کوئی نہیں
آہو رمز گھات دی سمجھن وی نہیں ہوندا سوکھا،
دوروں واء وچ کیڈی انند بھرپور اُڈاری لگدی اے
ماندیاں جاپن نیڑے ڈُھکیاں
چِھجے چِھجے پَر
ڈَھٹھے قلعے جیویں اُجڑے،
پرسوں دی اک پئی اے موئی گراونڈوں باہر
مِینے جیہے رُکھ تھلّے
نیڑے کوئی نہیں آئی
(کاواں نوں خبرے سیاپا بندیاں سکھایا اے کہ بندیاں نوں کاواں)،
گُجھے چٹاک ایہناں دے نیں جیہڑے
فوج نہ ہووے گوری
جُگاں توں چاڑھ وردیاں جُوہاں پرائیاں لتھی
سُنیائے تُرک منگولاں دے لشکر
ڈھَٹھیاں موئیاں آپنیاں نوں باہوڑدے نہیں سن ہوندے
دیسی لوک ای دب کے کٹَھیاں
نوں گزِیاں خنگاہاں بنا دیندے سن مگروں