نِت چِت نوں بھرماندا
ونڈ پاؤندا کھنڈ کھاندا
چیتا حافظ نافذ آپنے آپ تے
پر زیر زبر دے فرقوں ہیٹھلی اُپر دھردا
کافر مومن مومن کافر کردا
پکا مونہہ بنائی پڑھائی پڑھدا رہندائے
حرفاں بنیا حرف بنیندا
کاگت کتر کھڈونے بال وَلیندا
جان کے بُھلدا بُھل کے جان پچھاندا
نت پِچھا کھول کے اَگا کجدا مُول نہ لَجدا
اُتے سِر دے چَھتر، (مساں تیڑ سَتر) ہے چیتا
سو جیہنوں وار آہندے ہو
اوہ چیتے دی چَتر کار ہے
ساڈے ہتھ وِچ ایہدی پھڑائی دو دھاری تلوار ہے
اسیں ویری کوہندے کُس جانے آں
پچھا تازہ کردے اگوں بُس جانے آں
ایہہ ساڈے ہتھ اُسترا اسیں باندر ایہدے
سو جیہنوں وار آہندے ہو
اوہ خبرے تلوار ہے ایہدی کہ ساڈی سلوار ہے
کیہ کرئیے پر چیتا ساڈی بھین ڈین ہے
ایہدے نال ای بات چیت ہے اُٹھن بہن ہے
کدیں ایہدیاں سُندے کردے ایہنوں پُچھو ایہہ کِتھوں آیائے
نہ نہ کردیاں دس وی جاسی
جیہڑی موت نوں آہندائے ماسی اوسے وار دا جایائے