عام جیہا کم لِکھن ہے
جیویں وسن مینہاں
عام جیہے کم سوکھے کوئی نہیں ہوندے
تپ کے سمندروں پانی چڑھدائے کَوڑا
واء بن ویندائے
متھا مار پہاڑاں کردائے آپ نوں پانی
کوڑ جھڑیندائے
عام جیہا کم لکھن ہے
جڑھاں راہیں پتراں دا جیویں وَترن ہے
ٹُکر تھیون کنک دا رُوڑی تھیون
کِھیر تھناں وِچ نِترن جیویں
جُڑ نکلن ہے خلق دا حق نتارن کان
عام جیہیاں کماں نوں سوکھا سمجھن والے عام نہیں رہندے
عام رہن وی سوکھا کم جو ہویا کوئی نہ
سو جیہڑے ویلے جاپے لِکھن سُکھالائے
لِکھن چھوڑ دیو
ڈرو حرفاں توں
ہوئی ہونی چوں پھیر تُساں نوں جیہڑے نویں نہیں ہوئے
وِچ وڑ تُساں نوں نویاں جیہناں نہیں کیتا
بنیرے لتھے نیں آن
اندر اوہناں تاڑ گھدائے
مُردار کوئی