کرئیے آؤ اگیری
حرف جُڑے نیں
آپے گال کریسن
حرف لفافے نہیں
جو کھول کے کوئی درد اساڈا پاوے
سنیہا
‘ ٹکر پانی سانجھا کرن دا
آپ سنے ہوراں نوں سناوے
حرفاں وِچ بُل ہوندے نیں
بل بولن دے نال
چُمیندے وی نیں کناں دیاں بُلاں نوں
کناں وِچ بُلاں دا ہوون
کوئی اچنبھا گال نہیں
بُلاں نوں کَن نہیں ہوندے؟
چمن سمجھو بولی اے حرفاں دی آپنی
مُولوں سچی
اصلوں کُوڑی
سچ کُوڑ وِچکار تلکدی دو دلیلی
پُوری نت ادھوری
جوڑئیے حرف کہ جُڑدے نیں جد تائیں ایہناں دی مرضی اے
ہور حرف کیہ کر سکدے نیں
ٹُکر سوَلّا نہیں کر سکدے
پانی نرویا نہیں کرسکدے
وِس چھان نہیں سکدے واء وِچ گُھلدی
بُلاں نوں بُلاں کول تے کر سکدے نیں
کُوڑی سچّی دو دلیلی بول ادھوری پوری
جیوں مر سکدے نیں
سو آؤ حرفاں نوں رَلئیے
اگیری کرئیے