دعوت منگنی دی
کُڑمائی جیہنوں کدے آکھدے سن
ٹکہ ٹک بریانی کڑاہی تِکہ چِکن قورمہ نان کباب سِیخی
میزاں کُرسیاں دائریاں وِچ لگیاں
حلوہ رس ملائی پُڈنگ سیویاں فرنی گلاب جامن
سُوٹ بُوٹ ساڑھی ٹایئٹس ہِیل ہائی،
نُکّر وِچ سٹیج تے اوہ بیٹھا نِکی تُوتڑی پیا وجاوندا اے
کسبی نال نقارچی سنگتی اے
وائلن بانسری طبلے والے نال بیٹھے
واری آپنی پئے اُڈیکدے نیں
کم فلمی جدوکا کمزور ہویائے
مہندی منگنی اُتے گذران ہوئی
فلمی گیت پرانا وجائے پیا
‘‘چناں سچی مُچی تیرے نال پیار ہو گیا وے چناں
سچی مُچی’’
ساہ پُھوک کے سُراں نوں کرے روشن
وِچ وِچ تان وی لائے
ہے اکھیاں وِچ کوئی بھیت جیہا
دِسدے وِچ جیویں کُجھ ہور ویکھن،
ہولی ہولی میزاں ہوئیاں ویہلیاں نیں
واری کھاون دی آئی ساز والیاں دی
سارے بیٹھ گئے نیں وِچ اوہ کوئی نہیں
خبرے ہتھ شتھ دھون لئی گیا ہووے
گھر جان لئی باہر میں نکلیاں
نال سڑک دے گھاہ تے اوہ بیٹھائے
اکھیاں وِچ اوہ مِیسنا بھیت کوئی نہیں
سہج نال پئیاں گھاہ ٹوہندیاں نیں