کھکھڑی اجکل وِکدی اے پئی اِک نویں
اندروں باہروں بگّی
اوہا سائز سواد وی اوہا لے لؤ جِتھوں مرضی
چائنا توں آئی دسدے نیں کوئی ہٹیاں چھابیاں والے
کوئی اِنڈیا توں
میں پُچھیا یار پُرانے اپنے گوگے گُھوک نوں
تپڑ سکُولے کٹھے پڑھے اسیں
تپڑ تے بیٹھیاں گوگے سَوں جانا
ناں گُھوک پے گیا
گل کرو تے جواب جاگدا آونا
ماسٹراں کولوں کُٹ وی بتھیری کھانی
جیہڑی جاگ اوہ منگدے آہے
گوگے نوں اوہ نہ آنی
چوتھی کیتی پیو مر گیا
سُتا سُتا گوگا ہٹی جا بیٹھا پھل ویچن
اسیوں پار ہویائے ہُن
پھیرا مزنگیں پوے تے مِل میں آوناں
کھکھڑی دا میں پُچھیائے تاں بولیائے سُتا سُتا
‘‘میرے وانگوں رہیوں میاں توں وی بھولا ای
کھکھڑی نال ویاہے اساں دوئے لگے آئے
ہوئی ایہہ کھڑبُوجا
اساں گل گولی نہ
ہُن کھکھڑی نہیوں میاں ایہہ کوکا کولا ای’’