روز اوہ اندر آ وڑدا ہا
چِھٹ سریر وِچ
لتاں اَٹھ چوپھیرے
لتاں سن بانہیں سن؟
متے اِکو ای ہوون
چُکن دھرن تے ٹُرن پِھرن کم اِکو ای ہووے
اوہدے لئی،
روز اوہ اندر پھیرا پاوے
اوہا ای ہا کہ ہور ہزاراں اِکو شکلے بھین بھراواں وِچوں کوئی
جدوں گوہ نال ویہندا نہ ہوواں ہور کِسے کم لگا
تاں میں کِھجنا
مگروں کیوں نہیں لہندا ایہہ خبرے کیہ اے
ڈرنا وی کُجھ وِچوں
کِھج ڈر دا ای اِک انگ اے متے
(کِھج کَج وی ہویا ساؤ سیانی والا کَھسم دی ٹُٹ بھج تے)
اج میں پڑھاں پیا اخبار سویرے
ویروے
سیاسی دھرنیاں دے
شام عراق وِچ لگیاں جنگاں دے
امریکہ دے جگ چلاونے صدری الیکشن دے
دن رات دے ٹیسٹ میچ وِچ ہار جِت دے
اوہ دِسیا کُرسی میری ول آوندا
خبرے ہور کِسے کم نِکلیا ہووے
میں اخبار وِچوں
چونڈھی کاغذ لاہ اوہدے ول ہویاں
کڈھاں ایہنوں بیوقوف نوں باہر
ویلا ویکھدا نہیں
کیتو نسن دا چارا
میں نپ لیا
تاکی کھول کے سٹن اُٹھیاں
جاپے مینوں میں سپاہی نے
گولی چلا کے دُشمن اُتے حکم تے افسر اپنے دے
لاہ چھڈیائے جی اپنے جیہا ای کوئی