فرید بھنڈار

کَل جُگ چڑھیا

کرنی دو ڈَک گھال سنبھال بنی

سوچ کرم1 دو ہو مُونہہ پھیر کھلوتے

جَنی جَنا دو جُون جناور

نَر پردھانی بُرخے وِچ مَل

تخت اُتے تلوار حکومت تاج فلسفہ

تھال ویدانتی بالن شُودر

چَکّی بانھے دسترخانے ڈھال ارسطو چال سکندر

آڑھت منڈی کانٹ تے نِتشہ پَلّہ ڈنڈی

اُپر تھلّے ہِٹلر ہیڈیگر

گھان فلسفے کاڑھ گھچولیا سَچ وی اُبل ڈُلھے

خلق ہلاوے جدوں شاہیاں

ہیگل وِچوں نِکل مارکس تَد آپ اُتھل بَن ہُلّے

سِندھڑی مَنّے1 سانجھ تندوری عِلم عنایئت مَنّی2

ناتھ پہاڑوں ڈَھلدا، رنگپور نانک جوگی آوے

رامانندی تانا پُٹھا تَنے کبِیری کَھڈّی

گھول دواتِیں لال سیاہی قَط قلم منصُوری

خط اَنَ الحق اِبنُ العربی شرع شریف لکھاوے

ابو الفضلِیاں گلیاں اندر دُھکھے دھمال حُسینی

کوٹھی لگّا بھگت سِنگھ لِکھ لیکھ نویں ورتاوے

1- کرم= عمل، کم-

1- مَنے= کنڈھے- 2 - مَنّی= روٹی-