(1)
]ویلا 1950-55- پِڑ- گبھرو اُٹھ بولیا اے[
گبھرو: میرا ناں اے جی…… کوئی سمجھ لؤ……
(پِڑوں اُٹھ دو ہور گبھرو نال ہوئے نیں)
ایہہ میرےیار نیں - ایہناں دے ناں …… چلو رہن دیو- وڈیاں رکھے سیانیاں کولوں پُچھ کے سیانیاں دسے کتاباں پھول کے پھیر سرٹیفکیٹاں وِچ درج ہو گئے- اسیں ہُن آپ رکھ لئے نیں اپنے- میں آں جھمل- ایہہ رمن تے ایہہ رتل- وٹاندے وی رہنے آں پر ایس ویلے ایہو نیں - میں لہور داں - پیو ریلوے وِچ ٹکٹاں چیک کردا رٹائر ہویا اے- نِکا جیہا گھر اے بھاٹیوں اندر-
رمن: اسیں دوئے پِنڈ تھاں دے آں - میرا پیو راہک- مزیرا-
رتل: میڈا ترکھان
رمن: گھر دیاں پڑھنے پایا- پڑھائی دا شوق ویکھ کے لہور گھلیا-
رتل: اساں ٹیوشناں کر کر لہور دا خرچہ لاہیا-
رمن: مگروں گھر دے وی ساڈے پِنڈ چھڈ کے لہور ای آ گئے- نکے موٹے کم کار کرن لگے ایتھے-
رتل: ادھ سُکھالے ادھ جنجالے- ویلا پئے لنگھاوندے نیں -
جُھمل: سانوں ترونہہ نوں گھروں کم دِتا گیا اے پڑھ کے اُچی کُرسی تے بہن دا-
رتل: اساں دونہاں ڈِپٹی کمشنر ہو کے پِنڈ دا دورہ کرنا اے-
جُھمل: میں ریل دا چِیف بن سپیشل ٹرین تے چڑھنا اے-
رمن: کم تے اوکھا نہیں - اسیں پڑھائی وِچ ٹَوپ تے آں - فرسٹ سیکنڈ تھرڈ-
جُھمل: تھرڈ سیکنڈ فرسٹ…… کم تے کھبے ہتھ دائے…… پر ہُن-
رتل: ہُن کھبا ہتھ نہیں مندا- آہندائے میرا تے کم ای ہور اے- اُتوں سجا وی کھبا ہو گیائے-
رمن: کیویں ہویا- تُسیں ویکھ جاچ لؤ-
جُھمل: (اگوں تریوے آپس وِچ گلیں لگ گئے نیں جیویں)
تریوے سکولوں کٹھے کالج آئے- ہُن چوتھا سال اے ایتھے-
رتل: پنجویں چھیویں وِچ عبدالحلیم شرر تے نسیم حجازی پڑھ بیٹھے آں -
رتل: حالی تے اقبال وی دسویں اپڑدیاں - لِکھن دا ٹھرک-
رمن: ہُن کرشن چندر تے منٹو بیدی مَوڈل نیں ساڈے
رتل: راشد، فیض
جُھمل: نالو نال نیں، شاء شیکسپیئر شیلے ورڈزورتھ
رتل: لارنس، ٹی ایس ایلیئٹ
رمن: نالو نال نیں غالب میر تے حافظ رُومی
جُھمل: سعدی خسرو جامی نظامی
رتل: جِتھے کِتھے وی دس پیندی اے کِسے ادبی اکٹھ دی جھٹا پٹ اُڈ کے جا بہنے آں اوس بنیرے-
جُھمل: اج میں تے رمن- کالج گراونڈ وِچ آں ……
(دونویں ٹہلن لگ پئے نیں -) رتل کتھے گیائےیار
رمن: یونیورسٹی لائبریری
جُھمل: چلیئے اسیں وی؟
رمن: چھڈ یار چُگ لَین دے کبوتر نوں اوتھے-
(رتل وگا تگ آیائے، گراونڈں باہر ای اے تے)
جُھمل: کیہ چُگیا جے مِسٹر کبوتر
رتل: (چمک کے) فرنچ لٹریچر- آ جاؤ- فرنچ کلاس شروع…… یونیورسٹی ہال دے اُتے- ناں لکھا آیاں تہاڈے- فرانس توں آیائے پڑھاون
رمن: کون؟
رتل: ڈاکٹر رحمت علی
(2)
(تریوے وگ تگ ٹُردے نکل گئے نیں)
]یونیورسٹی ہال دے اُپر کمرہ- پؤڑیاں اُتے بنچ دو پاسیں - کھبے بنچ تے پنج ست کُڑیاں - سجیاں بنچاں تے پِچھے تائیں دس پندراں مُنڈے-
ایہہ وی تریوے سجے پاسے پِچھے جا کے بہہ گئے نیں - بوہا کُھلیائے- ڈاکٹر رحمت علی آیائے- فیلٹ سُوٹ- میز تے فیلٹ دھریوس- گورا- مونا- مدھرا نہ لما، پتلا نہ بھارا-[
رحمت علی: مائی نیم اِز رحمت- آئی ہَیو کم ٹُو ٹیچ یُو فرنچ- فرسٹ وی ہَیو ٹُو نو سمتھنگ اباؤٹ فرانس ویئر دِس لینگویج از سپوکن اینڈ رِٹن-
(ہولی ہولی مُونہہ لال ہوگیاس)
اوئے اُترو تھلّے (کُوکیائے اوہ میز دے پِچھوں اگے آ کے-) رل کے بیٹھو…… اِک دُوجے نال جُڑ کے- وِچ وڑ کے-
(اسیں سارے حیران- اُٹھ کے تھلے کھلو گئے آں)
رحمت علی: (کُڑیاں نوں) اُٹھو تُسیں وی- رل بیٹھو…… سبھ نال- برابر ہو کے- رل بیٹھن وِچ کاہدی شرم- وکھرے ہو بہن جے شرم دی گل- (کُڑیاں وی اُٹھیاں نیں - سارے بہہ گئے نیں - سبھ حیران- کُجھ خوش وی، وِچ وِچ ذرا ذرا شرمندے وی-)
رحمت علی: اوئے کیہ بنیاں تہانوں
(عجیب جیہا کوئی ہِرکھ اے واج وِچ، ترلا جیہا وی)
سوچو کیہ پئے کردے او- اپنے آپ نال- سَو ورھے بتھیری ہو نہیں گئی؟ ہور کِنی کراونی جے-
(3)
(تریوے مُڑ پِڑ وِچ)
جُھمل: ہَولی ہَولی لالی اوہدے مُونہہ توں لہہ گئی- فرنچ دی گل مُڑ چل پئی-
رمن: پنجابی وِچ فرنچ فرنچ وِچ پنجابی- وِچ وِچ رُک رُک سبھ دے ناں پُچھے نیں وارو واری- اکھیاں چ اکھیاں پا کے-
رتل: بِھج کے پڑھایائے- کلاس مُکی اے- سر تے فیلٹ دھری اے- ٹُر گیائے- اسیں وی باہر آ گئے آں -
رمن: یار اِک گل کراں …… ایہہ نری سانوں کٹھیاں بٹھاون دی گل نہیں مُنڈیاں کُڑیاں نوں، کُجھ ہور وی اے-
رتل: آہو یار- مینوں وی ایہو ای لگدائے-
جُھمل: چلو بہہ کے گل کرنے آں -
رتل: چلو-
(4)
(یونیورسٹیوں نِکل تریوے ٹی ہاوس اگے آئے نیں)
رتل: (اندر جھاتی ماریُس-) اندر تے بھریا پیائے-
رمن: چھڈو باہر ای ٹھیک اے- ایتھے کندھ نال-
(بہہ گئے نیں -)
جُھمل: آہو جگہ ہو لئے-
رمن: نہ ای ہوئے تے چنگائے یار- باہر ای ٹھیک اے-
(عاجز محشری آیائے- پؤڑی پیر دھریائے تے ایہناں ترونہہ نوں باہر بیٹھیاں ویکھ ایہناں ول ہویائے- پینتی چالیہہ دا اے- ٹائی کوٹ- نکی فیشنی داڑھی-)
عاجز محشری: کیوں میاں - اندر آؤنا-
رتل: اندر تے بھریا پیا اے جی-
عاجز محشری: کیوں قے کر دِتی اے کسے بے ہوش نے- بے ہوشاں دی اکثریت ہوئی-
رمن: نہیں جناب عاجز محشری صاحب- قے شے کوئی نہیں ہوئی-
عاجز محشری: تے پھیر باہر کیوں بہہ گئے او کندھ نال لگ کے- کُٹ پئی اے اندروں -
جُھمل: نہیں جی بس انج ای- دِل نہیں کردا اج-
عاجز محشری: آؤ میں کہہ کے چاء بنواناں - دِل دی دوا جے اوہ-
جُھمل: قے نہ کر دئیے-
عاجز محشری: کر دینا- چنگائے معدے صاف ہو جان تے-اُٹھو-
رتل: نہیں عاجز صاحب ڈر ای لگدائے-
عاجز محشری: پر کیہدے کولوں میاں - کس گل دا؟
رتل: کُٹ نہ دئیے نہ کِسے نوں اندر-
عاجز محشری: (ہسیائے) چلو مینوں کُٹ لینا- جے ایڈے ہتھ کُھل گئے نیں تہاڈے تے-
جُھمل: تہاڈا مطلب اے محشری صاحب تہاڈی شاعری کُٹ کے پھکیئے
عاجز محشری: ہاں ہاں ضرور- لگدائے تہانوں کُشتے دی ضرورت ہے اج-
(ہسدا اندر جاون لگائے- دائم عنبر آیا اے- پنجاہ پچونجا دا- اچکن پجاما چُوڑی دار)
عاجز محشری: لؤ جی حضرتِ دائم عنبر- سمجھاؤ ایہناں مُنڈیاں نُوں
دائم عنبر: کیہ کہندے نیں
عاجز محشری: اندر نہیں جاندے
دائم عنبری: کیوں جوانانِ مِلّت
رتل: عاجز صاحب شرمندہ پئے کردے او سانوں جناب- اندر تے جگہ ای کوئی نہیں -
دائم عنبر: آؤ بنا دیناں میں جگہ تہاڈے لئی
رمن: اسیں جناب کِسے نوں اُٹھا کے نہیں بہنا چاہوندے-
دائم عنبر: کِسے نوں نہیں اُٹھانا میں - بس تہانوں بہانا اے تہاڈی اپنی مخصوص جگہ تے- آ جاؤ……
(تریوے نہیں ہلے) رہن دے محشری- تینوں پتہ اے ایہہ اختر سُرخچو دے بالکے نیں - اوہو پِھردائے ہر ویلے ایہناں دِیاں اکھاں وِچ- ایہناں نوں ہر پاسے ریڈ لائٹ نظر آوندی اے-
(دونویں ہسدے اندر چلے گئے نیں)
رتل: چلو یار چھڈو ایہہ ریڈ لائٹ ایریا- گول باغ چلنے آں -
(تریوے اُٹھ ٹُرے نیں)
(5)
]گول باغ- رُکھ ہیٹھاں - تریوے چُپ[
رتل: رَل بیٹھن انج سی جیویں رل اُٹھن ہووے-
رمن: لگا کُڑک بیٹھے آں کِسے نویں آپے نوں سیونے آں پئے-
جُھمل: لفظ جیہڑے دھک دھک پرے پرے کیتے اساں، ساہویں آن کھلوتے نیں اکھاں وِچ اکھاں پا کے-
رتل: چیتا آ مِلیائے
جُھمل: سَو ورھے
رمن: ہزاراں ورھے…… کیہ ہویا…… کیوں ……
جُھمل: آپو دھاپ دی بھاج- چِبھو چِبھ اے اندر ساڈا- ہر جی دا-
رتل: اندر رہیا ای کوئی نہیں - اِک اے اندر باہر- بے حدا چِبھ اوہدا آر پار نہیں دِسدا کِسے نوں -
رمن: دِسے کیویں - اکھاں نوں جمدیاں چِبھ دے شیشے چڑھ جاندے نیں -
جُھمل: عجب ہوئی اے اج- لفظ کفن ہو گئے سن جیہڑے آپنے آپ دا- اِک دم سانوں مِلن آ گئے نیں - کہندے نیں کفن تُساں ایہنوں جاتا ایہہ تے کفنی اے-
رتل: وکھ وکھ بیٹھن وِرلے وِرلے پتہ لگا اے اج کیہ اے-
جُھمل: ایویں ای بہندے آئے- کدیں خیال ای نہیں آیا……
رمن: کیہ
رتل: ایہو کہ وکھ وکھ ہاں - وکھ وکھ رہو پئے تے خیال وی نہ آوے- عجیب اے-
جُھمل: کلاساں لگدیاں ای ایسے لئی نیں
رمن: پڑھن والے ماتحت، پڑھاون والا افسر-
جُھمل: دوئے ماتحت
رمن: کیہدے
رتل: کِسے اَن ڈِٹھے افسر دے- ہر کِسے اپنی ماتحتی نبھاونی اے
رمن: تے افسری وی، اِکو سَٹّے-
جُھمل: دوستی یاری کیہ اے-
رتل: رنگ اے افسری ماتحتی دا- ہر اِک نے بچاونا تے ودھاونا اے اپنی ماتحت افسری نوں تے افسر ماتحتی نوں -
جُھمل: اپنا آپ کِتھے
رتل: ایسے رنگ وِچ
رمن: نہ ای ہویا نا
جُھمل: ہے پر ہور ہو گیا ہویا اے
رمن: ہور ہوراں نوں پئے مِلدے نیں
رتل: آیا تے اوہ وی ہور ای ہو کے پر اِکدم کُجھ ہو گیا اوہنوں، بھن دِتوس اوہ ہور
جُھمل: اپنا وی تے ساڈا وی- جھٹ کُو انج لگا جیویں کپڑے لہہ گئے نیں - پر نال ای جاپیا- ایہو تے ہاں اسیں -
رمن: عجیب جیہی نیڑ اے
رتل: نہ نڈھے نڈھے نیں نہ نڈھیاں نڈھیاں - کوئی کُھلی تھاں اے بے اوڑ تے رُکھ آں سارے-
رمن: مُڑ مُڑ اُگنے آں پئے اِکدُوجے وِچ- کوئی جُھمر اچرج پیا پَیندا اے-
رتل: کوئی کھیڈ عجب جیہڑی کدے نہیں کھیڈی-
(اگلی گل پروفیسر اختر بارے ساری تریوے سُنیئراں نال کریندے نیں)
جُھمل: انھیرا پیا ہوندا اے- اسیں اُٹھے آں - گول باغ وِچوں نِکل ٹُرے آں - ویکھیائے تے پروفیسر اختر دے گھر ہیٹھ کھلوتے آں -
رتل: پروفیسر اختر سانوں انگریزی پڑھاؤندے نیں - وجری جگت سلیکھ دے- آپ وی اُردو دے شاعر- پنجابی وِچ وی لِکھدے نیں - کمیونسٹ مشہور نیں - کالج وِچ سُرخچو اکھواوندے نیں - ایہہ اُپرلے فلیٹ وِچ رہندے نیں ایتھے، بخشی مارکیٹ- ہیٹھاں سبھ کھڈاونیاں دِیاں دُکاناں نیں تھوک پرچون-
جُھمل: پروفیسر اختر دے دونویں کمرے تُوسے پئے نیں کتاباں نال- بہن والا وی سَون والا وی- غُسل خانے دی الماری وِچ وی کتاباں نیں -
رمن: ہفتے وِچ اِک واری اسیں تریوے جانے آں - دوستی جیہی اِک رنگ دی ہو گئی اے- کھانا کھا بیٹھے نیں - کھانا ہیٹھوں ہوٹل توں آوندا اے- ویلا ہو جائے تاں سانوں وی نال بہا لیندے نیں -
رتل: چھیتی کھا لیندے نیں - ساری رات پڑھن لِکھن دا کم جو ہونا ہویا-
جُھمل: مِلن والے وی آونے ہوئے، ساتھی- شاعر، لِکھیار، ایکٹر، ڈائریکٹر سیاسی ورکر-
رمن: گرما گرم بحث مباحثے
جُھمل: لڑائیاں صلح صفائیاں -
رتل: اسیں اُٹھ آونے آں - کدیں کدیں آہندے نیں نہیں بیٹھو- مِلا وی دیندے نیں کِسے کِسے نال-
(تریوے پوڑیاں چڑھ کے اپر آ گئے نیں - پروفیسر اختر کھانا مکائی بیٹھے نیں - ترونہہ نوں ویکھ کُھل ہسّے نیں -)
پروفیسر اختر: ٹکّر گیائے نا تہانوں رحمتا فرانسیس-
رتل: کیہنے دسیائے تہانوں
پروفیسر اختر: مَتھیاں تہاڈیاں تے لِکھیا ہویائے
(ہور کُھل کے ہسے نیں - پِچھے ٹُوٹی توں ہتھ دھو مُڑ آ بیٹھے نیں) بتھیرے نیں دسن والے- پتہ جے کون اے
جُھمل: جِنا ویکھیا اے اونا ای پتہ اے سانوں -
پروفیسر اختر: اوہ تے میں پڑھ ای لیا اے مُونہاں تُہاڈیاں توں -
جُھمل: تُسیں ہور دسو-
پروفیسر اختر: گجراں آلے دا کشمیری- رحمت علی- ڈاکٹر بنن لہور آیا- تیجا سال سی میڈیکل کالج- غدر پارٹی دا زمانہ سی- ورلڈ وار لگ گئی ہوئی سی- انگریز راج توں آزادی دی لہر اُبھری ہوئی سی- کُجھ لوک مُلک چھڈ کے یورپ امریکہ گئے ہوئے سن- اوتھوں آزادی واسطے لڑن دا چارا کردے سن پئے- کابل وِچ آزاد ہندوستان دی عارضی حکومت وی بنا لئی سی اوہناں - راجہ مہندر پرتاپ، برکت اللہ، عبیداللہ سندھی لیڈر سن- لہور وِچ وی ایس لہر دا زور سی- نوجواناں وِچ- کُجھ مُنڈے کالج چھڈ کے کابل نس گئے- ایہہ رحمت علی وی سی اوہناں وِچ- کابل والیاں ایہنوں اِک کوٹھے تے ڈک دِتا-
رتل: قید کر لیا؟
پروفیسر اختر: اپنے کم تے لا لیا ایہنوں - بالاں نوں انگریزی پڑھا- سوچیونیں انگریز نال سودا ہو گیا تے اودھر موڑ دیاں گے- رُوس نال ہو گیا تے اودھر ٹور دیاں گے- رُوس وِچ انقلاب آ گیا- ایہنوں وی سُوہ لگ گئی- برفاں پئیاں - تہانوں پتہ اے کابل وِچ برف بہت پیندی اے- ایہنے موقع تاڑ کے برف دے ڈھیر وِچ چھال ماری کوٹھے توں -
جُھمل: بچ گیا؟
پروفیسر اختر: تے کیہ ہونا سی برف دے ڈھیر وِچ پین نال-
رمن: اوہناں پھڑ نہ لیا؟
پروفیسر اختر: نہیں - رِڑھدا کِھڑدا تاشقند اپڑیا- اوتھے پڑھیا پھیر ماسکو- ذہن بدل گیا- ہندوستان تے آ نہ سکیا- رُوسی کمیونسٹ پارٹی نے اپنے کم تے لا لیا- جرمنی گھل دِتا- تِن سال اوتھے رہیا- پھیر پارٹی ولوں فرانس گھل دِتا گیا- ایہنے نال اپنا کم وی چلایا- فرنچ سِکھی- پی ایچ ڈی کر لئی- اوتھے ای رہیا- انگریز گئے نیں تے واپس آ گیائے- اوتھے کردا وی کیہ- فرانس دے حالات ہور نیں ہُن- ایہدی سوچ پُرانی اے- ایتھے وی کیہ کرنائے ایہنے- ایتھوں دے حالات دا ایہنوں پتہ ای کوئی نہیں - فرنچ پڑھا کے گھر چلاونائے چلاوے- پر نال ایہہ پولیاں پولیاں گلاں کیوں کردائے بھولیاں -
رتل: ساڈے نال تے کوئی پولی بھولی نہیں سو کیتی-
پروفیسر اختر: ایہو آکھیا اے نا تہانوں - مُنڈے کُڑیاں کٹھے بیٹھو- ہُن ایہہ کوئی گل اے- کیہ ہو گیا کٹھے بہن نال- کیہ ہوندائے- سوچ بدلدی اے؟ عمل بدلدائے؟
کِتھے نیں اوہ کُڑیاں پتہ اے تہانوں -
جُھمل: ساڈے نال نیں
پروفیسر اختر: (اُچی ہاسا) پڑدے وِچ-
رمن: پڑدہ تے لہہ گیا اکھیاں توں - تاں ای تے پتہ لگا اسیں نال آں سارے- وکھ وکھ نہیں -
پروفیسر اختر: پڑدہ لاہیا نہیں اوہنے پا دِتائے- جو ہے اوہ دِسدا نہیں پیا، ویکھدے او پئے اوہ جو ہے ای نہیں - ایتھوں دے حالات دا اوہنوں اُکّا پتہ نہیں - اُچی اُچی اوئے توئے کرن لگ پیا، میرے نالوں ودھ کون اے پنجابی زبان دے حق وِچ-
پر کلاس کلاس اے سڑک سڑک اے-
(دروازہ کُھلیائے- پروفیسر اختر دے مِلن والے آ گئے نیں - وِچ عاجز محشری تے دائم عنبر وی نیں - رمن رتل جُھمل اُٹھے نیں چلن لئی-)
پروفیسر اختر: بہنا نہیں؟
رتل: بس جی- وقت ہوگیائے-
عاجز محشری: ایہناں دا ہُن وقت ہو گیائے سڑک تے بہن دا- (ہاسا)
پروفیسر اختر: سبھ تے آوندائے ایس عمرے- لنگھ جائے گا-
(تریوے پوڑِیاں ڈھل کے ہیٹھاں آ گئے نیں)
رمن: یار اج پروفیسر صاحب ساڈے کُجھ اوپرے اوپرے جیہے نہیں لگے-
رتل: کُجھ پولے جیہے
جُھمل: کُجھ بھولے جیہے-
(تریوے ہسدے بخشی مارکیٹوں باہر نِکل گئے نیں)