نِکّا پتلا
سُکّے پتر سہیڑ چدر تے دھری آوے
بولی آوے نالو نال
جاپے ایہنے جلسہ دوالے لایائے کوئی اَن دِسنا،
بُھنجے وِچھی دے دو سِرے
ہتھاں وِچ نَپّی کَھلا پیا سُندائے وڈیرا بھارا
لنگھدا میں جَھٹ رُکیاں
کر کے اکھیاں چار وڈیرا مُسکایائے
ونج بیٹھاں میں پرے بنچ تے
گھڑی پِچھوں دوئے لنگھے نیں کولوں
وڈا بانس نال بدّھا ڈھینگر چائی مگر اے
سُکیاں پتراں دی پنڈ کنڈ تے لائی
نِکا بولدا اوویں اگیرے
‘‘ساہ لؤ
کِدھرے نہیں پئے جاندے
مِٹیؤں مِٹی ہاں
لہن لگن دا انگ ہے
سمجھو آئے کہ آئے،
سُن کے ایتنی اُڈ گیائے رنگ تہاڈا
کاڑھ چڑھائے رنگ اُڈاون
رنگ بے رنگی لاون آہر اساڈا ہے
سکھنیاں ہتھاں دی بَیعت بھنڈارا
ونڈنائے اساں جی جی نوں
گئے نہیں کِدھرے
آئے کہ آئے لؤ’’