حساب چ مَدّی سبھ توں اگے
میرے نمبر تھوڑے آونے
فیل ہوون دا دھڑکا ہر دم
ہور انگریزی اُردو وچ میں اوّل رہنا
ماسٹر نُور محمّد کہنا
''اوئے مہر تیرے تے قہر حساب دا ہونا ای''
مُنڈیاں ماسٹراں سبھ مہر ای مینوں کہناں مہر صاحباں دا ہوون پاروں
ناں نہ کسے وی لینا
سَل جیہا مینوں رہنا
امتحان وچ ہر کسے لڑنا مَدّی مگر بہن لئی
مُڑ میرے لئی تھاں کرنی سبھناں
میں مَدّی کولوں پُچھ پِچھے دَسّی جانا
پُچھن مَدّی نوں چنگا نہ ہا لگدا
پر کِھجدیاں کَھپدیاں دَسّی آونا اوس
انگریزی ویلے میں بِن پُچھیاں دَسنا اوہنوں
مَدّی عام وی کِھجیا کِھچیا ای بولدا ہا جے بولے تے
اِک دِیپے پِھینے نال پولا جیہا ہس لینا اوہ وی کدیں کدار ای
دِیپا پِھینا اوہدا عاشق سمجھیا جاندا ہا
مَدّی دے ککیاں والاں وچ آہی اک لِٹ ذرا لمیری
دِیپے موڈھا مار میرے کولوں لنگھدیاں گانا
بودی تول نا مہرا کوئی باہمن دی
ناں دلیپ ہا
نک ذرا جیہا نِیواں ہونائے ناساں بھورا کُھلیاں
ناں تے پَینا ہا کوئی پِھینا پے گیا
سَن سنتالی چڑھ گیا ہویائے
اخیرلا امتحان اے شہر چھڈن توں پہلاں
پرچہ دے کے مَدّی دِیپے پِھینے نیڑے ہویائے
دِیپے پِھینے پرت گُھوریائے اوہنوں
''مُسلماناں نوں بہال توں پِچھے
''سُنتی والا تینوں سُکھاندائے''