نقلی پہاڑی اپر بیٹھے
نقلی جِھیل کنارے
ویہنے آں نقلی تارے
ٹِکٹاں پُوریاں ہوون تاں چُھٹدی اے
ٹھیکیدار دی بیڑی
ڈھائی چکراں دی پھیری
اُٹھدی اے چَھل گُھمیری پِچھے
چَھل وَل نیں دِن تارے
ہسدیاں چَھل کلیاں
ہر چَھلڑی پئی سُرج دا مُکھ چُمیندی اے
کہ سُرج ہی آپے ہر چَھلڑی وچ ڈَھل چَھلڑی پیا تِھیندا اے
متاں نقلی جِھیل ای گھر اے اصلی سُرجن دا
اگ پانی دا بانا لاوے
بانے وِچ نہ انگ سماون ڈُلھ ڈُلھ پئی وکھاوے
متاں اصلی سُرج تے اصلی تارے
جو عرشاں تے لَٹ لِشکار وِکھیندے نیں
سنکھ اَسنکھ اوہ بے قناتیاں کائناتاں
ہوند انہوند جیہناں دی کال اکال ہے
کُل سمندر اصلی نقلی وچوں کِھڑیاں چَھل کلیاں نیں
جیویں اج تُوں میں ہاں
متاں نقلی جِھیل ای ہے
پانی مِٹی واء بھاء دا رَل بھرواسا
ہوند انہوند دی کِکلی ہاس منڈاسا