پُچھنا کیہنوں ایں مَولا
میلہ اے مِل پئو تُوں وی
پر حُکموں باجھ مِلے کوئی کیویں
ایہہ حُکم اوپرائے مَولا؟
آپنا ای تار نہیں؟
سکھنے ہووو تاں تُونبا بولدائے
لدی جاؤ تاں تکڑ تولدائے
آہو
سِندھوں ٹُریا آوناں سیہونوں
نہیں، ایسے لھور داں، ہیرا منڈی جمیاں
کَیری اکھ تے ککی داڑھی ویکھ کے بُھلیائیں مَولا؟
خورے کوئی کشمیری سی کہ تُرک پٹھان انگریج سی کوئی
سارے ای سن متے
"ست سہاگناں رل مِل چکی گلا پایا"
ماں آکھناں "وِیر وے"، آہا، پُتر کدیں نہ سدیوئی مینوں
"وِیر وے اصل حلال دا سوئی جیہڑا رلیا ہووے
تت ست نال مِلیا جیہڑا سبھ دا سانجھا
تینوں کُل مخلوق دی سونپنا
میں واری
کُل آواگون دی کُھل تینوں میریوں اندروں"
لیکھا اوکھا اے مَولا
اَسِیاں ورھیاں داں کہ اَسِیاں گھڑیاں دا
اوہ لھور ہور سی
بُھوا ساڈی گول رُپیہ ہٹی چھڈ آونا
مہینہ جِیاں نے رجنا
پاؤلی مُڑ آونی
دھیلہ ریڑھ کے یاراں میلے جا وجنا
دُھوڑاں رنگ دینیاں
نہ تھکنا اوہ دھیلہ
کنڈ ننگی کر جاندا سی میہنا مَولا
دُھروں جُلاہ کُبھار کوئی موچی نائی
کیتی کار چُبارے گھسّے چڑھنی
شاہاں دے چودھریاں دے
ہماتڑ ہیٹھ کھلوتے میہنا ہار چائی
ہُن کیہ میہنائے
جو وِک جائے سو لاڑی
بُھکھیاں نوں بُھکھ مرن دی چُھٹی
کانواں لُٹی
رجیاں نوں رج مرن دی
پر اوہو ای لھور نہیں مَولا ایہہ وی، اوسے ای ڈِھڈ دا ڈُھوا؟
ایہہ پھلاہ دی
ایہہ کِکر دی
سُکھ چین دی
محنت ہوئی مجبوری صدقہ رُکھاں دا
رلّی رَلا سہیلی آپنی
آپنا آپا مولا
رنگ نوں رنگ نہ رَلیا
لِیراں درزی دیاں
وے درزی بے پِیرا
اِک سُوٹ وکاؤ ویتر کے
جگ کُترا کر چھڈیا ای
اِک تروپا ہر دم بھریائے
اندر بھرتی کوئی نہیں
ایہو تروپا نِگھ اے مَولا چودھیں طبقیں
کوئی جگ جگیر وی لِکھ دیوے نہ دیواں
کل سیہون کوئی آگیائے آئی جی
چِچڑ ہو رہیائے اوہ دو دیہاڑے
اُشکل چمچے آل دوالے
میں چھیکڑ مولا ہڈی سٹ وگائی
اخے کُجھ تے لے سائیں انج تے نہیں نہ
مخے کیہ دینائیں بئی نتھ کُھلائی
ہا جِند لئی پِھرنائیں
سُکنے پا سکنج نوں ساڈے کم دی ناہیوں
سو رُپیہ دَھر کے ٹر گیائے، نظریں نذر وصولدا چمچیاں کولوں
ووہٹی اوہدی نے پنج ہزار ایہدے وٹ لینے ہوئے
گاہکاں ٹنگ ویاہونی ہوئی کھل سرکاری شیر دی آئے گئے نوں
مخے نانگا بہہ نانگ خزانے ڈیوٹی دِین ایمان دی
توں آواگون نہیں ویہنا
تت ست نہیں لِکھیا لینا
ہُنے لنگھدی اے نا بیڑی سَیل سہیلی
اوس پُچھنائے مَولا؟س
موڈھے ٹھردے ہوئے تاں اُپر دَھر ٹُرنائے