پارک دی کینٹین ساہمنے
دوویں آ کے نالدے بنچ تے بہہ گئے نیں،
اوہ اُٹھیائے دو بوتلاں پکڑ لیایائے پیپسی
چُپ بیٹھی ایہہ اکھاں پُونجھن لگ پئی اے
اوہ اپنی چاڑھ گیائے
ایہنے رکھ دِتی اے بُھنجے،
چُپ اے
وچ وچ اکھاں پونجھدی کِدھرے تکّی جاندی اے
اوہ ڈبہّ کھول پلاسٹک دا بھر چمچے بریانی کھاون لگ پیائے
گلاں کری آوندائے جیویں خبراں پڑھدا ہووے
وچ وچ چمچہ ایہدے ول وی کرن دی کردائے
ایہہ چُپ اکھاں پُونجھی آوندی اے
خبرے کیہ ورتی اے
لگدائے کہندی اے
میں تے آ گئی آں
جو گئی اے اوس نہیں آونا