باغ تلاء دے کنڈے
مینڈے ہان دا چِٹ بھروٹّڑا پیراں پرنے بیٹھا اے
کول چ ٹُکّر گال کے دھریا ہویا سُو اگے،
دو بتکاں نیں
چُنجاں بھر بھر کھاندیاں نیں
آنڈیوں نکلی چُوچکڑی وی نال اے پِیلے لُواں والی
کھبّی بتک دھون ڈھکُنج کے وچ وچ اوہنوں کھویندی اے چُنجیں،
لمّی کاروں لتھیاں نیں پنج کُڑیاں
اِکدوجی نوں ہُجھ ہُجھ ٹھٹھے ماردیاں
فیشنی انگریزی وچ تُوں تُکاردیاں
جھُنڈ کُڑیاں دا بتکاں ویکھن کول تھیا اے
اِکدم کھبّی گھاں گھاں کردی کھاجا چھڈ کے کھمب کھلاردی
پئی اے اوہناں نوں
چِیکاں ماردا نٹھا اے جتھا تِتر بِترّ،
مینڈے ہان دا چِٹ بھروَٹٹرا دھوتی سَلھدا
پُچک بتک نوں موڑ لیایائے،
مُڑ جُڑ دُور کھلوتا پنجا کُڑیاں دا
ہس ہس حال بے حال اے،
"ایہنوں کیہ ہویائے؟" میں پُچھناں
"اوہناں نوں ہویائے ایہنوں نہیں،
بوء دی بتک سیانی اے"
"کاہدی بوء؟"
"سوا سیر دی"
"ایہنوں کیہ آہندائے سوا سیر اوہناں کھیڈدیاں دا"
"ایہہ قُدرت دا جی اے،
سوا سیر دا اَبّل1 کھترائے قُدرت نوں،
اوہناں بَھلِیاں نوں کَھور2 نہیں کوئی
ایہنوں کَھور ہوئی"
"دوجی بتک نوں بو خشبو نہیں؟"
"اوہ بتکائے"
پیالہ ڈُلھ گیا ہا
اوہ ڈلھیا جوڑ کے مُڑ کے اگے کردا اے