ٹُنگ لکّدی گھاہ سواردائے اوہ
مفلر ٹوپیاں وچ ٹھرو ٹھر لوکیں سیر نکلے نیں
پُچھناں میں: "ایہہ میاں جی رُکھ کیہڑائے
لِکھیائے کنک چمپا وچ بوڑھ لگاّئے"
رَکھ َرنبہ مینوں گھُوریو سُو، مُڑ ہسیّا اے
"انگریج جدوں گاہ ہِند پنجابڑے آن وڑیائے
لہور شہر دے باہر ساری بار آہی
گھنی وسّوں آہی بوڑھی کِکّری دی
کھٹ پٹ کراہ کیتائے پدھرا سبھ
گورمنٹ ہاوس بنگلے دفتر لاٹ تے مال مکلوڈ روڈاں
ایہو کنک چمپا
جنگل جنگ بنگالڑی نکل ٹُری
ہیٹھو ہیٹھ وگی
لہور پُج کے باہر سِر کڈھیو سُو
گھر رُکھ دا کُل جہان سمجھو
سپ شینہہ فقیر دا دیس کیہا
پَل سنبھ گھنیرڑا بِرچھ ہوئی
ایہو کنک چمپا
وڈّے ٹاہن کڈھے، کُھلے ہتھ کنار نونہہ انگلاں تے
چمپا دست پنجہ کنک کنِیاں نیں،
یورپ لام لگ گئی
بھرتی گئی بصرے
فائر جلیاں والڑے باغ کھُلّا
تُرے کالے پانی
چُم رسیاں کئیں پھاہے جھُول گئے
سُکن لگ پئی، ایہو کنک چمپا،
افسر ٹک لایا
’ایویں باگ کا شکل کھراب کرٹا‘
کھاتے سُکیاں دے ناواں درج تھیا
ایہو کنک چمپا
کوٹھی لگی تریکاں پے گئیاں،
رات ہیٹھ پَیراں گُجھی رَڑک جاپی
’جَھوں جھُور نہ کملئیے قائم ہو جا، مینوں بَوہڑیا لَے
بوڑھی وڈھ گاہی پِچھلی صدی والی
پلاں چِھناں اندر اُٹھ سہج سبھا آن نال ہوئی
انج آل دوال اندر باہر دوئے
اک تھی کے حال نہال ہوئیاں
مَڑھیا ٹک بوڑھی، لِکھی بدل دِتی،
ایہہ ہے جَپھڑا چِریں وچُھنَّیاں دا
کِتے ہڈ اوہدے کِتے ماس ایہدا،
پھِریاں نیئیں پُرانیاں تھلاں اندر
سُرج نال سمجھو زِویں جُفت ہوئی"
رنبہ نَپ اوہ سَرک اگیر گیائے
رُکھ تکدا میں حیران کھلاں،
“اسلام علیکم
عصمت اے رُومی، ڈپٹی سُپرانٹنڈنٹ،
مینوں پتہ اے ایس جو بیان دِتائے
ایویں یبلیاں ماردائے بُڈھڑا ایہہ
سامانِ تفریح اے ساڈے ولوں،
ہے ایہہ کچیاں وچ
کم ہووے دیہاڑی تے سد لئی دائے
ساڈا فرض ہویا، ذمے داری ہوئی،
تہانوں ہسٹری میں سمجھا دیناں سارا فلسفہ
تاریخ اصلی
ایہنوں پُچھو قِبلہ؟ چڑھدے مُونہہ کرسی
سادے لوک،
خبر نہ دِین دُنیا،
دورِ جاہلیت،
تدوں مالی ان پڑھاں نوں رکھدے سن
ویلا زوال دا ہا
چڑھ باہروں یہود و نصار آئے
ایتھوں رَلے ہنُود
ایہہ کنک چمپے اوہناں آن لائے
ہل پھیر دِتے مُغل گارڈنز تے
گھوڑے بنھّ دِتے وچ مسجداں دے
آخر دور زوال دا دُور ہویا
داڑھی دُھروں کمند ہے مومناں دی
ایہو کم آئی
اُٹھ بوڑھ مجاہد ہشیار ہویا
قلعہ ٹَپ کے آن سوار ہویا
دُگ کنک چمپا کھوڑ کھرُنڈ کیتا،
یادگار ہے ہُن آون والیاں لئی
اسیں ایہہ پلانٹ پریزرو کیتائے،
صف کُفر دی انج ہی اُلٹدی اے،
میرے ہور منصوبے نیں بُہت سارے
تُساں ویکھسو باغ سبھ بدل دینائے
پلیز پِھر ویکھو، آئی ایم سوری میں تہانوں ڈیٹین کیتائے
کوئی تجویز ہووے آفس آؤ میرے، ہَیو اے کَپ اوف ٹی،
میرے کول ہے سائنٹفک اِنفرمیشن
ہر درخت بارے،
تُہاڈا شوق لگدائے
میں نہ ہوواں تے باہر اے وِزیٹرز بُک
کُجھ لِکھو ضرور، مشکور ہوساں"
سنے سُوٹ خسخاسی اوہ رواں ہویائے
رُکھ ویکھدائے مینوں
اوہنوں ویکھناں میں