گھر دفتر اگے یا پیدل یا بس ویگن وچ آون جاون ہوندا ہا
ہُن ریٹائر ہو کے کِتھے نِکلے بندہ
فُٹ پاتھاں تے اُنج وی موٹر سائیکل دا حق اوّل ہویا،
دوجے چوتھے ملک صاحب ای گڈی بھیج بُلا لیندے نیں
''آؤ نا آرٹ ادب دی گل کوئی کرئیے
کاروبار دی کھپ کَھچ ہر ویلے رہندی اے –''
چاء کَوفی تے ملک صاحب دا تازہ عُمرا راز حقیقت کھولی آوندائے
آرٹ ادب دی گل ہتھ بنھ کے بہندی اے،
بس ویگن وچ رنگ رنگ دی دُنیا ہونی
کوئی مزدور دوکاندار کوئی ماڑے موٹے
کلرک مستری بابے بچے کُڑیاں مائیاں
نِکیاں شہراں دے پنڈاں تھاواں دے لوک وی آئے ہونے
ہسپتال کسے دفتر لہنا
ادھی سیٹ تے اڑ پھس بہنا
کِسے کھلوتے اُنڈیاں رہنا
رنگ رنگ دی گل بات وی نِت پئی کنیں پینی
روز دے آون والیاں نال اپنیت جیہی وی ہو ای جانی،
اج ملک صاحب ولوں گڈی بیٹھا گھر پیا آواں
بند اشارے اُتے ویگن نال اِک آن کھلوتی
دھیان پیا جِیویں ویکھی شکل اِک نظر پئی
جکو تکی وچ دو پَل اکھاں چار ہوئیاں
کُھلیا اشارہ
مینوں اُباسی آئی
ویکھاں اوہ وی اُباسی لوے پیا
میں سوچیا ایتنی سانجھ وی سمجھو بڑی غنیمت اے
میری اُباسی ہور اے اوہدی ہور اے بھاویں-