لہور دوبئی کراچی پِھر پِھر آیا ساندل
ناں نالوں اوس نہ ماچھی نہ بھائی پھیرو ای لاہیا
فارم جدوں بھروایا کوئی
پُورا ناں ایہہ آکھ اُچیچ لِکھایا
بہہ جدوں گل کرنی
لگنا
یار پُرانا گالھڑ سائیں نال ساندل دے آ بیٹھائے
نِت نواں رَل جھیڑا کوئی بناوُ نیں
پر گل جِتھاؤں وی ٹُرنی
ڈُھکنی آ بھائی پھیرُو دے کھاڑے
''اج کوک اکھواوے
ہووے جِویں معشوق پُرانا،
نواں نواں جدوں آیائے
یاد ای، ناں ہساوے سانوں
کوکہ لا لئو بھائی جِبھ تے کولے دا !
کیوں گالھڑ سائیں؟''
''آہو ماچھیا، رنگ گھَسمیلا سواد کُسَیلا
گُھٹ خوراک دوائی،
شوق بماری جاپے،
مُڑ ساوی بوتل سیون اپ دی اگلیاں کھول پھڑائی
ٹَین ڈاون کر پی لئی مِٹھّی دوائی''
''اُتوں پھَینٹا
کَھٹ مِٹھ گولی
بال ریہاڑ ولاوے
کیوں گالھڑا؟''
''آہو ماچھیا
دو بھیَناں میرے متَھے سَکیاں
دوہاں دِیا سانجھیا یارا،
بوتل جیہڑی وی مونہہ نوں لالئو
تریہہ دوالے پِھرے مدھانی
بھَڑکی ہور ودھاوے،
ہُن ویکھ نہ ساندل بارا
اوہا کوکڑا کولے والا
آپے تریہہ تے آپے پانی
اج امریکن فیکٹریاں نیں
کرن ہماتڑ یاد کہانی
جد بوتل سوڈا بھر ہٹیاں توں پَوند انگریز پِوایائے”
''یاں اگے شربت رنگ رنگ مِٹھا
شاہاں نواباں کمّی کارے نوں ڈاہیائے-
پر گالھڑ مَولا ایہہ سَیون اپ وچ ٹَین ڈاؤن کِس پایائے
اوتھے تے چرچل رہندا نہیں؟''
آہو رہندائے
ٹوٹ جد آوے وِسکی دی تاں
سیون اپ دی بوتل ساوی موہدی کر کے اُپر بہندائے''
''پر اَپ ڈاؤن دا پھیر ایہہ ہے کیہ گالھڑ بھائیا''
''پھیر نہیوں ایہہ ہیر ای
بتّی دِھیاں میرے مُونہہ دیاں جائیاں
سانجھیا جِبھ جوائیا !
بھائی پھیرو دے پھیر توں ڈردے
پُھلنہاراں لئی کیہ پنڈ کیہ شہر سارے پُھول نگر نیں
بھائی پھیرُو دے پھیر ایہناں دے وارے نہیں''
''ایہہ بھائی پھیرُو دے پھیر دی گل کیویں ای گالھڑا؟''
سُن سربالڑا لاڑے میرے دِیا !
ست پھیر پِھر ویندا ہا اوہ جُگاں گئیاں دے
ست پھیر وت آونیاں دے
جیہڑی پھیر سنبھل پِھر جاوے
بھائی پھیرُو دی بھین پھیروُ ہو آوے
ایتھوں لاء لہور کپُور تھل
انبرسر کلکت بنارس
کامروُپ رنگوُن ملایا
چل سو چل
گالھڑ گیا نیول ہو آیا
پِھر دوہاں پیراں تے گاونا سنگ رَلاونا''
''گاون کوئی چیتے ہے ای گالھڑ سائیاں؟''
''آہو بے سُر بے تال
توں وی لگ نہ نال پرہائیاں
لا نہ ٹھیکہ بے ماترا، نہ سوہرا نہ پیکا:
ست اگلے کرو سُکھال
نی سَت جُگ بھال پِچھلے
گھال کمائی تھئی پرائی
گھروں گئی مُڑ پُچھن نہ آئی
وِچھے بزاریں جال
نی ست جُگ بھال پِچھلے
دُدھ دھن جیہناں جہان کُوں دِتا
پرم رس نین پران کوں دِتا
ہوئیاں کیوں ڈنگر مال
نی ست جُگ بھال پِچھلے
کرنہاراں دے ہتھ نیں سانجھے
آپ نیں ہیراں آپے رانجھے
دِل ہے کُل دا تھال
نی ست جُگ بھال پِچھلے''
گاوندیاں اوہنے اُٹھ کے نچنا
نچدیاں ٹُر پَینا سانوں نالے لے کے
اساں چَونک چوں پرت آونا
ساندل ماچھی بھائی پھیرو
اوویں نچدیاں گاوندیاں
موڑ اگلا مُڑ جانا