رہے وچ طبیلے اوہ حضرتاں دے
حوَلدار ہر کوئی اوہنوں آکھدا ہا
ہور ناں نہ تھاں،
اوہدے پَیر ڈُڈّے
لوکاں دَسنا پیر تے ہین ای نہیں
ایہدے گِٹیّاں ہیٹھ نیں گول وٹے
اُتے بُوٹ بندوق دا کیس سمجھو-
وڈیاں حضرتاں ویلے
دَورے ڈِپٹی کمشنر انگریز آیائے
حَولدار گھوڑی اوہدی جِویں سانبھی
کلکتیوں بُوٹ بخش خاص ہوئی
سِیلا موچی ہی بُوٹاں دا بھیت جانے
کِلّاں چِپّراں نال جِس ڈبل کیتے-
اوہدے ہتھ ٹُنڈے
ہتھ ہَین ای نہیں
گُٹ جوڑ اوہ گھوڑیاں بنھ کھولے
ونڈا میل کڑاہے اوہ ڈاہے کُھرلی
مارے کھرکھنے
لِدّ وی سوھت1 سلّھے،
گھوڑا میل کے نوِیں کرائے گھوڑی
ڈِھلی مَٹھی تھیوے
نِکڑ سُکڑ کوئی رگڑ کھوائے آپے-
اِکو سیال انہال فتُوحڑی جیہی
اِکو لَکّدی ٹاکیاں گنڈھ جوڑی،
اُوں آں ای بس اوہدی گل آہی
وچ بول کوئی بول جائے گول جیہا
کوچوان اسوار سمجھ جان اوہدی،
جِیبھ ہے ای نہیں لوک آکھدے سن،
جِتنی اَتھری بھُوتری ہوئے گھوڑی
اوتنی سُگھڑ سہیل ہو نال رہنی-
لوک دَسدے سن ایہدی عُمر دا کِتے حساب کوئی نہیں
احمد شاہ ابدال دی فوج وچ ہا
چَتر چابک اسوار اُستاکار وڈّا
سِکھ ہو گیا،
جدوں انگریز آئے مسلمان ہویائے
کابل گیا اے ہو حوَلدار تدوں،
گھوڑی دین جرنیل کرنیل کَوڑی
گھڑیاں چار لاوے مِٹھی کر موڑے،
اوڑک دَسّدے نیں ویلا کوئی آیائے
پِنشن ہوئی
گھوڑی پال مربعے زمین مِلی،
لگا جنگ تے بھرتیاں دِتیاں نیں
ذیل دار سُنیائے ہوون والا ای ہا،
خاں صاحب خطاب دی آس ہوئی
کونسل ممبری ہور پیاس ہوئی-
اُٹھاں والڑے کوئی ایہدی جُوہ لنگھے
توڈی تَھن لگّی ایس مُل گِھدی
کوٹھی وکھری اوہدی پوائی ایہنے
لاڈ نال پالی
ڈاچی پال کیتی
چامل چائیں کچاوا گھڑا پایا
ڈُھکیا رات اسوار جد ہون نیڑے
کھابا سگن تَلی اوہدے لب لاوے
اواگھت ڈاچی ایہدا ہتھ مونہہ اپنے وچ پاوے
ایہنوں چایا بھوا کے مار بھوئیں
ترے وار چایا
گھول مِدھ مدھول کے پار لاہیا،
کَھچر پاتری آئے
سٹ ریڑھے ایہنوں ہسپتال دھائے
گنڈھ جوڑ مُڑ دھریو نیں آن ڈیرے
راتاں سَت مُڑ سُرت نہ آئی ایہنوں
تھیا اٹھویں دیہنہ جو ویکھدے او،
چِیکے پُتراں تے،
نونہہ دھی ٹوہے، چَک وڈھ کھاوے،
پِچھا ایہدا سرکاری مُرید آہے
وڈیاں حضرتاں مہر دی نظر کیتی،
ڈاہ وچ طبیلڑے کم لایا-
آئی ونڈ سنتالی
ٹُریا قافلہ سٹ کے گَڈ ایہنوں،
حملہ ہویا، گَڈ اُلٹ گئی، واہن پیا
وِردھ خالصے اِک سیان گِھدا
''ایہنوں رہن دیو ایہہ مسلمان کوئی نہیں،''
( دھوتی لِیر چائی، انگ لِنگ نہ ہا )
''گُر پِیر سیانا جے گھوڑیاں دا-''
گھوڑی دھر حَولدار نوں گھر لے گئے،
سُنیائے اوتھے اجے اوویں جِیوندا اے
گھوڑے ریسی وپار سردار کردائے
باقی کم سارا حوَلدار کردائے-