بلُونگڑ بِلّا
وکھیاں باہر، ڈِھڈ وِچ وڑیا
کیہڑے اُتر پہاڑوں آیائے
اج کل ویہلا ٹِلّا نہیں خبرے
ڈَھل ایہنے پارک پہاڑی رنگپور جانا ہے
رتیاں اکھیں کن مروڑ کھلوتا تاڑے
ہُن کھیڑے بکھیڑے ٹال کیویں کوئی دیس بدیس وسانا ہے
ویکھے مینوں
میں اوہنوں ویکھاں-
کَھل پر شیر دی اے
ہووے نہ ایہہ شہزادہ مصری،
پُتر سہکواں دُوجے کِسے شاہ سلیمان دا
صورت سُپن جگایائے
تخت بخت تج قصہ سیف ملُوکی متے لکھانا ہے
چڑھ اسمان شاہ پرستان دا گھر جوائی ہو کے
وت لتّھ مصر وِچ
شرع شریعتی
رسمی ریتی
ویاہ پری نال رچ رچا کے
بیٹھ پیو دی کُرسی راج کمانا ہے
ویکھے مینوں
میں اوہنوں ویکھاں