دو گِٹھ کالی داڑھی
لنگھیائے پکڑ صندوکڑ
سِر تے ٹوپی جالی
لنگھ مُڑیائے
جیویں کُجھ دِسیا ہووے اچیتی
''میں ڈاکٹر نہیں
حکیم نہیں
نہ پیر فقیر آں گُجھیاں گلاں دا بھیتی
اجکل زور اے ایہناں لوکاں دا،
ایہہ پُڑی لئو
کِسے دوست عزیز نوں دیو
مناسب سمجھو تے
ہر رنگ دا کینسر کینسل کر دیندی اے
ہے ہربل
چاہو ٹسٹ کرا لئو
آکھو تے لِسٹ دے دیاں
جیہناں لئی اے
جانے پچھانے لوک نیں
پُچھنا چاہو تے پُچھ لئو
لینا دینا کُجھ نہیں
دعا وچ یاد رکھنا، فرق پوے جِس ویلے
چِٹھی دو حرفی ایس ایڈریس تے پا دینا
میرا نہیں
ایہہ کُجھ لوک نیں جیہڑے بچاون آئے نیں
تُہانوں پتہ ای اے
اوہدے ناں تے ٹھیکے لئے رقبے تے
اساں من مرضی دِیاں گڈیاں گاہیاں
ایہہ بخشاون آئے نیں
ان بخشویاں تقصیراں ساڈیاں''