میرے گھر توں دفتر
دفتر تُوں گھر
اِکی نمبر ویگن رُوٹ دے اندر اے
اِکی نمبر روٹ دے سبھ کنڈکٹر مُنڈیاں دی
میں ورتن گاکھی ہوئی اے
کم کارلی واج دے پِچھے
اِک اِک دی میں اصلی واج پچھانناں
جیہڑے وسبوں
ایہہ کنڈکٹر ہوئے نیں اوہ اینا اے
پئی ربڑ بھکانے ہار ایہہ آپنے آپ نوں
کِھچ سنگوڑ کے جِنا چاہون کر سکدے نیں
بہن کھلون لئی ایہناں نوں کوئی تھاں نہیں چاہیدی
بُوہے نال پلم کے
پائیدان تے اِک اُنگلی دے بھار کھلوتے
وگ سکدے نیں
کم کارلی ہستی، اصلی ہستی وِچلا فرق لُکاون واستے
کوئی اُچیچ نہیں کردے
سہج سبھا کدیں پُلسیئے
کدیں نقلیئے
کدیں بھنجال کدیں وَیلدار
وِچ وِچ ہیرو وی، معشوق وی بن سکدے نیں
گاہک نوں اُپر چاڑھن واستے کھیکھن ہور نیں
چڑھے نوں اندر نِسل ہونوں ڈکن واستے
ڈھنگ ہورنیں
چڑھے نوں جھبدے لاہون واستے رنگ ہور نیں
گاہک لئی جِسلے مرضی اکھ وِچ جان پچھان جیہی بھر لیندے نیں
جِسلے مرضی اکھ جھمک کے
جان پچھانوں سکھنی کر لیندے نیں
اِکی نمبر وِچ بہن دے گُرنیں
اِک: جے توڑ نہیں جانا گیلری وِچ نہ بیٹھو
(کنڈکٹر مُنڈے پِچھلی سیٹ نوں گیلری جاں ائیر کنڈیشن آہندے نیں)
تھاں سِر لہن لئی وِتھ ویہل نہیں لبھدی
دوجا: بُوہے دے اصلوں کول نہ بیٹھو
لہندیاں چڑھدیاں دا
سارا بھار بھڑکّا جرنا پیندا اے
میں ہمیشاں بُوہے ساہمنے
نُکر والی سیٹ تے بہن دی کرناں
میں آپنے آپ نوں اِکی نمبر ویگن دی
ایکسپرٹ سواری سمجھناں
ایہدیاں رمزاں
میری تن مشین دِیاں تاراں بٹناں نال اِک سُر نیں
اِکی نمبر ویگن تے
میرے نال کوئی ہتھ نہیں ہو سکدا
اج مینہہ آوندا لگدائے
میری سیٹ کوئی میتھوں اگدوں ای ملی بیٹھائے
مینوں جکو تکی وِچ ویکھ کنڈکٹر مُنڈا آہندائے
پِچھلی سیٹ تے بہہ جاؤ چنگے رہسو
میں نہیں گولدا
پِچھے جا جکڑیجن نالوں بُوہے دے دھکے چنگے نیں
کنڈکٹر مُنڈا آپ بُوہے دے نال سیٹ دے کنڈے اُتے اڑیا بیٹھائے
سٹاپ آیائے
اوہ باہر نِکل کے سواری پیا پتیاوندائے
میں اوہدی چھڈی سیٹ تے ٹِک گیاں
سیٹ کیہ ایویں اڑن آسرائے
نالے ایہنے اکثر لمک لُمک کے ای جانائے
کیہڑا بہنائے
مُنڈے لد سواری بُوہا بھیڑیائے
میریاں پیراں وِچ پیراں پرنے بہہ گیائے
ایہہ مُنڈا میں پہلی واری ڈِٹھائے
لگدا نہیں پر خبرے اناڑی ہووے
پیسے دے کے میں اوہنوں آپنا سٹاپ دسیائے:
گول چونک
ادھا پینڈا رہ گیائے
وِچ کیئیں چڑھیاں کیئیں لتھیاں نیں
اوہ پیسے لیندا، باقی موڑدا بُوہے نال پلم کے کم کارلی واجے ہوکے دیندا آیائے
اِکدم مینوں اصلی واج نال آہندائے،
''اسیں گول چونک ولوں نہیں اج جاناں
اُرلے موڑ توں بھوں جانائے'' ایہنوں اِکدم میں کیوں چیتے آگیاں
کِن مِن ہوندی پئی اے
اُرلے موڑ تُوں گھر تائیں ٹُردیاں بِھجنا پوسی
''کیہ گل اے اج روٹو روٹ نہیں جانا؟''
''کِن مِن ہوندی پئی اے''
''یار اودھر دِیاں سواریاں ہور وی ہے نیں
تُسیں اُرلے موڑ تُوں بھوں جاؤگے
تاں ایہناں نوں پھیر کِتھے لاہو گے؟''
اوہ پیسے پھڑن موڑن وِچ میری گل نہیں گولدا
پاءپندھ میرا ہور رہ گیائے
اوہ میرے ول اُلردائے:
“اُرلے موڑ تے لہہ جاؤ ہیں
مجبوری اے باؤجی”
مجبوری کاہدی یار، اودھر دِیاں سواریاں نہیں جے لاہونیاں؟
''تسیں آپنا فکر کرو''
اوہدی واج توں، اکھیاں تُوں
مینوں لگے میرے نال ہتھ پیا کردائے
پر کیوں؟ کیویں؟
مینوں سمجھ نہ آوے
جیہڑے موڑ تے مینوں لاہ دینائے
اوہ نیڑے آوندا جاوے
اوہدی اکھ تے پانی جیہا اِک پڑدہ
پڑدے پِچھوں اِک عجیب جیہی نِیجھ، ایہہ مینوں ویہندائے
جاں اکھاں راہیں مینوں کُجھ وکھیندائے
ہُن مُڑ اکھ نہیں ملاوندا
پر وِچ وِچ چور اکھیں تکدائے
ایہہ دو دلیلا ہو گیا لگدائے
میریاں بھونچلیاں پُچھاں وِچ جیہڑی اپیل سی
ایس کِیل لئی اے:
''لہہ جاؤباؤ جی موڑ آگیائے''
پر ویگن موڑ تُوں دس گز اگے آن کھلوتی اے
میں جکو تکی وِچ اُٹھدیاں پُچھیائے:
''تُسیں تے سِدھے چلے او!''
''نہیں اسیں بھوں جانائے
تُہانوں آکھ جُوں دِتائے لہہ جاؤ''
میں لتھاں،
ویگن گول چونک ول ٹُرگئی اے
ایہہ میرے نال ایہنے کیتا کیوں اے
ادھ کِھجیا ادھ بھونچلیا میں بِھجدا بِھجدا سوچناں
کھڑے پانی جیہی نِیجھ اوہدی
اوہدی سِلی سِلی واج
مرن ہار نوں مارن والا اِنجے ویہندا ہوسی
مارن تُوں جھٹ پہلاں
مارن تُوں جھٹ مگروں
ایہہ میرے نال ایہنے کیتا کیہ اے
مینوں لِہنا نہیں سی چاہیدا ویکھی جاندی
میں بِھجدا بِھجدا آپنے آپ نوں کِھجنوں ورج نہیں سکدا
گھر نیڑے مینوں اچن چیتی جاپیائے
ایہہ اکھ ایہہ مُونہہ میں اگے وی کدھرے تکیائے
پر میں تے پہلی واریں اوہنوں تدوں ای ڈِٹھائے
جد میں اوہدی چھڈی چپہ سیٹ تے اَڑیاں
تے اوہ آ کے بُھنجے میرے ساہمنے پیراں پرنے بہہ گیائے
مینوں اچن چیتی سہی ہویا
ایہہ اجدی نہیں
کوئی ڈھیر پُرانی گل اے
جیہڑی اُنج دی اُنج اج مُڑ کے ہوئی اے
پیراں پرنے میرے اگے بیٹھیاں
میریاں اکھیاں چوں کُجھ پڑھیائے اوہنے:
''ایہہ مُونہہ ایہہ اکھیاں اوہو ای نیں
جمن لاءتُوں ایڈیاں ہوندیاں توڑیں
ایہہ مُونہہ اسیں دِن وِچ کئیں کئیں واری ڈِٹھائے
ایہہ اکھیاں
اسیں جمن اگدوں
سینکڑیاں ورھیاں دے ویہندے آئے آں''