فرید بھنڈار

جمعے دے جمعے

میں لِکھن باغ وِچ جاناں

اج جنگو کہندائے میں وی چلناں

میں آپنی پڑھائی کرنا، تُسیں آپنی لِکھائی کرنا

ویہلے ہو کے کھیڈاں گے

اوہ آپنی تیاری کر کے بستہ بھر لیندائے

آپنے پُرانے رُکھ ہیٹھ میں کاغذ پنسل کڈھناں

جنگو کہندائے،

ذرا لتاں باہواں کھول لواں پھیر پڑھناں

میں لِکھن رنگ وِچ وڑناں ڈریا ڈریا

کِتے جنگو دور نہ ٹُر جائے

ہر پنجیں ستیں منٹیں خفا خون ہویا آوندائے

آپنی دوڑ دا، گیند دا، شہت دے چھتے دا

کُتی کُتے دا

کوئی بے نتیج وقوعہ مینوں اِکو ساہے سُنا جاندائے

جد میں آہناں پڑھنا کدوں جے

اوہ “ساہ تے لئو تُہانوں پڑھن دی پئی اے” آہندا مُڑ کے نس جاندائے

کِتے فیل نہ ہو جائے

سکولے ایہدے خبرے ہانی کون نیں

نمبر تھوڑے آوندے رہے تے کیہ کرسی

کھیڈاں نال وی بندہ کھٹ کما تے لیندائے

پر اوہ تے چانس دی گل اے

ایہہ کیہڑا عمران خاں اے

میں کاغذ پنسل اگے دھر کے سوچناں

لِکھن دے کم جوگا نہیں ہُن میں

ساہمنے پھٹی لگی ہوئی اے

“پھول کیاریوں میں ہی اچھے لگتے ہیں”

سرو قطاراں مُغل پھوہاریاں کولوں دی اِک سج ویاہیا جوڑا چوتھی واری لنگھیائے

لمکے کالے سوٹ دے اُتے رتی ٹائی

کسّے کالے بُرخے تھلے رتا جوڑا

سجے کھبے دو بھرا سرباہلے نیں (اوہناں نوں وی ڈِھلے سوٹ مِلے نیں کالے)

اِک پاپڑ والا بُڈھڑا

اِک گرم دال والا مُنڈا

کُجھ وِتھ دے کے مگر مگر نیں

دوروں ڈِھلا آوندا دِسدائے

میرے نال سکولے سی پھیر چھڈ گیا

تدوں دا پِھر کے سودا ویچدائے کدیں گولیاں کدیں بنیناں

مُڈھ تُوں مینوں پُرفیسر آہندائے

جے آ کے بہہ گیا لِکھن پڑھن سبھ رہ جانائے

اوہنوں ٹِیری اکھیں نظرچِ رکھ کے

بے ملوما کِھسکدا اوہدھر کنڈ کر لیناں

لاؤڈ سپیکر اُتے جمعہ شروع ہو گیائے:

“قربانی کا فلسفہ کیا ہے

ہر شے آخری تجزیئے میں فائنل انے لیسز میں اللہ کی ہے، اس کی امانت ہے

وہ جب چاہے لوٹانی ہو گی، جب تک اسکی امانت اپنے پاس ہے

ہمیں اس سے محبت ہو گی جس قدر اس سے حُکم ہے

ہم متمتع بھی ہونگے اس سے لیکن جب بھی جس لمحے بھی اس کا

اشارہ ہو، تو پھر تامل نہ ہو، سِر تسلیم خم ہو یہی وہ نصب العین ہے

یہی وہ نصب العین ہے آئیڈیل ہے جس کو دلوں میں تازہ کرنے کیلئے

زندہ رکھنے کے لئے عید قرباں کا دن ہر سال آتا ہے''

اِک رٹائرڈ افسر

سوٹی سنے دونویں باہواں چُک کے

پِھپھریاں وِچ تازی واءبھرن دا آہر کریندا تھک گیائے

“اوہو لئو پُرفیسر

کیا قسمت وِچ میل سی

اوہو آمد ہوندی لگدی اے رُکھ دے تھلے

سانوں تے آمد ہوندی اے پھیرا ٹورا کر کے

اسیں بدھ مہاتمے نہیں نہ

کِنیاں کتاباں ہوئیاں نی پُرفیسر

کوئی پیسے جوڑدائے کوئی کتاباں جوڑی آوندائے

سبھ مقبریاں دے چکر وِچ او پُترا

لے کریں آسرا ساہمنا جوڑا ہتھوں تِلک نہ جاوے

تُوں تے وٹاونا ککھ نہ ہویا

آن کے سُنناں شاعری تیری”

مولسری دے تھلے جنا جنانی

کرن والی کوئی گل نہ ہوون پاروں

چروکے اکے پئے نیں

ٹاہلی مگر کھلو تاڑدے چوکیدار جیہے بندے ول وی

ادھ دھیان وِچ کڑے ہوئے نیں

جوگ وجاوندے، نظریں گاہک دھیاوندے

سپیاہدے نوں اوڑک سینت مار بُلایو نیں

اوہ سپ وکھا کے آہندائے 

باؤ جی من دی موج ای ایس ویلے 

کوئی شے دے جاساں تُہانوں دونہاں نوں

جَنا رُپیہ اگے سٹ کے آہندائے

''بس بئی تینوں آکھیا جوں اے جا شاوا

ہُن نماز پئی ہوندی اے''

“اسلام تو دین فطرت ہے، اس میں مکمل حق ہے ذاتی ملکیت کا

جتنی کسی میں استعداد ہے پیداوار کرے دولت پیدا کرے کوئی حد مقرر نہیں ہے

اس قسم کی حد خلافِ فطرت ہو گی لہٰذا فاسد ہو گی اس میں

کوئی کلام نہیں ہے کسی قسم کے شک و شبہ کی کوئی

بھی گنجائش نہیں ہے قطعاً کُھلی تجارت ہے انلمیٹڈ انٹر پرائز

ہے کوئی پابندی نہیں ہے کوئی رکاوٹ کسی قسم کی ہر گز ہر گز

نہیں ہے''

چوکیدار جیہا بندہ نیڑے ہو کھنگوردائے

جنا دس دے نوٹ دی پُڑی بنا کے

اوہنوں وگاوندائے

“کیپیٹلزم کی سبھی خوبیاں اس میں ہیں ہاں کیپیٹلزم کی

کوئی برائی کوئی خرابی اس میں نہیں ہے نہ ہو سکتی ہے وہ کیسے

بھائی اسلام کا اخلاقی فلسفہ ایک دوا ہے کافی و شافی فساد خون نہیں

ہونے دیتا، عدل ہے احسان ہے ان سے نظام کی صحت ہے حرکتِ زر

ہے جیسے حرکت خون ہے جسم میں حرکت گردش ہے کہیں ارتکاز نہیں

ہے ان سے توازن، بیلنسڈ لائف 

جسے کہتے ہیں وہ ہے یہی معیشت ہے اسلام کی اور یہی ہے راز مشیت”

“نِکل گیائے بئی جوڑا بڑا گھیریائے

ایہہ کتاباں کہیاں نی پُرفیسر موڑے پے گیائیں؟

اوہو اج شہزادہ نال آیائے بئی

اوہدے لئی تے رکھ لے دو پٹھورے

ایہہ فاسٹ فوڈ نی پلاسٹک دے تھیلے اندر

بھاویں آپ وی کھا لے

فیکٹری دے بنے ہوئے نی باہمنا

دیہاڑی خالی جاندی لگدی اے''

میں پنج رپیے کڈھ کے آکھناں نہیں یار میں ایس ویلے کُجھ کھاندا نہیں نہ

بھان ہے ای

ڈِھلا پنج رپیے نپ کے ٹُردائے “نہیں کھاندا تے نہ کھا پھیر بھان کیہ کرنائی''

سپیاہدا میرے سِر تے کھلوتا

کھوچل بِین تے جوگ بے سُرا وجاوندائے

باؤ جی یاد کریسیں سائیں دے من دی موج ای

میں آپنے سکھنے کاغذ اُتوں

نِیجھ ہٹن نہیں دیندا

“حضرات پیشتر اِسکے کہ آپ نماز کے لئے کھڑے ہوں باغ

کی انتظامیہ کی جانب سے درخواست ہے میری جانب سے

بھی یہی درخواست ہے جمعہ کے دن کی کاریں باغ میں لانے

لیجانے کی خصوصی اجازت ہے تاکہ نماز میں تنگی نہ ہو لیکن جہاں تک ممکن ہو سکے آپ حضرات سے میری گذارش ہے کہ کاریں

مسجد ہی کے گردونواح میں رکھیں یہیں سے باہر لیجائیں

باغ کے اندر کم سے کم جگہوں پر سب سے چھوٹا جو راستہ ہو سکے

اس سے آئیں باہر جائیں یہ احسن ہے آخر باغ کا حسن

بھی اسکی ترو تازگی بھی ہمارے لئے ہی ہیں انتظامیہ کا کہنا ہے کہ کاریں پورا دن یہاں رہتی ہیں

اور کوئی گوشہ بھی ان کی زد سے باہر نہیں ہے

ممکن ہے خصوصی اجازت سے کچھ غیر نمازی 

ناجائز فائدہ اٹھا رہے ہوں

ہم ان کے ذمہ دار تو ہو نہیں سکتے

بہر حال ہمیں محتاط تو رہنا ہو گا''

''پٹھورا سُنگھدا نہیں کوئی

پتہ ہوندا مسواکاں لے کے آوندا

دفع کر کوئی شعر سُنا پُرفیسر اج کیہ لِکھیائی

تُوں تے دیگاں نظماں چاڑھنیاں ہوئیاں بھائیا

اگلیاں نسلاں موہدیاں کرن لئی

اسیں تے اِکو مصرع آکھ کے چُھٹی”

“ سُنا کوئی مصرع”

“کیہ سُناونائے ساہمنے ٹنگیا ویکھ لے”

ڈِھلا منٹگمری ہال دی باری ول اشارہ کردائے

“آہو مارشل لاء، کچھا سُکنے ٹنگیا ہویا اے

جدوں کجیا کوئی نہ منے تے کھول وکھاونا پیندائے

اِکو مصرع ای بڑائے کہ نہیں

ایہہ رومن شاہی بلڈنگ

انگریزاں نے دربار بنایا پہلوں

لوکیں اُنڈے ہو گئے، ناچ گھر بنا دِتا

سویرے ڈریور آونا “ہمارا میم ساب کا پرائیویٹ کپڑا رہ گیائے رات کا

بیرے آکھنا، “ڈھیری نمبر4میں ویکھو”

ہُن لوکاں دے وی ہتھ پیر کوئی ناچ لئی نِسل ہوون لگے

تے باریوں مصرع لمک پیا

تیرے ورگے نظماں تھلے پُھوکاں ماردے رہ گئے

ہُن سنیائے ایہنوں لائبریری بنا دینا نیں

تینوں رُکھاں ہیٹھوں آمد لین دی لوڑ نہیں رہنی

جدوں ننگا اگلے گاکھ جان تاں سُوٹ پوانا پیندائے

مصرع سمجھائیں پُرفیسر''

جنگو نِسل ہویا آوندائے

بستہ اگے دھر کے آہندائے:

کیہ صلاح اے،

ہُن کُجھ کھا نہ لیے

بستے وِچوں بند، امرود، چُھہارے، ریوڑیاں، مونگ پھلی

سبھ نِک سُک کڈھ ورتاؤندا اے

میں اوہدیاں کتاباں ول اشارہ کرناں

کہندائے: کرنے آں کُجھ کھا پی لیے

بُھکھیاں بندہ کیہ پڑھ سکدائے

چلو نال تُسیں کھاندے جاؤ جنگو

میں نال نال تُہانوں پڑھ کے سُنائی جاناں....

“سٹینڈرڈ ٹائم

وی نو دیٹ دی سن کراسز دا مریڈین

آف ڈفرنٹ پلیسز ایٹ ڈفرنٹ ٹائمزبٹ اِن پاکستان اَور واچز کیپ دا سیم ٹائم تھرو آوٹ دا کنٹری

وین ریڈیو پاکستان براڈ کاسٹس دا نیوز بلیٹن اِٹ اِز ون پی ایم اور ایٹ پی ایم آل اوور پاکستان”

کُجھ چِر جنگو ہُوں ہاں کردائے

ہولی ہولی کھانا چھڈ کے لماں پے جاندائے

“دینیات پڑھو راست بازی:

سچی بات کہنے اور اچھا کام کرنے سے آدمی اچھا کہلاتا ہے ہمیشہ سچ بولنا اور 

سچی اور صحیح بات پر عمل کرنا راست بازی ہے حقوق والدین:

جو بچے ماں باپ کا کہنا مانتے ہیں وہ ہر طرح ترقی کرتے ہیں خدا ان کی مدد کرتا ہے اور ان سے خوش ہوتا ہے ماں باپ کو ناراض کرنے سے ناراض ہوتا ہے ماں باپ کی خدمت کرنا سعادت مندی ہے اس سے دنیاو آخرت

میں سرخروئی ملتی ہے چلو اردو پڑھ لئو: قائداعظم طلبہ کو ملک و ملت کی اعلیٰ اقدار کا امین سمجھتے تھے”

“شاہ جی نِکی جیہی مسیت اے ایتھے سپیکر دی کیہ لوڑ اے؟''

''ایہہ سمجھ لواں گے بڑا وقت اے

اجے تُسیں امتحان دا سوچو

تھوڑا وقت اے بُہت ساریاں چیزاں نیں اجے پڑھن والیاں

اسلامی دنیا چِ تیل دے وڈے وڈے ذخیرے کِتھے نیں

ایثار دی تعریف کرو ہاں

اموی خُلفاءدے ناں تے دسو

چلو فوٹو سنتھے سز دی ڈیفی نیشن ای دسو

تہانوں نیندر تے نہیں آگئی جنگو؟

اچھا دسو بھلا میں ہُن تیکر کیہ آکھیائے”

''سِر آپنا''

''تُسیں کھیڈ آؤکے پھیر پڑھاں گے''

''نہیں''

''گھر چلیئے''

''جاؤ''

'' تُہاڈا کیہ پروگرام اے؟'' جنگو چُپ اے

'' نہ تُسیں کھیڈنائے نہ تُسیں پڑھنائے نہ گھر جانائے نہ ایتھے ای رہنائے

پھیر کرنا کیہ جے''

میری ایہدی کمونی کیشن ٹُٹ گئی

تے اوہ نہ ہووے اصلوں ای ہتھوں جائے

تلنگا بن جائے

''چلو میں تُہانوں لاؤڈ سپیکر بارے دسناں''

''آپنے آپ نوں دس لو''

جنگو اِکدم اُٹھ کے ٹُر پیندائے

تھوڑی جِنی وِتھ دے کے

میں مگرے ٹُر پیناں 

''پھول باغ کا زیور ہیں اور آپ کی

صحت کے ضامن''

''صفائی نصف ایمان ہے''

دور گراؤنڈ وِچ

دو پتلُوناں والے بندے

اِک گُچھا مُچھا چیز نوں ٹُھڈے پئے مریندے نیں

''کُتائے''میں آکھناں

جنگو نسدا آہندائے ''بچہ اے''

اسیں نسدے اوہدھر جانے آں

''پھول توڑنے والا حوالہءپولیس کیا جائے گا''

''مجھے استعمال کریں ردی کی ٹوکری

برائے مہربانی''

''کیہ گل ہوئی اے بھائی جی؟” میں آکھناں

''حرامزادہ اے جی کسے ذلیل دا نُطفہ''

''گل کیہ ہوئی اے؟''میں جھکدا جھکدا وِچ آجاناں

''تسیں وِچوں ہٹ جاؤ''

اِکدو بندے ہور وی کٹھے ہو گئے نیں

''کیہ دسئیے جی گھر دِیاں عورتاں نال آئے آں

جدھر جانے آں مگروں ای نہیں لہندا

عورتاں لاگے فحش کلامی کردائے فحش اشارے کردائے

اجدی گل نہیں کئیں واریں اسیں ایہنوں پھڑیائے بچہ کر کے چھڈیائے''

''بچہ تے ایڈا کوئی نہیں''

''مار دین گے مینوں بچا لو'' اوہ میریاں لتاں دوالے

مِٹی وِچ پلسٹیے ماردائے

''ایہو جیہاں دا ماں پیو کوئی نہیں ہوندا''

''جم کے سٹ گئی ہونی اے کوئی''

''چُوہڑا ہونائے کیوں اوئے؟''

''ویکھو جی ایہہ اکثر بچہ اے'' میں آکھناں

''اُنج سمجھاؤ مارن نال تُسیں ایہنوں کرِمنل بنا دیو گے''

''تے ایہہ اگے کیہ اے''

''تے پھیر ایہنوں جانوں مار دیو''میں آہناں

اِک مفلر والا ادھکھڑ مینوں ٹوکدائے:

''ایہناں لوکاں دِیاں واگاں تُہاڈے جیہاں ای کھولیاں نیں

معاشرہ خراب ای ایسے واسطے ہویائے''

مفلر والے ادھکھڑ نوں میں کہناں:

''بزرگو تُسیں تے سمجھو

بچہ اے

تُہاڈے وی بچے ہونے نیں

بچے نوں سمجھاون دا کوئی طریقہ ہوندائے''

مفلر والا ادھکھڑ مینوں آہندائے:

''بزرگو تُسیں وی سمجھو دھولے تُہانوں وی آئے ہوئے نیں

جے تُہاڈے گھر دی عورت ہوندی، پھیر ایہہ گند بولدا،

پھیر میں ویکھدا بچے نوں سمجھاون دا کیہ طریقہ ہوندائے''

'' مارن دا کوئی حق نہیں کِسے نوں''

''اوہ جی سارے بغیرت نہیں نہ ہوندے''

اِک نیلی جرسی والا دُوروں نسدا آیائے

چڑھے ساہ مینوں آہندائے:

''آپ کو پتہ نہیں ہے آپ نہ اس میں آئیں

اِسکو میں جانتا ہوں مینٹل ہے یہ مینٹل آئی ایم اے میڈیکل سٹوڈنٹ

آئی کین ٹیل یو اِسکا علاج یہی ہے اِسکے ساتھ سمپتھائز نہ کریں

اور زیادہ گڑبڑ ہو جائیگی اِسکو''

اِک کالا، سُکا چِٹی سویٹر والا

کلب دا گیند پھڑاوا  لگدائے

ہُن تائیں میرے مگر کھلوتا اگے ہونوں جھکدا رہیائے

ہُن اگے آن کے مِٹی وِچ پلسٹدے نوں اوہنوں بانہوں پھڑ کھلیاردائے

چنڈ مار کے نال ٹُراوندائے:

''ہُن گھر چل چنگی ہو گئی آ''

''پھڑ پُرفیسر''

باغ دے بُوہے لاگے ڈِھلا پنج رپیے آن پھڑاوندائے

''میری دیہاڑی بن گئی اے

دِل تے نہیں سی موڑن تے پر ٹکر گیائیں ہُن رکھ لے

ساڈی کیہڑی حلال دی اے

پنجاں پِچھے ساری رات تیری آمد بند رہنی اے''

''رہن دے یار'' اوہ سُندا نہیں ''پٹھورا ہے ای؟''

''چھڈ پُرفیسر اِنج ضمانت نہیں تیری ہونی

نالے سودا کوئی نہیں میرے کول ہُن

ایہہ تے پُلس دی پتی او''

پرتدیاں

مینوں جنگو آہندائے:

''جے اِک سیکنڈ اوہ ہور نہ چھڈدے اوہنوں

تے میں اوہناں نوں نہیں سی چھڈنا''

''تسیں کیہ کردے

تُسیں اوہناں دے گوڈیاں تیکر مساں پُہنچدے''

''شاہ جی بڑی عجیب گل اے

تُسیں نہیں سمجھے''

''کیہ عجیب گل اے؟''

''مینوں پتہ نہیں ہویا کیہ سی

اوہ مینوں وڈے بالکل نہیں سن لگدے

بس اِک سیکنڈ دی گل سی شاہ جی''

''تُسیں وی کافی خطرناک ہُن ہوندے جاندے او جنگو''

تھوڑا چِر چُپ ٹُردا جنگو آپے آہندائے

''پر جدوں تُہاڈیاں لتاں نال اوہ چمبڑ گیائے نا

تُسیں اوہدا مُونہہ نہیں نہ تکیا

میں تکیائے

اوہ وِچوں وِچوں ہسدا سی پیا

اوہدا ہاسا ویکھ کے اِکدم مینوں ڈر جیہا لگن لگ پیا''

''اوہناں بندیاں کولوں؟''

''اوہدے کولوں وی''

''اوہ کیوں؟''

''تُہاڈے کولوں وی''