''کیوں لتاں پیا پڑوانائیں بھائی
ایہنوں پرانہہ ہٹاوندا کیوں نہیں''
'' کِیہ دسّیے جی
کُتا نہیں جے بال اے آپنا
اینویں اڑی کریندا اے
آہندائے نال بزار مینوں لے کے چل''
''شاوا شے، مڑلے جا تاں کِیہ ہویا''
''جیہڑے بزار ایس جانا ہاء اوہ ہُن نہیں لگدا
اج ترِیہاں ورہیاں مگروں
میں ایس شہر ول آیاں
ہاں وسنیک میں ایتھوں دا ای
تُسیں نہیں مینوں جاندے
ایس روز میرے نال آہڈا لاونا
تے میں ایہنوں اندر ڈک کے جانا
تد میری وی عمر ایانی ہئی
بس ایہدے ہان ای سمجھو
اِک دِن ایہنوں اندرے بُھل کے
میں شام نہ مُڑ گھر آیا
دیس بدیسیں وَنج کریندیاں
اَج بُھلّیں پھیرا پایا
بُوہا لاہوندیاں اندروں نکل کے آن دوالے ہویائے
جِڈا چھڈ گیا ساں کلپدا
ایہہ اوڈے دا اوڈا ای اے
بس نونہہ تے وال وڈیرے نیں
جیہڑے بزار ایس جانا ہاء
اوتھے وج گئے چروکنے جندرے
ہٹیاں والے ویچ وَٹ کے گھرو گھریں جا سُتّے
ہُن میں ایہنوں کھڑاں تے کیہڑے پاسے، نہ کھڑاں تاں کیہڑے''
''ایہہ عجب کہانی دسّی او پردیسیا''
''اجے کل دی گل اے زورا ورو
تُسیں کہانی آہندے او''