فرید بھنڈار

(تارو سُتی اُٹھی اے ابھڑواہے گھابر کے- ساہ- مُڑھکا) الہ دین وی اُٹھ کھلوتا اے)

الہ دین: کیہ گل اے اماں خاب آئی اے تینوں کوئی؟

تارو: (سنبھل گئی اے) آہو آئی اے- تیریاں جِناں دی-

الہ دین: اوہ تہاڈا بھلا ہو جائے- کہانی بدل گئی ہونی اے- سُنا ذرا

تارو: اوہا کہانی شکلاں وٹا وٹا کے آوندی اے ہر اک اگے- جاگدیاں ہور سُتیاں ہور-

الہ دین: سَوں لے اماں تھوڑا جیہا-

تارو: نہیں سَوں لیائے جیہڑا سَونا ہا- توں وی اُٹھ ہُن- (اگ بال کے پانی دھریندی اے چُلھے تے)

الہ دین: اج ایتوار اے دونویں جِن نہ بن جایئے- توں مُندری والا میں دِیوے والا-

تارو: نہیں توں مُندری والا میں دِیوے والا-

الہ دین: چل دوویں توں-

تارو: تے توں؟

الہ دین: میں جادوگر - نا سچ میں الہ دین کہ- کاپی نویں تے کپڑے صاف- ( اُٹھ کے بھنگڑا پایوس) کاپی نویں تے کپڑے صاف- سَتّے خُون اسانوں ماف- دوویں (تارو ہسدی تاڑی مریندی رَلدی اے) کاپی نویں تے کپڑے صاف سَتّے خون اسانوں معاف- 

الہ دین: (تال وٹا کے- بھنگڑے دا جھُمر بنا کے) کاپی کالی تے چِکڑ کپڑے (تارو وی نال ) کاپی کالی تے چِکڑ کپڑے- جیہنے کھانے نیں کھا لئے لَپڑے (دوویں ہس ہس نچے نیں- سُگری آئی اے- دوویں ہسدے کھلو گئے نیں)

سُگری: ایہہ کیہ کہانی اے کپڑیاں تے لپڑیاں دی-

الہ دین: جِناں دی کہانی اے

سُگری: تیری الہ دین دی؟

تارو: آہو ایسے دی-

الہ دین: نہیں ایہدی - ایہہ جِن ای ماسی سُگری-

سُگری: کیہڑا- مُندری والا کہ دِیوے والا

الہ دین: دوویں

سُگری: مُندری دیوا تے تیرے کول اے نا ایہدا

الہ دین: نہیں- کسے کول نہیں- ایہہ ازاد جِن اے کسے دے قابو نہیں-

سُگری: (ہسدی اے) ایسے واسطے میں آئی آں سوختے سوختے-

الہ دین: جیہڑی کسے دے قابو نہیں ماسی اوہ تیرے قابو آوندی اے؟

سُگری: میں ایہنوں قابو تھوڑا ای کرنائے- میں تے بس ایہدے کولوں پتہ کرنائے بھئی جِن ازاد کیویں ہو سکدے نیں-

الہ دین: نہ دِیوا کِسے کول ہوئے نہ مُندری، جِن ازاد ای ازاد نیں-

سُگری: کسے نہ کسے کول تے ہونا ای ہویا نہ دیوا مُندری-

تارو: بنن ای نہ دِیوے مُندریاں-

الہ دین: کتھے بندے نیں

تارو: جتھے وی کتے لوڑ پوندی اے جِناں نوں کم تے لاون دی- مِلاں وچ- زمیناں تے- گھراں وچ-

الہ دین: کون بنیندائے-

تارو: جیہنے جِناں دی کمائی کھانی ہووے- مِلاں والے- زمیناں والے گھراں والے- کتے مُندری چلدی اے کتے دِیوا

سُگری: تارو آئی تے ساں میں تیرے کول اجازت لینی سی اک- پر ہُن تے میں نال ای کھڑنا اے تینوں-

تارو: میرے کول تے جھاڑو ٹاکی اے سُگری اجازت تے کوئی نہیں-

سُگری: تیرے ناں دے پیسے نیں نا جیہڑے کٹھے کیتے ہوئے- اوہ کمیٹی وچ پاونے نیں تیرے ولوں-

تارو: میں کیہ کرنی اے کمیٹی-

سُگری: ایہہ ہور قسم دی کمیٹی اے- توں کماں دے فنڈ دا آکھیا سی نا- ایہہ کماں دی کمیٹی اے- ساڈی پارٹی اے نا- اساں ساریاں سوچیائے ہر ممبر کم دسے کوئی نہ کوئی سانجھا- مُڑ سارے کمیٹی پاون- جیہدی نکلے اوہدے والے کم تے لگے-

تارو: ایہو نُسخہ اے جِن بناون دا-

سُگری: سمجھی نہیں میں

تارو: جیہدے ناں دی کمیٹی نکلی اوہنے بندہ رہنا ای نہیں- جِن بن جانائے- تے جیہناں دی نہیں نکلی اوہناں نوں وی نال ای بنا دینا اے- تے جِن بنیا نہیں بندہ تے دِیوا مُندری رگڑ کے قابو کیتا نہیں اگلیاں-

سُگری: سُن لیا ای الہ دِینُو- توں تے آہندا سیں اماں ازاد جِن اے تیری-ایہہ تے آہندی اے جِن ازاد ہو ای نہیں سکدے-

الہ دین: ایہہ ہور رنگ دا جِن اے ماسی- اوہو جیہا نہیں جیہڑا ماسٹر بناؤ اے مینوں- نویں کاپی تے کپڑے صاف-

سُگری: جِن ہے ای نہیں اماں تیری - ایہہ بندہ اے تے ازاد وی تدے ای اے-

الہ دین: تے پھیر کیوں بنیندے او جِن ایہنوں کمیٹی پوا کے- ایہہ تہاڈی پارٹی اے نہ ماسی جیہڑی- ایہنے پہلوں بن جانائی ”پاکستان کمیٹی پارٹی“ مُڑ ”پاکستان جِن پارٹی“-

سُگری: (ہس کے) چلو اوہدا دِیوا مندری تے تیرے ہتھ ای آؤنائے نا اخیر-

الہ دین: نہیں میں فیصلہ کرلیائے-

سُگری: کیہ

الہ دین: نہ میں الیکشن الیکشن کھیڈنا اے نہ ٹونٹی ٹونٹی  لڑنائے-

سُگری: منظور اے سانوں- پر اج تے توں چل نا ساڈے نال-

الہ دین: مَیلیاں نال ای؟

سُگری: ایہو منظور اے سانوں ( جُھمر پا کے) کالی کاپی تے چِکڑ کپڑے

الہ دین: ویکھ لئیں ماسی-

سُگری: ویکھ لیائے -کالی کاپی تے چِکڑ کپڑے-

الہ دین: (رَلدا اے) ہو جاؤسُتھرے نہا کے چھپڑے-

دونویں: کالی کاپی تے چِکڑ کپڑے- ہو جاؤسُتھرے نہا کے چھپڑے (تارو تاڑی لا کے رَلی اے)

(ہنیرا)