فرید بھنڈار

(پچھے تارو سُتی پئی اے نال الہ دین- تارو نوں خاب آئی اے- لوءاگیرے آگئی اے- تھوڑی جیہی تھاں تے- دووے اوتھے بیٹھے نیں- الہ دین مُندری ویکھائی اے ماں نوں- اوہ ہتھ وچ پاون لگی اے کھَبّے وچ)

الہ دین: نہ نہ پاون والی نہیں ایہہ- جِن نال ویاہ کراونا ای؟ (اکھ مار کے) اوہ تے نوکر اے تیرا- ویکھ میں بُلاونا اوہنوں- (مُندری رگڑیوس بھُنجے- جِن آ گیا اے- نِکا موٹا افسر لگدا اے کوئی-)

جِن: جی سَر- حُکم- اوہ- سلام علیکم بیگم ساب معاف کرنا میں ویکھیا نہیں-

الہ دین: کُجھ کپڑے چاہیدے نیں مینوں- آپنے واسطے-

جِن: (موبائل کڈھ کے) کیہڑے کیہڑے سَر، کِنے- (الہ دین تارو ول ویکھیائے-)

تارو: بس اک سلوار قمیض-

الہ دین: ہاں بس اک سلوار قمیض- اک چاکی سابن دی-

تارو: نہیں نہیں اوہدی کوئی نہیں لوڑ-

الہ دین: ہاں سابن رہن دیو- اوہدی کوئی لوڑ نہیں (تارو ول ویکھ کے) کاپی؟ (تارو سَر ہلائے) اِک کاپی نویں- ہتھ شتھ نہ لگے ہوون اُتے- 

جِن: (موبائل تے نوٹ کر کے) سَر- (الہ دین اگے نیوں کے) ذرا اکھاں بند فرماؤ سَر ِاک سیکنڈ- بیگم ساب وی- جی- بس میں آیا سمجھو- (باہر نکل گیا اے- الہ دین تے تارو اکھاں بند کیتی بیٹھے نیں)

الہ دین: کمال ایں توں وی اماں- جِن کولوں ایہو منگاونا سائی- کیہ فائدہ جِن بلاون دا-

تارو: ایویں فضُول نہیں چاہیدا سانوں کُجھ وی-

الہ دین: تاں وی دو جوڑے ای ہور آکھ دیندیوں- کاپیاں ای دو چار نوِیاں ہور- کیہ آکھسی کیہو جیہے لوک نیں ایہہ-

تارو: اسیں تے جو ہاں سو ہاں- پر جِن ایہو جیہے ہوندے نیں؟

الہ دین: اوہ پُرانیاں گلاں نیں- زمانے بدل گئے-جیویں کاراں دے ماڈل نیں جِناں دے وی نیں- نالے ایہہ اصلی اے کہانی والا تے نہیں نہ- سمجھ تے سہی نہ پروبلم توں-

تارو: خبرے کِتھے ٹُر گیائے اکھاں بند کرا کے-

الہ دین: پھیر اوہو گل- دفتر اے اوہدا- آڈر جانائے اوتھے، مُڑ سٹور تے، اوتھوں سامان آونائے-

تارو: رہن دے- ایویں یَب ای پا لیائے- ایہناں گلاں وچ نہیں پینا چاہیدا- میں کپڑے دھو کے سُکنے وی پا دینے آہے ہُن نوں-

الہ دین: ساری عُمر اکھاں بند کرائی رکھیاں نیں اَبّے تیریاں- اج کیوں کاہلی پے گئی ایں-

( جِن آ گیائے- نال اسسٹنٹ اے- اسسٹنٹ کپڑیاں دا پیکٹ تے کاپی میز تے دھریندا اے)

جِن: سَوری سَر- تُہانوں تکلیف دِتی- کھول لئو اکھاں- سٹور کیپر نہیں آیا- چابی وی اوہدے کول اے- جَندرا توڑن واسطے ہائر اتھارٹی دی اجازت چاہیدی اے- ہور دیر ہو جانی سی- نالدے آفس توں منگوائے نیں- میں انکوائری آرڈر کر دتی اے سَر-

الہ دین: (کپڑے کھولدائے) ایہہ تے وڈے سائز دے نہیں؟

اسسٹنٹ: بیگم صاحب دے کم آجاسن-

تارو: مینوں نہیں چاہیدے-( جِن اسسٹنٹ نوں گھوردا اے)

اسسٹنٹ: صاحب نے وڈیاں وی تے ہونائے-

جِن: (اسسٹنٹ نوں کپڑے دے کے) توں باہر ٹھہر (اوہ چلا گیائے) سوری سَر میں اوس ویلے ماپ نہیں لیا- سٹینڈرڈ سائز ہوندے نیں سَر تہانوں پتہ ای اے- مگروں کَٹ وڈھ ہو سکدی اے- پر دوسرے آفس دا معاملہ اے- ہُن ماپ لے کے بھیجناں- (باہر گیا اے- نال ای اسسٹنٹ نوں لے مُڑیا اے- اوس ماپ گھِدا اے- جِن نالو نال موبائل تے نوٹ کیتا اے) میں ہُنے حاضر ہویا سَر کپڑے لے کے-(موبائل کن لائی نکل گیا اے اسسٹنٹ نال)

الہ دین: (کاپی چا کے ویکھیوس) اوئے- ایہہ تے رجِسٹر اے-(تارو لے کے تکیائے، سَر ہلایوس- الہ دین مُندری رگڑی اے جِن آیا اے) میں کاپی آکھی آہی تُسیں رجسٹر لیا پھِڑایائے- (چھِبی "ایہہ کیہ" دی) لگدائے تُسیں کُجھ (اُنگل سِر کول بھوائی اے- سِر وچ کوئی خرابی دسن دی سینت)

جِن: (بھیڑا پین دا پینترا) اسیں اگے ای شرمندے آں سَر- ہور شرمندے نہ کرو- (موبائل دبایوس- اسسٹنٹ آ گیا اے-) کیہ کردے او یار- کاپی دا آرڈر سی- رجسٹر لے آئے او-

اسسٹنٹ: بیگم صاحب دے کم آ جا سی-

تارو: نہیں لے جاؤ- ساڈے کسے کم نہیں ایہہ- (جِن اسسٹنٹ نوں گُھوردا اے)

اسسٹنٹ: صاحب نے وڈیاں وی تے ہونائے-

جِن: (اسسٹنٹ نوں دھک کے) باہر ٹھہر- یُو-- با ---- بابا-- (اسسٹنٹ چَوڑا ہوکے کھلو گیا اے- بھیتلی مُسکان جِن تے ٹھوک کے- جِن کول ہو کے، ٹھوڈی ہتھ لا کے) کیوں ذلیل کراؤن لگائیں ایتھے- (اسسٹنٹ مُڑ اگے وانگر سُنگڑ کے باہر چلا گیا اے) اوہ- ویری ویری سَوری سَر- (روون ہاکا) ڈسپلن برباد ہو گیائے- سسٹم تباہ کر دینائے ایہناں سیاسی سفارشیاں نے- میں آپ کاپی لے کے حاضر ہوناں سَر- کپڑے وی تیار نیں- وچ جِناب دی کال آ گئی- (موبائل کَن تے لا کے واپس مُڑدا اے)

الہ دین: گل سُنو

جِن: (پرت کے) سَر-

الہ دین: میرا خیال اے تُسیں ایہہ چیزاں رہن دیو- کپڑے کاپی- ایہہ ہو جاسی- تُسیں اک کم کرو- ایہہ گھر اے نا ساڈا- ایہہ کرائے دائے- سانوں اک گھر لے دیو کسی چنگی جگہ تے ذرا کُھلا-

جِن: آئی ایم سَوری سَر- آئی ایم یورہمبل سَروَنٹ- پروبلم ایہہ اے سَر کہ اوہ میری پاور نہیں- برانچ وی ہور اے جیہڑی ڈِیل کریندی اے- دِیوے والے دے ماتحت اے سبھ کجھ اساں وی اوہ وی- جے جِناب کول دِیوا---- الہ دین: دِیوا کتھوں مِلسی-

جِن:ہے تے کونفی ڈینشل ٹاپ سیکرٹ ایہہ سَر- سٹیٹ سیکرٹ جو ہویا- پر جو وی ہو جائے میں تہانوں دس دیناں- میں سمجھناں تہاڈا رائیٹ بندا اے- مینوں یقین اے- تُسیں اینی مہربانی فرماسو- میرا ناں وچ نہ آوے کسے موقعے تے-

الہ دین: نہیں نہیں دسو تُسیں- مینوں پتہ اے جِناں دے ناں نہیں ہوندے نمبر ہوندے نیں-

جِن: ونڈر فُل سَر- گوڈ بلَیس یُو سَر- تہاڈے توں بہتر پورے سسٹم نوں کون جاندائے (بھیت نال ذرا کول ہو کے)- دِیوا سَر اج کل مِرکانا گروپ دے چیئرمین مِرکانا ساب دی کوٹھی اے- ڈرائنگ روم وچ- انگھیٹی تے- مینٹل پیس تے- ٹو بی ایگزیکٹ- آئی ایم گریٹ فُل سَر- (جُھک کے باہر نکل گیا اے)

تارو: (اُٹھ کے) سَر تُسیں کُنڈی اندروں لا لئو- کپڑے لاہ کے پانی وچ پا دیو تے مل کے سُکَنے پا دیو- میں ہُنے آئی کاپی لے کے- (نکلن لگی اے تے جادوگر آ گیائے ماسٹر بن کے- الہ دین حیران اے ڈریا ڈریا- ماسٹر اوہدے سِر تے ہتھ پھیریندا اے- پیار کریندا اے-)

جادوگر: (تارو نوں) کیہ حال اے ساڈے شیر دا- (الہ دین نوں) کیہ گل اے ول تے سَیں نا- کل سکول نہیں آیا- میں آکھیا آپ پُچھ کے آواں اوہ تے کدیں غیر حاضر نہیں ہویا- خیر ہووے سہی-

الہ دین: اوہ کپڑے ماسٹر جی-

جادوگر: نہ نہ میرا بیٹا ایہہ کیہ گل ہوئی- لا حول ولا قوة (تارو نوں) تہاڈا بیٹا ایتنا لائق ایتنا سمجھدار- ماشااللہ- کپڑیاں دی کیہ گل اے- طالب علم دا لباس تے اوہدی ذہانت اے اوہدی محنت اے- ایس بچے تے ای تے اُمیداں نیں ساڈیاں ساریاں-

تارو: کپڑے صاف پا کے آسی ایہہ سکولے ماسٹر جی کل-

جِن: (الہ دین نوں ہور پیار کر کے- اوہدا ہتھ پھڑ کے) تُسیں ایہناں گلاں بارے قطعاً پریشان نہ ہویا کرو- ہرگز نہیں میرا بیٹا- میں آپ آ کے نال لے جاساں تہانوں- (مُندری ویکھ کے) ایہہ کیہ اے- نہ نہ میرا بیٹا- طالب علم دا اِکو زیور اے- علم- تُسیں اوہ پاؤنائے- ایہہ لاہ کے دے دیو والدہ نوں- روز واقعات ہوندے نیں بچیاں نال-

(الہ دین لاہ کے تارو ول کریندا اے مُندری- جادوگر جھپٹ کے نپ لیتی اے- رگڑی اے- جِن آگیائے- ہُن تھانیدار دی وردی وچ- موبائل کَن تے-)

جِن: (جادوگر نوں سلُوٹ) سَر حُکم

جادوگر: بس ٹھیک اے جاؤ-

جِن: نہیں حُکم کرو تُسیں سَر جے ایہناں نوں کوئی (مروڑے دی سینت) ادب شدب سِکھاونائے تے-

جادوگر: نہیں اجے نہیں- میں پھیر بُلاساں- (جِن ٹُر گیائے) ویکھ لیا ای نا- توں کل سکول صاف کپڑے پا کے نہ آیا، غیر حاضر ہویا، میں تینوں تھانے گھل دیساں- حوالات وچ- پرچہ کراساں تیرے تے- بلاسں فیمی دا کیس پوا کے سزا دواساں تینوں- پنجاہ کوڑیاں دی تے دس لکھ جرمانے دی-

تارو: وے ماسٹرا ایہہ کیہ گلاں پیا کرینا ایں-

جادوگر: تینوں لگ پتہ جاسی چُوہڑیئے- میں ماسٹر مُوسٹر کوئی نہیوں- میں جادوگر آں-

الہ دین: (آپ دھیانے پُھمنی پا کے) چوہڑی دربار دی جھاڑُو پھیرے اندر باہر دما دم مست قلندر-

جادوگر: ٹھہر اوئے تیری میں....

تارو: (سختی نال) توں مُندری لینی سی لے لئی، جا ہُن- ایس بچے نے تینوں کیہ آکھیائے-

جادوگر: اچھا- اجے آکھیا ای کُجھ نہیں- ایہنے کہانیاں وچ مینوں ذلیل کیتائے، پوری دُنیا وچ پروپاگنڈا کیتائے- باقاعدہ کیمپین چلائی اے میرے خلاف- دُنیا دی ہر زُبان وچ- ایہہ کیہ سمجھدائے اپنے آپ نوں تے کیہ سمجھدائے مینوں- جتھے جاﺅ جادوگر جادوگر- جادوگر کون ہوندے نی اوئے- پرانیاں گلاں- میں اک آرٹسٹ آں- میک آپ اک عظیم فن اے میں عظیم اُستاد آں ایس عظیم فن دا-

ہم ہیں عظیم لوگ کہ اس خُشک خاک میں

ہم نے بصدجمال گلستاں کھِلائے ہیں

الہ دین: ٹی وی تے وی آوندے او تُسیں؟

جادوگر: تے ہور اوتھے کون آوندئے- پیو تیرا سُوٹا لا کے؟ ایہہ جیہڑا جِن آیا اے ایہہ کون سی میں ای ساں- پُلس وی میں ای آں- وکیل وی میں ای ہوساں تیرے کیس وچ تے جج دی کُرسی تے بہہ کے سزا وی تینوں میں ای دیساں انشااللہ تے پھیر تیری ماں دا کھسم بن کے پھاہے وی میں ای لاساں تینوں- (ہسن لگ پیائے) بس- ڈر گیائیں نا- (مَٹھا مَٹھا ہس کے مُڑ ماسٹر والے رنگ وچ) نہ نہ پُتر جی ساڈی مجبوری اے ماسٹراں دی- ایہہ کم ای ایہو جیہا اے کُتا- تَڑی تُڑی لاؤنی ای پیندی اے- ڈسپلن جو رکھنا ہویا- ہور کوئی گل نہیں- بیٹا میں وی غریب آدمی آں- تہانوں پتہ اے بی بی- سکول ٹیچر دی تنخواہ ای کیہ ہوندی اے- دو اُنگل ودھاوندے نیں تنخواہ تے دو ہتھ منگھیائی ودھ جاندی اے نال ای- پرائمری دی ٹیوشن کون لیندا جے سَرکاری سکولاں وچ- مینوں پتہ اے نا کِتنی محنت تُساں کریندے او پئے بچے نوں پڑھاوندے او پئے جیہڑا- تہاڈا ای کم اے ماشااللہ- میریاں کُجھ ضرورتاں نیں- مینوں لوڑ آہی اوس واسطے ایس مُندری والے دی- کُجھ دُشمن داریاں وی ہوندیاں نیں ساڈیاں پِنڈاں تھاواں تے شریکے برادرِیاں دِیاں تہانوں پتہ ای اے- بس اک دو کم کرا کے میں مُندری موڑ دینی اے تہانوں بیٹا- پر ویکھو نا سکول دے ڈِسپلن دا معاملہ اے بیٹا جی- کپڑے صاف، کاپی نویں (تارو نوں) ساڈیاں انسپکشناں وی ہوندیاں نیں- کوئی پتہ نہیں نہ ہوندا وقت دا- پر تُسیں فکر نہ کرو ہو جاسی بندوبست اوہ وی کوئی نہ کوئی- تُسیں بیوی میری نوں وی مِلے او- آیا کرو- سادی اے- صفائی شفائی نہیں ہُن ہوندی اوہدے کولوں- بمار شمار رہندی اے ہر ویلے- پھیرا شیرا پایا کرو تُسیں آہو- سگوں کُجھ پڑھ لیا کرو گھر آ کے- بڑے کورس کرائے نیں میں- اگوں ایس بچے دے سَو کم نیں- ایسے صفائی نال بدھے رہے تُسیں تے کیویں ہوسن- دُنیا بڑی وسیع اے- بڑے رابطے نیں میرے- ناں لئو کسے دا جیہنوں میں لَونچ نہیں کیتا- لَونچ سمجھدے او نا- بیڑی- ہر چیز لَونچ کریدی اے- کتاباں، شاعر، جرنیل، سیاستدان، آرٹسٹ، عالم، دہشت گرد- کاغذ دی بیڑی لَونچ کرناں میں- ویکھدیاں ویکھدیاں جہاز بن جاندی اے- کھرباں دا مال لے کے ٹُردی اے- کیہ کمی اے تہاڈے وِچ- بس ہاں کرنی اے تُسیں- اگوں میں جاناں میرا کم- چنگا بیٹا جی- خوش رہو گوڈ بلیس یو- (نکل گیا اے)

الہ دین: مینوں اگے ای شک ہا-

تارو: کیہ؟

الہ دین: ایہہ ماسٹر مینوں الہ دین کہانی والا سمجھدا اے تے آپ اصل وچ جادوگر اے-

تارو: کُنڈی لا لے- کپڑے مَل- میں آئی ہُنے کاپی لے کے- (نکل گئی اے)

( ہنیرا)